Yesu akuwenk’ha ndiya want’hu elufu nne
1 Mui siku izo, uyama mkulu wa want’hu wakafikana kaidi hamwenga na wakala wabule ndiya. Yesu akawatanga wanahina wake, akalonga, 2 "Huwaonela ubazi want’hu wano kwa vila wakala na nie kwa siku nt’hatu wabule ndiya. 3 Nikawaleka waite ukaya kuno wana nzala wakudaha kuzehuka mui nzila kwa vila wamwenga wakulawa kutali."
4 Wanahina wake wakamuuza, "Hano haichiwala nachipatehi ndia ya kuwenk’ha want’hu wose wano?"
5 Yesu akawauza, "Muna migate mingahi?"
Wakamulongela, "Saba."
6 Ivo, Yesu akawalongela want’hu wakale hasi. Akaisola ila migate saba, akamshukulu Mulungu, akaimegula ila migate na akawenk’ha wanahina wake wawenk’he wala want’hu nao wakawenk’ha. 7 Vilavila wakala na somba wadodo. Yesu akamshukulu Mulungu kamala akawalongela wanahina wake wawenk’he want’hu ivila. 8 Want’hu wakadya na kwiguta. Kamala wanahina wake wakadondola vibenzu visigale va migate na kumemeza visege saba. 9 Want’hu wadile na kwiguta wakala gesa elufu nne. Kamala ndo Yesu akawalaga want’hu waite kumwawe, 10 ahoaho Yesu hamwenga na wanahina wake wakakwela mdidalu na kwita kuna dibululu dya Dalumanuta.
Matayo 12:38,42; 16:1,4