1 Kamala Yesu akalonga nao kwa milinganyo, Kukala na mnt'hu imwe alimile mgunda wa mizabibu. Akauzungulusila uwa na mgati yake akazenga hant'hu ha kukamulila zabibu. Akakodisha ula mgunda kwa walimi na akaita kuna isi ya kutali. 2 Ivo kifikile chipindi cha mulao wa zabibu, akamtuma mtwana wake kwa wala walimi amgalile nt'haja ya zabibu kulawa mumgunda wake. 3 Wala walimi wakamgwila ila mtwana, wakamtowa na kumwinga bila ya kumwik'ha kint'hu chochote. 4 Akamtuma kaidi mtwana imwenga, iyo nae wakamulumiza mmutwi na kumtendela vihile. 5 Ila mwenye mgunda akamtuma mtwana wake imwenga nae wakamkoma. Ila mwenye mgunda akagendelela kuwatuma watwana wake wamwenga wengi, mbali wamwenga wakawatoa na wamwenga kuwakoma. 6 Mwenye mgunda kakala kasigala na mnt'hu imwe wa kumtuma, nae ni mwanake akumbweda. Ivo akamulagiliza akalonga, ino nawamtegeleze kwa vila ni mwanangu. 7 Mbali ao walimi wakalongelana, "Ino ndo mulisi wa mgunda uno, ivo chimkome ili chiulisi cheye mgunda uno!" 8 Ivo wakamgwila na wakamkoma wakamsumba kunze ya ula mgunda wa mizabibu.

9 Yesu akawauza, "Ivo, ila mwenye mgunda naeze kutendaki? Naeze kuwakoma wala walimi na kuwakodisha want'hu wamwenga ula mgunda wa mizabibu." 10 Vino, hamsomile maandiko ya Mulungu?

"Ibwe wadilemile wazenzi

diwa ibwe kulu kufosa yose ya kuzengela.

11 Mndewa Mulungu ndo katenda mbuli ino, nayo ni ya

uzonza muna meso yetu."

12 Ivo wakulu wa walava nt'hambiko na wafunza malagilizo na wahenga wakala wakumanya gesa mlingano ula ukala ukuwahusu. Wakalonda kumtoza kwa nguvu mbali wakala wakuogoha uyama wa want'hu. Ivo wakamleka na wakasegela hant'hu hala.

13 Ivo, Mafalisayo wamwenga hamwenga na want'hu wakalile wakumtaza Helode watumigwa waite wakamtege Yesu kwa kumuuza. 14 Wakamwitila na wakamulongela, "Mfunza, chikumanya kuwa weye ni mnt'hu ukulonga kweli muhala, wala hukumuogoha mnt'hu yoyote. Wala ukulu wa mnt'hu, mbali ukuifunza kweli ya Mulungu. Vino, ikufaya kuliha kodi kwa Kaisali? Chilihe egu chisekuliha?"

15 Mbali Yesu akamanya utapitapi wawe na akawalongela, "Vino hangi mkunigeza? Nink'heni iyo salafu niilole."

16 Wakamgalila salafu. Yesu akawauza, "Vino, sula ino na zina dino daniyani?" Wakamulongela, "Ya Kaisali."

17 Ivo, akawalongela, "Va Kaisali mwink'heni Kaisali na va Mulungu mwink'heni Mulungu."

Yesu akawakangawaza nk'hani.

18 Kamala Masadukayo, want'hu wala wakulonga habule kubwela kuna ugima wakamwitila Yesu na wakamuuza, 19 "Mfunza, Musa kachilagiliza vino, Ikawa mnt'hu akadanganika na kuleka mke, mbali abule mwana, ndungu wa mwanamulume adanganike akulondigwa amsole ila mgane ili amuelekele ndugu yake wana." 20 Kukala na ndugu saba. Ndugu wa mwanduso akamsola mke, nae akadanganika bila kweleka mwana. 21 Ndugu wa kaidi akamsola ila mgane awe mkake, nae akadanganika bila kweleka mwana, na ndungu wa katatu naye vilavila. 22 Ivo wose saba wakadanganika bila kuleka mwana. Kamala na ila mama mgane nae kadanganika. 23 Vino siku ya kubwela muugima, naawe mke wa niyani? Kwa vila wose saba wakala wamsola mke iyo.

