Cânticos 7

ዎዳላይ:

1 ካትያ ናትዳን ሎእያኔ!

ነ ገደቱ ኔን ናጻላ ጫማ ዎ ደእሽን በእያ ዎደ፥

አያ ሎኢኖ! ነ ሼቺ ኤራንቻ ዎጋጪ ቆጺደ፥

ሎይ አሌቂሴዳ እንቁዋ ማላቴ።

2 ነ ጉልአይ ዎይንያ ኤሳይ ኩሜዳ ብርልያ ማላቴ፤

ነ ጼሳ ዩሹ ጪሻን ቃሸቴዳ ዛርጋ ምርቂያ ማላቴ።

3 ነ ንቱ ማንትያ የለቴዳ፥ ገንአት ማራቱዋ ማላቲኖ።

4 ነ ቆ ዳንጋርሳ ዛልያን አሌቀቴዳ አዱሳ ግምቢያ ማላ።

ነ አይፊ ዎልቃማ ሀሰቦና ካታማ ፐንግያ ማታን ደእያ፥

ዜሩዋ ሃ ማላቴ።

ነ ሲ ዳማስቆ ጼልሲደ ግምቤዳ ሊባኖሳ ግምቢያ ማላቴ።

5 ነ ሁጲ ቃርመሎሳ አሳ ማላቴ፤

ነ ኦላሳ ብናናይ ቃጭና ጻ ማላቴ፤

ካትያካ ነ ሁጲያ ዳይ ናሸቼዳ።

6 ታ ሲቃቴ፥ ነ አያ ሎአይ! ነ አያ ማላንቻቲ!

ነ ሲቁ ታና አያ ናሸቺ!

ታንነ ኔንነ ጻላላይ

7 ነ ጌሳይ ዛምባ ጌሳ ማላቴ።

ነ ንይ ዛምባ አይፍያ ዉርጩዋ ማላቴ።

8 ታን፥ ሀ ዛምባ ግአና፤ አ ማራቱዋ ኦይቃና ያጋድ።

ነ ንይ ዎይንያ ቴራ ዉርጩዋ ማላ፤

ቃይ ነ ሲያና ከስያ ፔኑ አፕልያ አይፍያዳን ሳዌ።

9 ነ የሩ መተርሻቱዋፐነ አቻፐ ግዱዋና፥

ዋላላቲደ ገልያ ዎይንያ ማላ፥

ወዶራታ:

ኡባፐ አደ ማልእያ

ዎይንያ ኤሳ ማላ ያጌዳ።

10 ታን ታ አልኦ ሲቁዋኖ፤ እካ ታና አሞቴ።

11 ታ ሲቆዉ፥ ሃያ፤ ላኡ ካታማፐ ከሲደ ቢደ፥

ጋጻርያን አቆይተ፤ ቃማ ላኡ ሄዋን አና።

12 ዎንታ ጉራን አነ ዎይንያ ቱራ ግዶ ቦይተ፤

ዎይንያ ቱራይ ጪሼደንቶ፥ ጪሺደ አይፍያ ዶርጾጼደንቶነ፥

ቃይ ሮማኒካ አይፌደንቶ አነ በኦይተ።

ታን ታ ሲቁዋ ኔና ሄዋን በሳና።

13 እንኮይያ አይፍያ ሳዉነ ሀራ ናሸችያ አታክልትያ አይፊ፥

ኑ ካረን በሴዳ፤ ታ ሲቆ!

ሀ አይፈቱዋፐ ቴሬዳዋንታነ ኦራ ማጼዳዋንታ፥

ነዉ አሻ ዎድ።