1 እስራኤልያ አሳቶ፥ ታን ህንተ ቦላ ዝላልያ ዝላሳ ስስተ!

2 "ወዶሮ እስራኤላታ ኩንዳዱ፤

ስም ላኤን ደንዱኩ።

ሳኣን ኦለታዱ፤

እዞ ደንያዌካ ባዋ!" ያጋድ።

3 ኡባ ሞድያ መና ጎዳይ ሀዋዳን ያጌ፤ "ሻኡ ኦላንቻቱዋ ኦላዉ የድያ እስራኤልያ ካታማዉ ጼቱ ኦላንቻቱዋ ጻላላይ አታና፤ ጼቱ ኦላንቻቱዋ ኦላዉ የድያ እስራኤልያ ካታማዉ ቃይ ታሙ ኦላንቻቱዋ ጻላላይ አታና" ያጌ።

4 መና ጎዳይ እስራኤልያ አሳዉ ሀዋዳን ያጌ፤ "ታና ኮይተ፤ ያቶፐ፥ ህንተ ደኡዋን ደአና። 5 ሽን ቤቴለ ኮዮፕተ። ገልጋላ ገሎፕተ። በርሳበሄ ፕኖፕተ። አያዉ ጎፐ፥ ገልጋል ኦሞደታና፤ ቤቴልካ ያና" ያጌ።

6 መና ጎዳ ኮይተ፤ ያቶፐ፥ ህንተ ደኡዋን ደአና። ሄዌ ዮፐ፥ እ ዮሴፎ ዛርያ ታማዳን ጹጋና፤ ቤቴለን ደእያ አሳካ ታማይ ማና። ሄ ታማ ኡንቱንቶ ኦንነ ቶይሰና።

7 ህንተኖ፥ ሱረ ፕርዳ ጌላዬዳዋንቶ፥ ጽሎተካ ሳኣን ኦልያዋንቶ፥ ሀዋ ስስተ።

8 ፕልያድሳ ጌተትያ ላፑን ጾልንተቱዋነ ኦርዮና ጌተትያ ጾልንተቱዋ ጭታ መዳዌ፥✝ ባራ ማ ዎንታዉ፥ ጋላሳ ፖኡዋካ ቃማዉ ላምያዌነ አባን ደእያ ሃቱዋ ፑደ ሳሉዋ ጼሲደ፥ ሳኣ ምጨ ቦላ ዱገ ትግያዌ፥ አዉ ሱንይ መና ጎዳ። 9 እ ጌሶቱዋ ላላናዉ ዎልቃማቱዋ ቦላ ባሻ አዬ።

10 ህንተ ፕርዳ ጉታራን ሴርያዋ እጺታ፤ ቱሙዋ ኦድያዋካ ሸነቲታ። 11 ህንተ ህዬሳቱዋ የደ፥ ኡንቱንቱ ካካ ኡንቱንቱፐ ቦንቂደ አኬድታ። ያቲደ ማሰቴዳ ሹቻን ጎለቱዋ ግምቤድታ፤ ሽን ህንተ ሄ ጎለቱዋን ደእክታ። ሎእያ ዎይንያ ቱራቱዋካ ቶኬድታ፤ ሽን ህንተ ሄ ዎይንያ ኤሳ ኡሽክታ። 12 አያዉ ጎፐ፥ ህንተ ናቁ አፑነንቶነ ህንተ ናጋራይካ አይ ኬሻ ዎልቃመንቶ ታን ኤራይ። ህንተ ጽሎቱዋ ናቂታ፤ ማታይያካ አኪታ፤ ቃይ ጉታራን ህዬሳቱዋ ፕርዳ ጌላዪታ። 13 ሄዋ ድራዉ፥ ሀዋ ማላ ዎድያን ጭንጫ አሳይ ጮኡ ጌ፤ አያዉ ጎፐ፥ ዎዲ ኢታ።

