1 ሀካልያ ናኣ ናህምያ ቃላይ ሀዋ። አርጸክስስ ፓርሰ ቢታን ካዉቶደፐ ላታማን ላይን፥ ክስሌዋ ጌተትያ አግናን፥ ታን ናህሚ ዋና ካታማ ግዴዳ ሱሳን ደአይ። 2 ታ እሻቱዋፐ እቱ፥ ሀናና ጎሳይ ሀራ አሳቱዋና እትፐ ግዲደ፥ ይሁዳፐ ታኮ ዬዳ፤ ታን ኦሞዱዋ ብቤናዋንቱባነ የሩሳላመባ ኡንቱንታ ኦቻድ። 3 ኡንቱንቱ ዛሪደ፥ "ኦሞዱዋን ብቤናዋንቱነ ደኡዋን ደእያዋንቱ ዎልቃማ መቱዋንነ ዬላ ግዶን ደኢኖ። የሩሳላመ ግምቢያ ድርሳይ ኮለቴዳ፤ ቃይ ግምቢያ ድርሳ ፐንገቱካ ታማን ጹገቴድኖ" ያጌድኖ።

4 ታን ሀዋ ኡባ ስሴዳ ዎደ ኡታደ ዬካድ። ዳሮ ጋላሳ ካዮታ ጾማደ፥ ሳሉዋ ጾሳ፥ ሀዋዳን ያጋደ ዎሳድ፤ 5 "መና ጎዳዉ፥ ሳሉዋ ጾሳዉ፥ ዎልቃማዉነ ቦንቼቴዳ ጾሳዉ፥ ዶስያዋንቶነ ነ አዛዙዋ ናግያዋንቶ ነ አገና ሲቁዋ ጫቁዋ ናግያ ጾሳዉ፥ 6 ታን ነ ቆማይ ቃይ ነ ቆማቱዋ ግዴዳ እስራኤልያ አሳ ድራዉ ቃማነ ጋላስ ኔና ዎስያ ዎሳ ነ ሀይይ ስሶ፤ ነ አይፊካ ዱገ ታኮ ጼሎ። ኑን እስራኤልያ አሳይ ኦዳ ናጋራ ኡባ ነዉ ፓጻይ፤ ቱሙካ ታንነ ታ ማይዛ አዎቱ ኔና ናቄዶ። 7 ኑን ነ ቦላን ሎይ ኢታ ናጋራ ኦዶ፤ ኔን ነ ቆማ ሙሴ ባጋና ኑ እሜዳ አዛዙዋ፥ ዎጋነ ህግያ ናግበይኮ። 8 ነ ቆማ ሙሴዉ ኔን ሀዋዳን ያጋደ ኦዴዳ ቃላ ሀያና ቆፓ፤ ‘ህንተኖ፥ እስራኤልያ አሳቶ፥ ህንተንቱ ታዉ አማነተናን እጾፐ፥ ታን ህንተንታ አይሁዳ ግደና ቢታቱዋን ላላና።✝ 9 ሽን ህንተንቱ ታኮ ስሚደ፥ ታ አዛዙዋ ናጎፐ፥ ህንተንቱ ሀራይ አቶ ሳኣ ጋጻ ጋካናዉ ላለትንቶካ፥ ታን ህንተንቱ ታዉ ጎይናና ማላ፥ ታን ታ ሱንዉ ዶሬዳ ሳአዉ ዛራደ ሺሻና’ ጌዳዋ ቆፓ።✝

10 "ሀዋንቱ ኔን ነ ዎልቃማ ዎልቃንነ ነ ምኖ ቀስያን ዎዛ አኬዳ ነ ቆማቱዋነ ነ አሳቱዋ። 11 አቤት መታ ጎዳዉ፥ ታን ነ ቆማይ ዎስያ ዎሳነ ኔና ቦንቻናዉ ዶስያ፥ ነ ቆማቱዋ ዎሳ ነ ሀይይ ስሶ። ታን ነ ቆማይ ሀቼ ኦናዉ ኮዬዳባይ ታዉ ኡሸቻናዳን፥ ካትያ ዎዛና ሹግሳደ ታና ማዳ" ያጋድ።

ታን ሄ ዎደ ካትያዉ ኤሳ ትግያዋ።