1 ሳሜላ 7

1 ቂርያት-ይኣሪማ አሳቱ ዪደ፥ መና ጎዳ ታቦታ አፊደ ደርያ ሁጲያን ደእያ አብናዳባ ሶይ አሄድኖ። መና ጎዳ ታቦታ ናጋናዳን፥ አብናዳባ ናኣ ኤልኣዛራ ዱማዪደ ሱንድኖ።✝7:1 2 ሳሜላ 6:2-4፤ 1 ኦዱዋ 13:5-7

ሳመል እስራኤልያ አሳ ቦላ ዳናቴዳ

2 ታቦታይ ቂርያት-ይኣሪማን ዳሮ ዎድያ ጋምኤዳ፤ ሄዌነ፥ ላታሙ ላይ ኬሻ ግድያዋ። እስራኤልያ አሳይ ኡባይ ካዮቲደ፥ መና ጎዳኮ ዋሴድኖ።

3 ሳመል እስራኤልያ አሳዉ ኡባዉ፥ "ኩመን ዎዛናፐ ህንተንቱ መና ጎዳኮ ስሞፐ፥ አላጋ ጾሳቱዋነ አስታሮታ ግያ ጾሳ ህንተንቱ ግዶፐ ድግተ፤ ህንተንቱ ሁጲያ መና ጎዳዉ ሼተ፤ አ ጻላላዉ ኪተትተ፤ ያቶፐ፥ እ ህንተንታ ፕልስጼማቱዋ ኩሽያፐ አሻናዋ" ያጊደ ሃሳዬዳ። 4 ሄዋ ድራዉ፥ እስራኤልያ አሳቱ ባኣላነ አስታሮታ ባረንቱ ግዶፐ ድጊደ፥ መና ጎዳ ጻላላዉ ጎይኔድኖ።

5 ሄዋፐ ጉይያን፥ ሳመል እስራኤላቱዋ፥ "ኡባይካ ምጽጳ ሺቅተ፤ ታን ህንተንቶ ያን መና ጎዳ ጋናታና" ያጌዳ። 6 ኡንቱንቱ ምጽጳ ሺቂደ ሃ ዱቂደ፥ መና ጎዳ ስንን ትጌድኖ፤ ሄ ጋላስ ኡንቱንቱ ጾሚደ ሄ ሳኣን፥ "ኑን መና ጎዳ ቦላ ናጋራ ኦዶ" ያጊደ ፓጼድኖ። ምጽጳን ሳመል እስራኤልያ አሳ ቦላ ዳናቴዳ።

7 እስራኤላቱ ምጽጳን ሺቄዳዋ ፕልስጼማ አሳቱ ስሴዳ ዎደ፥ ኡንቱንቱ ካፓቱ እስራኤላቱዋ ኦላናዉ ፑደ ከሴድኖ። እስራኤላቱ ሄዋ ስሲደ፥ ፕልስጼማቶ ያዬድኖ። 8 እስራኤላቱ ሳመላ፥ "እ ፕልስጼማ አሳ ኩሽያፐ ኑና አሻና ማላ፥ ኔን ኑዉ መና ጎዳኮ፥ ኑ ጾሳኮ፥ ዎስያዋ አጎፓ" ያጌድኖ። 9 ሳመል እት ምያ ዶርሳ ማራ አኪደ፥ አሹዋ ዉርስ ጹግያ ያርሹዋዳን መና ጎዳዉ ያርሺደ እስራኤላቱ ድራዉ መና ጎዳዉ ዎስና መና ጎዳይ አዉ ስሴዳ።

10 ሳመል ጹግያ ያርሹዋ ያርሽያ ዎደ፥ ፕልስጼማቱ እስራኤላቱዋና ኦለታናዉ ሺቄድኖ። ሽን ሄ ጋላስ ፕልስጼማቱዋ ቦላ መና ጎዳይ ዎልቃማ ጉጉን ጉንደ ዳጋንና፥ ኡንቱንቱ እስራኤላቱ ስንፐ ባቃቴድኖ። 11 እስራኤላቱ ምጽጳፐ ዎጽ ከሲደ፥ ፕልስጼማቱዋ የደርሲደ፥ ቤትካራፐ ጋርሳ ጋካናዉ ኦግያን ዎድኖ።

12 ሄዋፐ ጉይያን፥ ሳመል እት ሹቻ አኪደ፥ ምጽጳፐነ ሼናፐ ግዱዋን ኤሲደ፥ "መና ጎዳይ ሀእ ጋካናዉ ኑና ማዴዳ" ያጊደ ሄ ሳኣ ኤበንኤዜራ ሱንዳ።*7:12 ኤበንኤዜራ፦ ሀ ሱን ብለይ "ማድያ ሹቻ" ግያዋ። 13 ፕልስጼማ አሳቱካ ጾነቴድኖ፤ ኡንቱንቱ እስራኤልያ ጋድያ ቦላ ላኤንዋ ዎራጅበይክኖ። ሳመል ደኤዳ ላይ ኡባን መና ጎዳ ኩሺ ፕልስጼማ አሳ ቦላ ዎልቃሜዳ። 14 ፕልስጼማ አሳቱ ኤቅሮናፐ ጋተ ጋካናዉ እስራኤላቱዋፐ ኦሞዴዳ ካታማቱ እስራኤላቶ ስሜድኖ፤ እስራኤላቱካ ባረንቱ ካሰ ዛዋ ፕልስጼማ አሳቱዋ ኩሽያፐ ዎ አኬድኖ። ቃይ እስራኤልያ አሳይነ አሞረ አሳይ ሳሮ ደኤዳ።

15 ሳመል ባረ ደኡዋ ላይ ኡባን እስራኤልያ ቦላን ዳናቴዳ። 16 ሳመል ላይን ላይን ቤቴለ፥ ገልገላነ ምጽጳ እ ዩይያ ሳአቱዋ ኡባን እስራኤልያ ቦላን ዳናቴ። 17 አ ጎሊ ራማን ደእያ ድራዉ፥ ያ ስሚደ ሄ ሳኣን እስራኤልያ ቦላን ዳናቴ። እ ሄ ሳኣን መና ጎዳዉ ያርሽያ ሳኣ ኪተቴዳ።