ሳኦላነ ኤንዶረ ሻሬቻቶ
1 ሄ ዎደ ፕልስጼማ አሳቱ እስራኤላቱዋ ኦላናዉ ባረንቱ ኦላንቻቱዋ ሺሼድኖ። አኪሽ ዳዊታ፥ "ኔንነ ነ አሳቱ ታናና ኦላ ባናዋ ቱሙ ኤራ ኡታ" ያጌዳ።
2 ዳዊተ፥ "ሄዋ ግዶፐ፥ ታን ነ ቆማይ ኦናባ ኔን በአና" ያጌዳ።
አኪሽ፥ "ዳሮ ሎአ፤ ታን ኔና ታ ደኤዳ ላይ ኡባን ታና ናግያዋ ከሳና" ያጌዳ።
3 ሀዋፐ ካሰ ባጋን ሳመል ሀይቂና፥ እስራኤልያ አሳቱ ኡባቱ አዉ ዬኪደ፥ አ ካታማን ራማን አ ሞጌድኖ። ሳኦል ሞይትልያ ጼስያዋንታነ ሻሬቻቱዋ እስራኤልያ ቢታፐ የደርሲደ ከስ ድጌዳ።28:3 ዎጋ 20:27፤ ዛረ. 18:10-11፤ 1 ሳሜላ 25:1
4 ፕልስጼማ ኦላንቻቱ ሺቂደ ዪደ፥ ሹኔማ ካታማን ኡቴድኖ፤ ሳኦለካ እስራኤልያ አሳ ኡባ ሺሺደ፥ ግልቦአ ደርያን ኡቴዳ። 5 ሳኦል ፕልስጼማ ኦላንቻቱዋ በኢደ ያዬዳ፤ አ ዎዛናይካ ሎይ ዳጋሜዳ። 6 ሄዋ ድራዉ፥ እ አይ ኦነንቶነ መና ጎዳ ኦቼዳ፤ ሽን መና ጎዳይ አኩሙዋን ግዲና፥ ዎይ ኡሪምያን ግዲና፥ ዎይ ትምቢትያ ኦድያዋንቱ ባጋና ግዲና፥ አዉ ኦድቤና።28:6 ፓይ. 27:21 7 ሄዋፐ ጉይያን፥ ሳኦል ባረ ቆማቱዋ፥ "ሞይትልያ ጼስያ ሻሬቻቱዋ ታዉ ኮይተ፤ ታን ኢኮ ባደ እዞ ኦቻና" ያጊደ አዛዜዳ።
ሳኦላ ቆማቱ፥ "ሞይትልያ ጼስያ እት ሻሬቻታ ኤንዶረን ደአዉ" ያጌድኖ።
8 ሳኦል ባረና ኤርሰና ማላ ሀራ ማዩዋ ማዪደ፥ ላኡ አሳቱዋ አኪደ፥ ቃማ ሄ ሻሬቻትኮ ቤዳ፤ ምሽራቶ፥ "ሀያና ታዉ እት ሞይትልያ ጼሳርኪ፤ ታን ሱን ኦድያ አሳ ታዉ ደንርኪ" ያጌዳ።
9 ሄዋፐ ጉየ ምሽራታ፥ "ሞይትልያ ጼስያዋንታነ ሻሬቻቱዋ እስራኤልያ ቢታፐ ሳኦል ዎት የደርስ ከሴደንቶ፥ ቱማ ኔን ኤራሳ። ታና ዎሳናዉ ኔን ታዉ አያዉ ጲርያ የጋይ?" ያጋዱ።
10 ሳኦል ምሽራቶ፥ "መና ጎዳይ ኤሮ! ኔን ሀዋ ድራዉ ሙሬታካ" ያጊደ መና ጎዳን ጫቄዳ።
11 ያትና፥ ምሽራታ፥ "ታን ነዉ ኦና ደን?" ያጋደ ኦቻዱ።
ሳኦል፥ "ሳመላ ታዉ ደን" ያጌዳ።
12 ሻሬቻታ ሳመላ በኣደ፥ ዋሱዋ ጹላዱ፤ ሳኦላ፥ "ኔን ታና አያዉ ጭማድ? ኔን ሳኦላ ግድኪ!" ያጋዱ።
13 ካቲ፥ "አይነ ባዋ፤ ያዮፓ! ነዉ አዬ ቤትያዌ?" ያጌዳ።
