Yesu akuoneka muna ukulu wake
2 Ivo zifosile siku sita, Yesu akawasola Petulo na Yakobo hamwenga na Yohana, akakwela nao kuchanya kudigamba tali, uko wakala wadumwenga. Yesu akabiduka sula halongozi hao, 3 mwenda wake ukawa mzelu chwe! Habule mnt’hu yoyote mui isi akudaha kunyugunt’ha na kuutenda wele gesa ivo. 4 Kamala wanahina watatu wakawaona mulotezi Elia na mulotezi Musa wakulonga na Yesu. 5 Petulo akamulongela Yesu, "Mfunza, idamana cheye kukala hano. Ivo, ikufaya chizenge viheha vitatu, kimwe chako na kimwe cha Musa na kimwenga cha Eliya." 6 Petulo na wayage wakala wamemwa na woga, ndo mana hamanyile alongeki. 7 Kamala dikalawila wingu dikawagubika na wakahulika izi ya Mulungu mdiwingu idyo, ikalonga, "Ino ndo mwanangu humbweda, mtegelezeni." 8 Ahoaho wanahina wakalola banzi zose, mbali hawamuonile mnt’hu imwenga, mbali Yesu adumwe hamwenga nao. 9 Ivo wakalile wakutelemka mdigamba, Yesu akawalemesa akawalongela "Msekumulongela mnt’hu yoyote mbuli wazionile, hadi nie Mwana wa Mnt’hu nize kubwela muugima."
10 Ivo, wakatenda vila walagilizwe, mbali wakauzana wao kwa wao wakalonga, "Kubwela muugima ndo mbwani?" 11 Wakamuuza Yesu, wakalonga, "Mbona wafunza Malagilizo wakulonga ikulondigwa mulotezi Elia amulongolele Yesu?" 12 Yesu akawalongela, "Ena, Elia naanduse kwiza na kuika goya mbuli zose. Mbali hamwenga na ayo yose, hangi muna maandiko ya Mulungu yandikwa Mwana wa Mnt’hu naahenyeke na kuzeligwa? 13 Mbali huwalongeleni Elia keza kale, nao wakatenda yose wayalondile gesa vila iyandikwe kuhusu yeye."
Matayo 17:14-21; Luka 9:37-43