Yesu akumuhonya mbwanga mwenye kinyamkela
14 Yesu hamwenga na wanahina wake watatu ivo wafikile kwa wanahina wamwenga, wauona uyama mkulu wa want’hu. Na wafunza Malagilizo wamwenga wakala waupinzana nao. 15 Ahoaho ula uyama mkulu wa want’hu wose ivo umuonile Yesu ukakangawala nk’hani, wakamwitila na kumulamsa. 16 Yesu akawauza wanahina wake, "Mkuipinza nao mbwani ao?" 17 Mnt’hu imwe muna ula uyama wa want’hu akamulongela Yesu, "Mfunza, nimgala mwanangu kumwako ana kinyamkela kikumtenda apotwe kulonga. 18 Na ino kinyamkela akammukila akumlagaza hasi na akulawa lovu mumlomo na kuno akugegeda meno na kugagadala mtufi wose. Niwalomba wanahina wako wamlave ino kinyamkela mbali wapotwa."
19 Yesu akawalongela, "Mweye ueleko mbule utogozi! Nanikale na mweye hadi lini? Naniwafinyilize hadi lini? Nigalileni iyo mbwanga kumwangu!" 20 Wakamgala ila mwana kwa Yesu. Ahoaho ila kinyamkela ivo amuone Yesu, akammukila ila mwana na akapata utamu wa kifutu na akagwa hasi na akuiyuga kuno akulawa lovu mmulomo. 21 Yesu akamuuza tati yake ila mwana, "Mbuli zino zimwandusa lini?" Tata wa ila mbwanga akamulongela, "Kwandusila udodo wake, 22 ulo kwa ulo kakala akumgwisa hasi muna umoto egu mmazi ili amkome. Ivo, chikukulomba ikadahika uchionele ubazi na uchitaze!"
23 Yesu akamulongela, "Eti ikadahika! Mbuli zose zikudahika kwa mnt’hu akutogola." 24 Aho, tati yake ila mbwanga akalila kwa izi nk’hulu, "Hutogola mbali utogozi wangu mdodo, nitaze nitogole." 25 Yesu ivo aonile uyama wa want’hu ukuongezekela halongozi yake, akambwakila ila kinyamkela, akamulongela, "Weye kinyamkela ukumtenda mwana ino asekudaha kulonga wala kuhulika, hukulongela mulawe mbwanga ino usekumwingila kaidi!" 26 Kinyamkela akatoa mazange akamulagaza ila mbwanga hasi kamala akamulawa. Mbwanga ila akaoneka gesa kadanganika, ivo want’hu wamwenga wakalonga, "Kadanganika." 27 Mbali Yesu akamtoza mkono ila mbwanga akamwinula, nae akatimalala.
28 Yesu ivo aingile mgati mui kaya, wanahina wake wakamuuza aho wakalile wadumwe, "Hangi cheye chipotwa kumulava kinyamkela ila?" 29 Yesu akawalongela, "Habule nzila imwenga ya kumulava kinyamkela gesa ila mbali ni kwa kulomba."
Matayo 17:22,23; Luka 9:43,45