1 ሳሜላ 26

ዳዊተ ሳኦላ ሸምፑዋ ላኤንካ አሼዳ

1 ዚፋ አሳቱ ሳኦላኮ ግብኣ ካታማ ቢደ፥ "ዳዊተ ያሰሞና ስንን ደእያ ሀኪላ ግያ ደርያን ቆሰት ኡቴዳ ግደኔ?" ያጌድኖ።✝26:1 ማዝ. 54 (ሁጲያ) 2 ሄዋፐ ጉየ ሳኦል ደንዲደ፥ እስራኤላቱዋፐ ዶረቴዳ ሄዙ ሻአ አሳቱዋ አኪደ፥ ዳዊታ ኮያናዉ ዚፋ ባዙዋ ቤዳ። 3 ሳኦል ያሰሞና ስንን ደእያ ሀኪላ ደርያ ቦላ ኦግያ ጋጻን ዱንካኔዳ፤ ሽን ዳዊተ ሄ ዎራን ኡቴዳ። ሳኦል አ ካሊደ ያ ቤዳዋ ኤሪደ፥ 4 ጌድያዋንታ የዲደ፥ ሳኦል ቱሙካ ሄ ሳኣ ጋኬዳዋ ጌሼዳ። 5 ዳዊተ ደንዲደ፥ ሳኦል ዱንካኔዳ ሳኣ ቤዳ፤ ሳኦልነ ኦላ ጋዳዋይ ኔራ ናኣ አባኔር ግሴዳ ሳኣ በኤዳ። ሳኦል ጌሱዋ ግዶን ግሴዳ፤ ኦላንቻቱ አ ዩሹዋን ደኢኖ።

6 ዳዊተ ሂትያ አብመሌካነ ጻሩያ ናኣ ዮኣባ እሻ አብሻያ፥ "ሳኦል ሺቄዳ ሳኣ ታናና ባናዌ ኦኔ?" ያጊደ ኦቼዳ።

ሽን አብሻይ፥ "ታን ኔናና ባና" ያጌዳ።

7 ሄዋ ድራዉ፥ ዳዊተነ አብሻይ ሄ ጋላሳ ቃማ ኦላንቻቱዋኮ ይያ ዎደ፥ ሳኦል ባረ ቶራ ሁጲሳና ቢታን ኤሲደ፥ ጌሱዋ ግዶን ግሴዳዋ ደሜድኖ። አባኔርነ ኦላንቻቱ አ ዩይ አደ ግሴድኖ።

8 አብሻይ ዳዊታ፥ "ጾሳይ ነ ሞርክያ ሀቼ ነ ኩሽያን አ እሜዳ፤ ታን ታ ቶራን አ እት ገደ ቢታና ጋደ ስካይ፤ ታን አ ላኡ ጌደ ጫዳናዉ ኮሸና" ያጌዳ።

9 ሽን ዳዊተ አብሻያ፥ "ኔን አ ዎፓ፤ መና ጎዳይ ኦኬዳ ካትያ ቦላ ባረ ኩሽያ ደንያ ኦናነ ጾሳይ ሙራና" ያጌዳ። 10 ቃይካ እ አብሻያ፥ "መና ጎዳይ ኤሮ! መና ጎዳይ አ ሾጫናዋ ታን ኤራይ፤ ባረ ጋላሳይ ጋክና እ ሀይቃና፥ ዎይ ኦለታናዉ ቢደ እ ያና። 11 መና ጎዳይ ኦኬዳ ካትያ ቦላ ታን ኩሽያ ደንናዳን ታና መና ጎዳይ ተኦ። አነ አ ሁጲሳን ደእያ ቶራነ ሃ ኦቱዋ አካደ ደንዳ" ያጌዳ።✝26:11 1 ሳሜላ 24:6

12 ሄዋፐ ጉየ ዳዊተ ሳኦላ ሁጲሳን ደእያ ቶራነ ሃ ኦቱዋ አኬዳ፤ ኡንቱንቱ ቤድኖ። ሽን ኡንቱንታ ኦንነ በእቤና፥ ዎይ ኦንነ ኤርቤና፥ ዎይ ኦንነ ቤጎትቤና፤ መና ጎዳይ ዎልቃማ ገምእሹዋ ኡንቱንቱ ቦላ የጌዳ ድራዉ፥ ኡባቱካ ገምእሹዋ ታይሮቴድኖ።

13 ዳዊተ ሄፍን ፕኒደ፥ ሀራ ደርያ ሁጲያን ኡንደና ሳኣን ሃኪደ ኤቄዳ። 14 ዳዊተ ሳኦላ ኦላንቻቱዋነ ኔራ ናኣ አባኔራ፥ "አባኔራ! አባኔራ! ታን ጼስያዋ ስስኪ?" ያጊደ ዋሴዳ።

