1 Ivo ifosile Siku ya Humulo, Malia wa kulawa Magidala na Salome na Malia mami yake Yakobo wakagula mavuta yadamane, waite wakauhake mtufi wa Yesu. 2 Nalugunzu gunzu jumapili, zuwa ivo dikalile dikwandusa kulawa wakaita kuna dikabuli. 3 Ivo wakalile muinzila wakuiuza, "Vino niyani naadahe kudibimbilisa dila ibwe kulawa hauingililo wa dikabuli?" 4 Ivo wakalile haguhi na kufika wakalola wakadiona dila ibwe dibimbiliswa kale kulawa hala ha uingililo wa dikabuli. 5 Ivo wakalile wakuingila mula mdikabuli, wakamuona mbwanga imwe kakala ubanzi wa kulume wa dikabuli kavala kanzu nzelu chwee, wakakangawala nk'hani. 6 Ila mbwanga akawalongela, "Msekukangawala. Mweye mkumulonda Yesu wa Nazaleti awambigwe mumsalaba. Mbali hano hahali Kabwela muugima. Loleni hano ndo hant'hu wakalile wamgoneza. 7 Elo gendeni mkawalongele mbuli ino wanahina wake haswahaswa Petulo kuwa Yesu kawalongolela kale kwita Galilaya, uko namumuone gesa vila awalongele." 8 Ivo, wakahalawa hadikabuli na wakasumka, kwa vila wakala waingilwa na woga na kukangawazwa. Hawamulongele mnt'hu yoyote mbuli izo kwa vila wakala wakuogoha nk'hani.

9 Yesu ivo abwelile muugima lugunzu gunzu siku ya jumapili, tenk'hu akumulawila Malia wa kulawa Magidala, ila amulavile vinyamkela saba. 10 Malia wa kulawa Magidala akaita kuwalongela wala wakalile hamwenga na Yesu na chipindi icho wakala wakwomboleza na kulila. 11 Mbali ivo wezile kuhulika Yesu kabwela muugima na Malia wa kulawa Magidala kamwona, hawatogole.

12 Baadae Yesu akawalawila wanahina waidi kuno akuoneka muna isula imwenga. Wanahina ao wakala wakwita kumgunda. 13 Ivo wammanyile wakabwela ili wawalongele wayawe, mbali ao wayawe hawatogole.

14 Kamala Yesu akawalawila wala wanahina wake kumi na imwe ivo wakalile wakudya. Yesu akawabwakila kwa vila ya udala wa myoyo yawe, kwa vila hawawatogole wala wamuonile Yesu kuwa kabwela muugima. 15 Kamala akawalongela, "Gendeni mui isi yose mkazilonge Mbuli Zidamane kwa want'hu wose. 16 Mnt'hu yoyote akulonda kutogola na kubatizigwa naahonyigwe. Mnt'hu hakutogola naalamulwe. 17 Na vilagiso vino navikolane na wala watogole na kwa udahi wa zina dyangu nawalave vinyamkela na nawalonge kwa ulonzi umwenga. 18 Na wakatoza nyoka egu kung'wa kint'hu chochote cha kukoma sekechiwalumiza na nawawaikile watamu mikono na ao nawahone."

19 Kamala Mndewa Yesu ivo akomeleze kulonga nawo, akapaa kwita kuchanya kuulanga. Akakala ubanzi wa kulume wa Mulungu. 20 Kamala wanahina wake wakaita kila hant'hu kuzilonga Mbuli Zidamane za Mulungu. Mndewa Yesu kakala akusank'hana hamwenga nao na kulagisa Mbuli Idamane ilongigwe ni ya kweli kwa kufosela uzonza utendeke hagati yawe.