1 ሳሜላ 22

ቄሳቱ ዋ ዎድኖ

1 ዳዊተ ጋተ ካታማፐ ባቃቲደ፥ አዱላማ ካታማ ማታን ደእያ ጎንጎሉዋ ቤዳ፤ አ እሻቱዋነ አ አዉዋ ሶ አሳይ ኡባይ ሄዋ ስሴዳ ዎደ፥ ኡንቱንቱ ያ ዱገ አኮ ዎድኖ።✝22:1 ማዝ. 57 (ሁጲያ)፤ ማዝ. 142 (ሁጲያ) 2 መቶቴዳዋንቱ፥ ዎይ አጩዋን ገሌዳዋንቱ፥ ዎይ ሳአይ ኢቴዳዋንቱ ኡባቱ ዳዊታኮ ሺቄድኖ፤ እ ኡንቱንቶ ካፑዋ ግዴዳ። እት ኦይዱ ጼቱዋ ግድያ አሳይ አናና ደኤ።

3 ዳዊተ ሄ ሳፐ ደንዲደ፥ ሞኣበን ደእያ ምጽጳ ቤዳ፤ ሞኣበ ካትያ፥ "ጾሳይ ታዉ ኦናባ ታን ኤራና ጋካናዉ ታ አቶነ ታ አዉዋ ነ ማታን ዎሳርኪ" ያጊደ ዎሴዳ። 4 ሄዋ ድራዉ፥ ዳዊተ ኡንቱንታ ሞኣበ ካትያ ማታን ዎዳ፤ ጌሱዋ ግዶን ዳዊተ ቆሰት ኡቴዳ ዎደ ኡባን ኡንቱንቱ ካትያ ማታን ደኤድኖ።

5 ሄዋፐ ጉይያን፥ ትምቢትያ ኦድያ ጋድ ዳዊታኮ ዪደ፥ "ጌሱዋ ግዶን ጋምኦፓ፤ ሀ ሳፐ ደንዳደ ይሁዳ ጋድያ ባ" ያጌዳ፤ ዳዊተ ሄ ሳፐ ሄረታ ዎራ ቤዳ።

6 ዳዊተነ አ አሳይ ቤቴዳዋ ሳኦል ስሴዳ፤ ሳኦል ግብኣ ካታማ ማታን ደእያ ደርያን፥ ታማርስካ ጌተትያ ም ጋርሳን ቶራ ኦይቂደ ኡቴዳ፤ አ ኦሳንቻቱ አ ዶዲደ ኤቄድኖ። 7 ሳኦል ኡንቱንታ፥ "ህንተንቶ፥ ቢንያማ አሳቶ፥ ስስተ! እሰያ ናአይ ጎሻነ ዎይንያ ቶክያ ሳኣ ህንተንቱ ኡባዉ እማኔ? ሻላቃቱዋነ ጼቱዋ ካፓቱዋ ኦደ ህንተንታ ሱንኔ? 8 ህንተንቱ ኡባይ ታ ቦላ ማቀቴድታ፤ ታ ናአይ እሰያ ናኣና ቃላ ጫቁዋ ጫቀቴዳዋ ኦንነ ታዉ ኦድቤና። ህንተፐ እት አሳይነ ታዉ ቃረተና፤ ሀቼዋዳንካ ታ ናአይ ታ ቆማ ታና ዎሳናዉ ደንዳዋ ኦንነ ታዉ ኦድቤና" ያጌዳ።

9 ሳኦላ ኦሳንቻቱዋና ኤቄዳ ኤዶምያ ዶይቅ ሳኦላ፥ "እሰያ ናአይ አህጹባ ናኣ አብመሌካኮ ኖባ ካታማ ቤዳዋ ታን በኣድ።✝22:9-10 1 ሳሜላ 21:7-9፤ ማዝ. 52 (ሁጲያ) 10 አብመሌክ ዳዊተ ኦናባ መና ጎዳ ኦቼዳ፤ ያቲደ ዳዊታዉ ሽንቃ እሜዳ፤ ቃይ ፕልስጼምያ ጎልያዳ ማሻካ አዉ እሜዳ" ያጌዳ።

