1 Yesu na wanahina wake ivo wakalile haguhi na Yelusalemu, wakafika mvibululu va Besifage na Besania haguhi na gamba dikutangwa dya Mizeituni. Yesu akawalagiliza wanahina wake waidi, 2 akawalongela, "Gendeni muna kibululu kihalongozi yenu. Vila mkaingila tu namumfike mwana mp'hunda kafungigwa na ank'hali hanampapa mnt'hu. Mfunguleni na munigalile hano. 3 Mnt'hu akawauza, hangi mkumfungula, Mulongeleni, Mndewa akumulonda na naambweleze mda si mwingi."

4 Ivo, wala wanahina waidi wakaita na wakamfika mwana mp'hunda kafungigwa haguhi na ulwivi lwa kaya ikalile nk'handa mwa nzila, ivo wakalile wakumfungula, 5 want'hu wakalile watimalala hant'hu hala wakawauza, "Mwe! Mkutendaki aho? Hangi mkumfungula iyo mwanamp'hunda?"

6 Wala wanahina wakawalongela gesa vila Yesu awalongele, kamala wala want'hu wakawaleka wasegele nayo. 7 Wakamgalila Yesu ila mwanamp'hunda, kamala wakaika goya mienda yawe mchanya mwa ila mwanamp'hunda na Yesu akakwela na kukala mumgongo wamp'hunda. 8 Want'hu wengi wakatandika miyenda yawe muna inzila na wamwenga wakabwena matambi ya miti ya mmigunda na kuyatandaza muinzila. 9 Want'hu walongole na wala wawakolile kunyuma wakala wauguta na wakalonga, "Atunyigwe Mulungu! Iyo akwiza kwa udahi wa Mndewa! 10 Mulungu akutendela yadamane umwene ukwiza wa tati yetu Daudi. Utunya kuchanya kuulanga kwa Mulungu!"

11 Yesu akaingila mdibululu dya Yelusalemu, akaita dimwe kwa dimwe kui kaya ya Mulungu na akalola goya kila kint'hu. Mbali kwa vila zuwa dikala diswa Yesu na wanahina wake wakaita Besania.

12 Siku ya kaidi yake nalugunzu, ivo wakalile wakubwela kulawa Besania kwita Yelusalemu, Yesu akawa na nzala. 13 Akauona kwa kutali mkuyu wenye mazani mengi ivo akawitila ili aone gesa naapate tini. Mbali ivo aitile kaona mazani muhala kwa vila hachikalile chipindi cha mkuyu kwima. 14 Yesu akaulongela ula mkuyu, "Kuandusila dielo na siku zose sekewime." Wanahina wake wakala wakuhulika mbuli ila.

15 Yesu na wanahina wake ivo wafikile Yelusalemu, Yesu akaita haikaya ya Mulungu, akaandusa kuwainga want'hu wose wakalile wakugula na kuuza vint'hu na akazibidula meza za wala wakalile wakuvunja hela na visumbi va wala wakalile wakugula njiwa, 16 na akawalemesa kusola kint'hu chochote muikaya ya Mulungu. 17 Kamala akawafunza want'hu, "Iyandikwa muna maandiko ya Mulungu yakulonga,

Kaya yangu naitangwe kaya ya kumulomba Mulungu kwa want'hu wa isi zose!

Mbali mweye muhabidula na kuhatenda hant'hu hakufisila wabavi."

18 Wakulu wa walava nt'hambiko na wafunza malagilizo ivo wahulike mbuli izo, wakandusa kulonda nzila ya kumkoma. Mbali wakala wakumuogoha kwa vila want'hu wengi wakala wakukangawazwa vila akalile akufunza.

19 Ivo ifikile dihungile, Yesu na wanahina wake wakahalawa Yelusalemu.

20 Nalugunzu ivo wakalile wakufosa, wakauona ula mkuyu unyala wose hadi kudisina. 21 Petulo akakumbukila, akamulongela Yesu, "Mfunza, lola ula mkuyu uulongile yehile, unyala!"

22 Yesu akawalongela, "Mtogoleni Mulungu. 23 Kweli huwalongeleni, mnt'hu yoyote akadilongela gamba dino ding'oke na dikasumbwe mwibahali, nae akawa abule shaka muumoyo wake, mbali katogola kuwa mbuli zose azilongile nazitendeke, na atendelwe mbuli iyo." 24 Ivo huwalongelani, mkamfugamalila Mulungu na kumulomba kint'hu togoleni kuwa muhokela kale na namuhokele yala mulombile. 25 Namweye, kila mkamulomba Mulungu, wahalavileni wayenu mbuli zihile wawatendele, nae Tati yenu wa kuulanga nawalahavileni mweye mbuli zihile mzitendile. 26 Mbali gesa mweye mukawa hamkuwahalavila wayenu mbuli zihile wawatendile na mweye vilavila Tati yenu wa kuulanga seke awalavileni mbuli zihile mzitendile.*

27 Yesu hamwenga na wanahina wake wakengila kaidi Yelusalemu. Yesu ivo akalile akugenda hai Kaya ya Mulungu, wakulu wa walava nt'hambiko na wafunza Malagilizo na wahenga wakamwitila, 28 wakamuuza, "Yala ukuyatenda siku zose ukuyatenda kwa ukulu uli? Na niani akwin'hile ukulu wa kutenda mbuli izo?" 29 Yesu akawalongela, "Naniwauzeni mbuli imwe, mkanilongela na nie naniwalongele huzitenda mbuli zino kwa ukulu wa niyani. 30 Nilongeleni, vino ukulu wa Yohana wa kubatiza ulawa kwa Mulungu egu kwa want'hu?"

31 Wakandusa kuiuza wao kwa wao, "Chikamulongela, Ukulawa kwa Mulungu, naachiuze hangi hamumtogole? 32 Mbali chikamulongela, ukulawa kwa want'hu, want'hu nawaihizwe." Wakawogoha want'hu kwa vila wose wakala wakummanya kuwa Yohana kweli kakala mulotezi wa Mulungu. 33 Ivo wakamulongela Yesu, Cheye hachikumanya, Yesu akawalongela, "Naniye sekeniwalongele hutenda mbuli zino kwa ukulu uli."