1 ሳሜላ 21

ዳዊተ ሳኦላፐ ባቃቴዳ

1 ዳዊተ ቄስያ አብመሌካኮ ኖባ ካታማ ቤዳ፤ አብመሌክ ዳዊታና ጋከታናዉ ኮኮሪደ ዪደ፥ "ኔን አያዉ ኔረካ ደአይ? አያዉ ሀራ አሳይ ኔናና ደኤኔ?" ያጊደ ኦቼዳ።✝21:1-6 ማቶሳ 12:3-4፤ ማር. 2:25-26፤ ሉቃሳ 6:3

2 ሽን ዳዊተ ቄስያ አብመሌካ፥ "ካቲ ታና፥ ‘ታን ኔና ኪቴዳ የዉዋነ አዛዜዳ አዛዙዋ ኦንነ ኤሮፖ’ ያጊደ ታና እትባ አዛዜዳ። ታ አሳቱ እት ሳኣን ታናና ጋከታናዳን ኦዳድ። 3 ሀእ ነ ኩሽያን አያይ ደኢ? እቼሹ ባሸ ኡክ ዎይ ደኤዳዋ አያነ ታዉ እማርኪ" ያጌዳ።

4 ሄዋፐ ጉየ ቄሲ ዳዊታ፥ "አሳይ ኡባይ ምያ ኡክይ ታዉ ባዋ፤ ሽን ጌሻ ኡክይ ደኤ፤ ሄ አሳቱ ባረና ማጫ አሳፐ ናጌዳዋ ግዶፐ፥ ኡንቱንቱ ማናዉ ዳንዳዪኖ" ያጌዳ።

5 ሄዋፐ ጉየ ዳዊተ ቄስያ፥ "ቱማ ኑን ሀ ኪታው ከሶ ሳፐ ዶሚደ፥ ማጫ አሳፐ ናገቴዶ፤ ሀራይ አቶ ጌሻ ግደና ኪታ ዎደካ ኡንቱንቱ አሳተይ ጌሻ፤ ሀቼ ኡባ አደ ጌያናዉ ኮሸኔ!" ያጌዳ። 6 ሄዋ ድራዉ፥ ቄሲ ዳዊታዉ ጌሻ ኡክ እሜዳ፤ አያዉ ጎፐ፥ ቄስያዉ ደእያዌ ሆእያ ኡክ አ ሳኣን ዎናዉ መና ጎዳ ስንፐ ደንዳ ጌሻ ኡክ ጻላላ።✝21:6 ዎጋ 24:5-9

7 ሳኦላ ቆማቱዋፐ እት ብታኒ ሄ ጋላሳ መና ጎዳ ስንን ናጊደ ደኤ፤ አ ሱንይ ዶይቃ፤ እ ኤዶማ ቢታ አሳ፤ ሳኦላ መህያ ሄምያዋንቶ እ ካፑዋ።

8 ዳዊተ አብመሌካ፥ "ቶራይ ዎይ ማሻይ ነዉ ደአንዴሻ? ካትያ ኪታይ ኤሌልሶ ድራዉ፥ ታን ታ ማሻ ዎይ ሀራ ኦላ ሚሻ አሀበይከ" ያጊደ ኦቼዳ።

9 ሽን አብመሌክ፥ "ኔን ኤላ ዛንጋራን ዎዳ ፕልስጼምያ ጎልያዳ ማሻይ ሀዋን ደኤ፤ ጩርቃን እ ጻጸቲደ፥ ኤፉድያ ጌተትያ ማዩዋፐ ጉየ ባጋና ደኤ። ኔን ኮይያዋ ግዶፐ አ አካ፤ አፐ አትና፥ ሀራ ማሻይ ሀዋን ባዋ" ያጊደ ዛሬዳ።

ሄዋፐ ጉየ ዳዊተ፥ "ሄዋ ማላ ሀራ ማሻይ ባዋ፤ አ ታዉ ሀማ" ያጌዳ።✝21:9 1 ሳሜላ 17:51

10 ሄ ጋላስ ዳዊተ ደንዲደ፥ ሳኦላፐ ባቃቲደ፥ ጋተ ካታማ ካትያ አኪሻኮ ቤዳ። 11 ሽን አኪሻ ኦሳንቻቱ፥ "ሀዌ ዳዊተ ባረ ቢታን ካትያ ግደኔየ? ቃይ ማጫ አሳቱ የጺድነ ዱሪደ፥ ‘ሳኦል ሻኣ ዎዳ፤ ዳዊተ ታሙ ሻኣ ዎዳ’ ያጊደ ሳቤዳ ብታንያ ግደኔየ?" ያጌድኖ።✝21:11 1 ሳሜላ 18:7፤ 29:5

12 ዳዊተ ኡንቱንቱ ሃሳያ ባረ ዎዛናን ኦይቂደ፥ ጋተ ካትያ አኪሻ ሎይ ያዬዳ።✝21:12 ማዝ. 56 (ሁጲያ) 13 ሄዋ ድራዉ፥ ዳዊተ ኡንቱንቱ ስንን ዎዛናይ ቦሸቴዳ አሳ ማላቴዳ፤ ኡንቱንቱ አ ኦይቃና ሀንያ ዎደ፥ ጎይያዋዳን ካረ ፐንግያ እፍ ቃጨረነ ቡቻና ዱገ ዛሪደ ሳሱዋ ሎካዬ።✝21:13 ማዝ. 34 (ሁጲያ) 14 አኪሽ ባረ ኦሳንቻቶ፥ "በእተ፤ ሀዌ ብታኒ ጎዬ። ህንተንቱ አያዉ አ ታኮ አሄድቴ? 15 ሀ ብታኒ ታ ስንን ጎያናዳን ህንተንቱ አሄዳዌ፥ ታ ማታን ሀራይ ጎይያዌ ይነየ? ሀ ብታኒ ታ ሶ ገላናዉ በሲየ?" ያጌዳ።