አባኔር፥ "ሀ ጼሲደ ካትያ ገምእሹዋ ድግያዌ ኦኔ?" ያጌዳ።

15 ሄዋፐ ጉየ ዳዊተ፥ "ኔን ዎዛናማ አሳ ግድኪየ? እስራኤልያ ግዶን ነ ማል ኦን ደኢ? ያትና፥ ካትያ ነ ጎዳ አያዉ ናግኪ? አያዉ ጎፐ፥ እት አሳይ ካትያ ነ ጎዳ ዎናዉ ያ ቤዳ። 16 ኔን ኦዳባይ ሎአ ግደና። መና ጎዳይ ኤሮ! ኔንነ ነ ኦላንቻቱ መና ጎዳይ ኦኬዳ ህንተንቱ ጎዳ ናግቤና ድራዉ፥ ኡንቱንቱ ሀይቃናዉ በሰ። ካትያ ቶራነ አ ሁጲሳን ደእያ ሃ ኦቱዋ በአይ?" ያጌዳ።

17 ሳኦል ዳዊታ ቃላ ግድያዋ ኤሪደ፥ "ታ ናአዉ ዳዊታ፥ ሄዌ ነ ቃሌ?" ያጌዳ።

ዳዊተ፥ "ኤ፤ ታ ጎዳዉ፥ ካትያዉ፥ ሄዌ ታ ቃላ" ያጌዳ። 18 ቃይካ እ ሳኦላ፥ "ታ ጎዳዉ፥ ታና ነ ቆማ ኔን አያዉ ካላይ? ታን አይ ኦድታ? ታን አይ ባይዛድታ? 19 ሀእካ ታ ጎዳዉ፥ ካትያዉ፥ ኔን ታ ቃላ፥ ነ ቆማ ቃላ ስሳናዳን ታን ኔና ዎሳይ፤ መና ጎዳይ ኔና ታ ቦላ ደንዳዋ ግዶፐ፥ ያርሹዋ እ አኮ፤ ሽን አሳቱ ኔና ደንዳዋ ግዶፐ፥ ኡንቱንቱ መና ጎዳ ስንን ሸቀቴዳዋንታ ግድኖ! አያዉ ጎፐ፥ ‘ባረ፤ ሀራ ጾሳቶ ጎይና’ ያጊደ፥ መና ጎዳ ቢታን ታዉ ደእያ ኤጻፐ ኡንቱንቱ ታና ሀእ ከሴድኖ። 20 ሀእ ስም መና ጎዳ ስንፐ ሃኪደ ደእያ ቢታን ታ ሱ ጉሶፓ፤ እት አሳይ አካ ሻንካታናዉ ደርያ ሁጲያ ከስያዋዳን፥ እስራኤልያ ካቲ እት ካቶልያ ኮያናዉ ከሴዳ" ያጌዳ።

21 ሳኦል ዳዊታ፥ "ታን ናጋራ ኦድ። ታ ናአዉ ዳዊታ፥ ሃ ስማ! ሀቼ ቃማ ኔን ታና ሀይቁዋፐ አሼዳ ድራዉ፥ ታን ኔና ላኤን ገንከ። ቱሙፐ ታን ኤያባ ሀናድ፤ ዎልቃማ ባላ ባላድ" ያጌዳ።

22 ዳዊተ፥ "ካትያዉ፥ ነ ቶራይ ሀዌሽ፤ ነ አሳቱዋፐ እት አሳይ ዪደ አኮ። 23 አሳይ ሁጲያን ሁጲያን ጽሌዳባዉነ አማነቴዳባዉ መና ጎዳይ አ ጋትያ ጭጌ። ኔና መና ጎዳይ ሀቼ ታ ኩሽያን አደ እሜዳ፤ ሽን መና ጎዳይ ኦኬዳ ካትያ ቦላ ታን ታ ኩሽያ ደንናዉ ዶሳበይከ። 24 ታን ቱሙ ሀቼ ኔና አሾዋዳን መና ጎዳይ ታናካ አሾ፤ ቃይ መቱዋ ኡባፐ ታና ዎ አኮ" ያጌዳ።

25 ሳኦል፥ "ታ ናአዉ ዳዊታ፥ ኔን አንጀታ። ኔን ግታባ ኦና፤ ኔን ቱሙፐ ጾናና" ያጌዳ። ዳዊተ ባረ ኦግያ ቤዳ፤ ሳኦለካ ባረ ሶ ስሜዳ።