ምሽራታ፥ "እት ሞይትሊ ቢታ ግዶፐ ከስያዌ ቤቴ" ያጋዱ።
14 ሳኦል ምሽራቶ፥ "እ አይ ማላቲ?" ያጌዳ።
ምሽራታ፥ "አፍላ ማዬዳ እት ጭማ ብታኒ ከሴዳ" ያጋዱ።
ሳኦል ሄ ብታኒ ሳመላ ግዴዳዋ ኤሪደ፥ አ ስንን ሳኣን ግሲደ ጉፋኔዳ።
15 ሳመል ሳኦላ፥ "ታና ዱፉዋፐ ደንደ አያዉ ሻባራይ?" ያጌዳ።
ሄዋፐ ጉየ ሳኦል፥ "ታን ዳሮፐ ኡንኤታድ፤ አያዉ ጎፐ፥ ፕልስጼማ አሳቱ ታና ኦሊኖ፤ ጾሳይካ ታፐ ሻከቴዳ፤ ትምቢትያ ኦድያዋንቱ ባጋና ግዲና ዎይ አኩሙዋን ግድና፥ እ ታን ኦችያዋ ኦደና። ሄዋ ድራዉ፥ ታን ኦናባ ኔን ታዉ ኦዳናዳን ኔና ጼሳድ" ያጌዳ።
16 ሳመል፥ "መና ጎዳይ ሻከቲደ ነ ሞርክያ ግድክቾዋፐ አትና፥ ታና አያዉ ዞረታ በሳይ? 17 መና ጎዳይ ታ ባጋና ካሰት ኦዴዳዋ ኦ ክቼዳ፤ መና ጎዳይ ካዉተ ኔፐ ቦንቂ አኪደ፥ ነ ሾሮ ዳዊታዉ እም ድጌዳ።28:17 1 ሳሜላ 15:28 18 ኔን መና ጎዳዉ አዛዘታቤና ድራዉነ አ ሀንቁዋ ሱልያዋ አማሌቃ አሳቱዋ ቦላ ፖላቤና ድራዉ፥ መና ጎዳይ ሀቼ ሀ የዉዋ ነ ቦላ ኦ።28:18 1 ሳሜላ 15:3-9 19 ኔናነ እስራኤልያ፥ መና ጎዳይ ፕልስጼማ አሳቶ አ እማና፤ ኔንነ ነ ናናይ ዎንት ታናን ጋከታናዉ፤ መና ጎዳይ እስራኤልያ ኦላንቻቱዋ ፕልስጼማ አሳቶ አ እማና" ያጌዳ።
20 ሳኦል ሳመላ ኦዱዋ ስሲደ ያዬዳ ድራዉ፥ ኤለካ ቢታን ዶልጩ ጊደ ኩንድ አጌዳ። ሳኦል ሄ ጋላሳ ኩመንነ ቃማ ኩመን ቁማ ምቤና ድራዉ፥ አ ዎልቃይ እጼዳ። 21 ሄ ምሽራታ ሳኦላኮ ያደ፥ እ ሎይ ኮኮርያዋ በኣደ፥ "ታን ነ ቆማታ ነዉ አዛዘታድ፤ ኔን ታና ኦቼዳዋ ታ ሸምፑዋ አጋደ ኦድ። 22 ሀእ ታን ነ ቆማታ ግያዋ ሀያና ስሳ፤ ኔን ማደ፥ ምናደ ነ ኦግያ ባና ማላ፥ ታን ነዉ ጉ ቁማ አይ" ያጋዱ።
23 ሄዋፐ ጉየ ሳኦል፥ "ሚከ" ያጊደ እጼዳ። ሽን አ አሳቱ ሄ ምሽራትናካ ግዲደ ሾቤድኖ፤ ሳኦል ሾበቲደ ቢታፐ ደንዲደ፥ ግሱዋን ኡቴዳ። 24 ሄ ምሽራታ ኤለካ ባረ ሶን ደእያ ቦልትቦልታ ማራ ሹካ ባሻዱ፤ ልያ አካ ሙናቃደ፥ እርሹዋ የገናን ኡክ ኡካዱ። 25 ያታደ ሳኦላዉነ አ አሳቶ አና፥ ኡንቱንቱ ሜድኖ። ሄ ጋላስ ቃማ ደንዲደ ቤድኖ።