1 የሱስ ይሁዳ ጋድያን ቤተሌመ ጌተትያ ካታማን ሄሮድሰ ካዉቲደ ደእያ ዎደ የለቴዳ፤ ሄዋፐ ጉይያን፥ ጾልንትያ ፓይድያ አሳይ* አዋይፊ ዶልያ ባጋፐ የሩሳላመ ዪደ፥ 2 "አይሁዳ ካትያ ግዳናዉ የለቴዳ ናአይ ሀቃን ደኢ? ኑን አዋይፊ ዶልያ ባጋና ከሴዳ አ ጾልንትያ በኢደ፥ አዉ ጎይናናዉ ዬዶ" ያጊደ ኦቼድኖ።

3 ካትያ ሄሮድሰ፥ ሄዋ ስሲደ ዳጋሜዳ፤ የሩሳላመን ደእያ አሳይ ኡባይካ ዎዛና ባዬድኖ። 4 ሄሮድሰ ቄሳቱዋ ካፓቱዋ ኡባቱዋነ ሙሴ ህግያ ታማርስያዋንታ ጼሲደ፥ "ክርስቶስ ሀቃን የለታንዴሻ?" ያጊደ ኦቼዳ።

5,6 ኡንቱንቱ ዛሪደ፥ "ይሁዳ ጋድያን ቤተሌመ ካታማን የለታናዋ። ናቢ፥

" ‘ይሁዳ ጋድያን ደእያ ቤተሌመ፥

ኔን ይሁዳ ጋድያን ደእያ ዎልቃማ ካታማቱዋፐ ላፋካ።

እስራኤልያ ሞድያዌ ኔፐ ከሳናዋ’

ጊደ ጻፌዳ" ያጌድኖ።✝

7 ሄዋፐ ካላ፥ ሄሮድሰ አዋይፊ ዶልያ ባጋፐ ዬዳ አሳቱዋ ጌማን ጼሲደ፥ ጾልንቲ ኡንቱንቶ ቤቴዳ ዎድያ ኡንቱንቱፐ ጌሺደ ኤሬዳ። 8 ያቲደ ቤተሌመ ኡንቱንታ የዲደ፥ "ቢደ ናኣ ሎይ ኮይተ፤ አ ደሜዳ ዎደ ታንካ ባደ አዉ ጎይናናዳን፥ ታናካ ኤርስተ" ያጌዳ።

9 ኡንቱንቱ ካቲ ጌዳዋ ስስ ቢደ ኦግያን አዋይፊ ዶልያ ባጋና ኡንቱንቱ ካሰ በኤዳ ጾልንትያ በኤድኖ፤ ናአይ ደኢያሳ ጋኪደ ኤቃና ጋካናዉ፥ ጾልንቲ ኡንቱንታ ካለዳ። 10 ኡንቱንቱ ሄ ጾልንትያ በኤዳ ዎደ፥ ዛዋይ ባይና ዳሮ ናሸቻ ናሸቴድኖ። 11 ጎለ ገሊደ፥ ናአይ ባረ ዳይ ማይራምና ደእያዋ በኤድኖ፤ ጉልባቲደ አዉ ጎይኔድኖ፤ ሄዋፐ ካላ፥ ባረንቱ ሳጽንያ ዶዪደ፥ ዎርቃ፥ እጻናነ ካዋራ* አዉ እሞታ ሺሼድኖ።

12 ኡንቱንቱ ሄሮድሳኮ ስመና ማላ፥ ጾሳይ አኩሙዋን ኡንቱንታ፥ "ህንተና ኤርተ" ጊና ሀራ ኦግያና ባረንቱ ጋደ ስሜድኖ።

13 ኡንቱንቱ ቤዳዋፐ ጉይያን፥ ጎዳ ኪታንቻይ አኩሙዋን ዮሴፎ ቤቲደ፥ "ሄሮድሰ ናኣ ዎናዉ ኮይያ ድራዉ፥ ደንዳደ ናኣነ አ ዳዮ አካደ ግብጼ ጋድያ በታ፤ ታን ነዉ ኦዳና ጋካናዉ፥ ያን ደአሻ" ያጌዳ።

14,15 ዮሴፎ ቃማ ደንዲደ፥ ናኣነ አ ዳዮ አኪደ፥ ግብጼ ጋድያ ቤዳ፤ ጎዳይ ናብያ ባጋና፥ "ታን ታ ናኣ ግብጼ ጋድያፐ ጼሳድ" ያጌዳዌ ፖለታና ማላ፥ ሄሮድሰ ሀይቃና ጋካናዉ እ ያን ደኤዳ።✝

16 ሄዋፐ ጉይያን፥ ሄሮድሰ አዋይፊ ዶልያ ባጋፐ ዬዳዋንቱ ባረና ጭሜዳዋ ኤሬዳ ዎደ፥ ዳሮ ሀንቀቲደ፥ ጾልንቲ ካሰ ቤቴዳ ዎድያ ኡንቱንቱፐ ስሴዳዋዳን፥ ዎታዳራቱዋ የዲደ፥ ቤተሌመንነ ዩሹዋን ደእያ ላኡ ላይ አቱማ ናናነ ላኡ ላይፐ ጋርሳና ደእያ አቱማ ናና ኡባ ዎሴዳ።

17,18 ናብያ ኤርማስ፥

"ዬኩነ ዝላሳይ ራማ ጌተትያ ካታማን ስሰቴዳ፤

ራሄላ ባረ ናናዉ ዬካዉ።

ኡንቱንቱ ሀይቂድጎ ድራዉ፥

አጋ ጊና፥ አገናን እጻዱ"

ጊደ ኦዴዳዌ ፖለቴዳ።✝

19 ሄሮድሰ ሀይቄዳዋፐ ጉይያን፥ ጎዳ ኪታንቻይ ግብጼን ዮሴፎ አኩሙዋን ቤቲደ 20 አ፥ "ደንዳ፤ ናኣነ አ ዳዮ አካደ፥ እስራኤልያ ጋድያ ስማ። ናኣ ዎናዉ ኮይያዋንቱ ሀይቂ ድጌድኖ" ያጌዳ። 21 ዮሴፎ ደንዲደ፥ ናኣነ አ ዳዮ አኪደ፥ እስራኤልያ ስሜዳ።

22 ሽን ዮሴፎ አርከላዎስ ባረ አዉዋ ሄሮድሳ ኦይድያን ይሁዳ ጋድያን ካዉቴዳዋ ስሴዳ ዎደ፥ ያ ባናዉ ያዬዳ፤ ጾሳይ አዉ አኩሙዋን ህንተና ኤርተ ጊና፥ ጋሊላ ጋድያ ቤዳ። 23 ናባቱ፥ "አሳይ አ፥ ‘ናዝሬትያ አሳ’* ጊደ ጼሳና" ያጌዳዌ ፖለታና ማላ፥ ናዝሬተ ጌተትያ ካታማ ቢደ ደኤዳ።✝