11 ሄዋፐ ጉይያን፥ አህጹባ ናኣ ቄስያ አብመሌካነ ኖባ ካታማን ቄሳቱዋ ግዲደ ደእያ አ አዉዋ ሶ አሳ ኡባ ካቲ ጼስስና፥ ኡንቱንቱ ካትያኮ ዬድኖ። 12 ሳኦል አብመሌካ፥ "አህጹባ ናአዉ፥ ስሳ" ያጌዳ።

አብመሌክ፥ "ኤሮ ታ ጎዳዉ" ያጌዳ።

13 ሳኦል አ፥ "ኔንነ እሰያ ናአይ ታ ቦላ አያዉ ማቀቴድተ? ኔን አዉ ኡክነ ማሻ እማደ፥ እ ታና ዎናዉ ደንዳና ማላ፥ አዉ ጾሳ አያዉ ኦቻዲ?" ያጌዳ።

14 አብመሌክ ካትያ፥ "ነ ቆማቱዋ ኡባ ግዱዋን ዳዊተዳን አማነትያዌ፥ ካትያና ቦሎቴዳዌ፥ ኔና ናግያዋንታ አዛዝያዌነ ነ ሶ አሳ ግዶን ሎይ ቦንቼትያዌ ሀራይ ኦኔ? 15 ታን አዉ ጾሳ ኦችሽን፥ ሀዌ ታዉ ኮይሮ? ግደና! ካትያዉ፥ ታና ነ ቆማ ዎይ ታ አዉዋ ሶ አሳ ኡባ አይነ ሞቶፓ፤ አያዉ ጎፐ፥ ታን ነ ቆማይ ሀ የዉዋ ጉ ግድና ዎልቃማ ግድናካ ሙለ ኤርከ" ያጌዳ።

16 ካቲ፥ "አብመሌካ፥ ኔንነ ነ አዉዋ ጎልያ አሳይ ኡባይ ሀይቃና" ያጌዳ። 17 ሄዋፐ ጉይያን፥ ሳኦል ባረ ማታን ኤቂደ ናግያዋንታ፥ "መና ጎዳ ቄሳቱ ዋ ዎተ፤ አያዉ ጎፐ፥ ኡንቱንቱካ ዳዊታ ማዴድኖ፤ ዳዊተ ባቃቴዳዋ ኤሪደ፥ ታዉ ኦድበይክኖ" ያጌዳ። ሽን ካትያ ኦሳንቻቱ መና ጎዳ ቄሳቱዋ ቦላ ባረንቱ ኩሽያ ዎናን እጼድኖ።

18 ያትና ካቲ ዶይቃ፥ "ቄሳቱ ዋ ኔን ዎ" ያጊደ አዛዜዳ። ኤዶምያ ዶይቅ ቄሳቱ ዋ ሾጬዳ፤ ሄ ጋላስ ኤፉድያ ማዬዳ ሆስፑን ታማነ እቼሹ ቄሳቱ ዋ እ ዎዳ። 19 ሄዋ ቦላካ ቄሳቱዋ ካታማ፥ ኖባ ቃራ ማሻን ቡሳኬዳ፤ ሄ ካታማን ደእያ አቱማዋ፥ ማጫዋ፥ ናና፥ ቄር ናና፥ መሄቱዋ፥ ሀረቱዋነ ዶርሳቱዋ ቃራ ማሻን ዶይቅ ሱፑ ኦዳ።

20 ሽን አህጹባ ናኣ አብመሌካ ናናቱዋፐ አብያታራ ጌተትያ እት ናአይ ከስ አኪደ፥ ዳዊታኮ ባቃቴዳ። 21 ሳኦል መና ጎዳ ቄሳቱ ዋ ዎዳዋ ዳዊታዉ ኦዴዳ። 22 ዳዊተ አብያታራ፥ "ኤዶምያ ዶይቅ ሄ ሳኣን ደእያዋ ታን በኤዳ ዎደ፥ እ ሳኦላዉ ኦዳናዋ ሄ ጋላስ ኤራድ። ነ አዉዋ ሶ አሳ ኡባ ሀይቆ ኦሸትያዌ ታና። 23 ስም ኔን ታናና ደአ፤ ያዮፓ። ኔና ዎናዉ ኮይያ ኡራይ ታና ዎናዉ ኮይያዋ፤ ሽን ኔን ታ ማታን ሳሮ ደአና" ያጌዳ።