14 ደኡዋን ደአናዉ ሎኦባፐ አትና፥ ኢታባ ኦፕተ፤ ያቶፐ፥ ህንተ ግያዋዳን፥ መና ጎዳይ፥ ኡባፐ ዎልቃማ መና ጎዳይ ህንተናና ግዳናዋ። 15 ኢታባ እጽተ። ሎኦባ ዶስተ። ፕርዳ ጉታራንካ ሱረ ፕርዳ ፕርድተ። ያቶፐ፥ ኦን ኤሪ፥ ጾሳይ፥ ኡባፐ ዎልቃማ ጾሳይ ዮሴፎ ዘረቱዋፐ አቴዳ አማሬዳዋንቶ ቃረታነንቶነ።

16 ሄዋ ድራዉ፥ ጎዳይ፥ ኡባፐ ዎልቃማ መና ጎዳይ ሀዋዳን ያጌ፤ "ዳባባ ኡባን ዋሱ ከሳና፤ ኦገ ኡባንካ አሳይ፥ ‘አየ፥ አየ!’ ጋና። ጎሻንቻቱ ዬኮ፥ ዝላልያዋንቱካ ዝላሳዉ ጼሰታና። 17 ዎይንያ ቱራ ሳ ኡባን ዬኩ ደአና፤ አያዉ ጎፐ፥ ታን ህንተና ሙራናዉ ህንተ ግዶና አና" ያጌ መና ጎዳይ።

18 ህንተኖ፥ መና ጎዳ ጋላሳይ ያናዳን አሞትያዋንቶ፥ ህንተንቶ አየ አና! መና ጎዳ ጋላሳ አያዉ አሞቲቴ? ሄ ጋላሳይ ማፐ አትና፥ ፖኦ ጋላሳ ግደና። 19 ሄ ጋላስ ህንተ ጋሙዋፐ ባቃት አትያ ዎደ፥ ማሂ ጋከትያ አሳ ማላ፥ ሄዋፐካ ቃይ ባቃት ባረ ጎለ ገሊደ፥ ባረ ኩሽያ ጎዳን ዘምፕስያ ዎደ፥ ሾሻይ ዱክያ አሳ ማላ ግዳናዋ። 20 መና ጎዳ ጋላሳይ ማፐ አትና፥ ፖኦ ግደና፤ ባራ ማፐ አትና፥ ፖኦ ሾራይ ሙለካ ባዋ!

21 ጾሳይ ሀዋዳን ያጌ፤ "ታን ህንተ ቦንችያ ባላቱዋ እጻድነ ሸነታድ፤ ህንተ ጌሻ ሺቁካ ታና ናሸችክኖ።✝ 22 ህንተ ታዉ ጹግያ ያርሹዋነ ካ ያርሹዋካ ያርሺታ፤ ሽን ታን ሄዋ አክከ። ቃይ ህንተ ታዉ ጋላታዉ አህያ እትፐተ ያርሹዋ ሞ መሄቱዋካ ጼልከ። 23 ህንተ ማዝሙርያ ጫንጨ ታ ማታፐ ሃስተ፤ ህንተ ዲጽያ ዲካ ስስከ። 24 ሽን ሱረ ፕርዳይ ፑልቶ ሃዳን፥ ጽሎተይካ ቶኤና ሻፋ ሃዳን ጎጎ።

25 "ህንተኖ፥ እስራኤልያ አሳቶ፥ ታን ህንተና ባዙዋን ኦይታሙ ላይ ካለያ ዎደ፥ ታዉ ያርሹዋ ያርሼድቴ? ዎይ እሞታ እሜድቴ?✝ 26 ሄ ዎደ ህንተ ህንተ ኩሽያን መዳ ካትያ ሳኩታ ግያ ኤቃነ ኬዋና ግያ ህንተ ጾልንትያ ጾሳ ኤቃ ቶኬድታ። 27 ሄዋ ድራዉ፥ ታን ህንተና ኦሞድሳደ ዳማስቆ ካታማፐ አደ ሃኮ ሳ የዳና" ያጌ። ሀዋ ግያዌ አዉ ሱንይ ኡባፐ ዎልቃማ ጾሳ ጌተትያ መና ጎዳቴ።