24 Yesu akawalongela, "Mweye mukuhasanya kwa vila hamuyamanyile maandiko ya Mulungu wala nguvu za Mulungu. 25 Want'hu wakabwela kuna ugima, seke wasole mke egu kusoligwa na mulume, mbali na wawe gesa wasank'hani wa kuulanga kwa Mulungu. 26 Kwa mbuli ya kubwela muugima, vino hamsomile chitabu cha Malagilizo ya Musa mbuli ya chisaka kikalile chikwaka moto? Mulungu ivo alongile na Musa, Nie ni Mulungu wa Ibulahimu na Mulungu wa Isaka na Mulungu wa Yakobo. 27 Yeye ni Mulungu wawagima, mbali sio Mulungu wawadanganike. Ivo mweye muhasanya nk'hani!"

28 Imwenga wa wafunza Malagilizo akaingila hant'hu hala, ivo aonile Yesu akulonga goya ivo akalile akulonga na Masadukayo, akumuuza Yesu, "Ni lagilizo dili kulu kuhuma yose?" 29 Yesu akalonga, "Tegelezeni mweye want'hu wa Izilaeli! Lagilizo kulu dino, Mndewa Mulungu wetu ndo Mndewa wa udumwenga. 30 Mbwede Mndewa Mulungu wako kwa moyo wako wose na Muhe wako wose na kwa umanyi wako wose na kwa nguvu zako zose. 31 Lagilizo kulu dakaidi ni dino ‘Mbwede miyago gesa vila ukuibweda weye.’ Habule Malagilizo yamwenga kuhuma yano."

32 Iyo mfunza Malagilizo akamulongela Yesu, "Mfunza, kulonga goya, kweli Mulungu ni imwe na habule imwenga kuhuma yeye. 33 Mbwede Mulungu kwa moyo wako wose na kwa umanyi wose na kwa nguvu zako zose na kumbweda miyago gesa vila ukuibweda weye. Malagilizo yano yakufaya kuhuma kulava nt'hambiko za kulunguza na sadaka."

34 Yesu ivo aonile ila mnt'hu kalonga goya, akamulongela, "Weye uhaguhi na kuingila mu Umwene wa Mulungu."

Ivo yafosile hayo habule mnt'hu yoyote agezile kumuuza Yesu mbuli yoyote.

35 Chipindi Yesu akalile akufunza hai Kaya ya Mulungu, akauza, "Hangi wafunza Malagilizo wakulonga kuwa Kilisito ni Mwana wa Daudi?" 36 Muhe wa Mulungu kakala kamulongoza Daudi, nae akalonga,

"Mndewa akamulongela ‘Mndewa wangu,

kala ubanzi wangu wa kulume,

hadi niwahume wanongwa wako.’ 37 Daudi mwenyewe akumtanga Kilisito Mndewa. Ivo, ikuwaze Kilisito awe mwana wa Daudi?"

Want'hu wengi wakala wakumtegeleza Yesu kwa denk'ho.

38 Yesu akawafunza akawalongela, "Inegeni na wafunza Malagilizo kwa vila ao wakubweda kugenda wavala nk'hanzu nt'hali na kulamswa kwa heshima mmagulilo. 39 Wakubweda kukala mvisumbi va halongozi muna zikaya za kufikanila Wayahudi na wakusagula kukala halongozi muna zishelehe. 40 Ao wakusola vint'hu va wagane kwa nguvu kuno wakuitenda wakulomba nk'hani. Mbali siku ya ulamuzi nawalamulwe."

41 Yesu ivo akalile haguhi na chia cha kulavila sadaka chikalile hai Kaya ya Mulungu. Akawaona want'hu wengi wakulava hela na kuziguma muna chia cha kuikila sadaka. Na want'hu matajili wengi wakalava hela nyingi. 42 Kamala akeza mama mgane mchiwa nae akaguma semti mbili. 43 Ahoaho Yesu akawatanga wanahina wake, akawalongela, "Kweli huwalongelani mgane ino mchiwa, kaika hela nyingi muna chiya cha kuikila sadaka kuhuma wamwenga wose wagumile. 44 Kwa vila wamwenga wose walava hela zongezekele kulawa muutajili wawe, mbali ino mama mgane na uchiwa wake kalava ingama."