1 ሳሜላ 10

1 ሄ ዎደ ሳመል ትግያባና ዛይትያ አኪደ፥ ሳኦላ ሁጲያን ትጊደ ሳኦላ የሪደ፥ ሀዋዳን ያጌዳ፤ "ባረ አሳ እስራኤልያ ሞዳና ማላ መና ጎዳይ ኔና ኦኬዳ ግደኔ? ኔን አ አሳ ካለደ፥ ኡንቱንቱ ዩሹዋን ደእያ ሞርከቱዋ ኩሽያፐ ኡንቱንታ አሻና። አ አሳ ኔን ሞዳና ማላ፥ ጾሳይ ኔና ኦኬዳዎ ማላታይ ሀዋ። 2 ኔን ሀቼ ታፐ ሻከትያ ዎደ፥ ራሄል ዱፉዋ ማታን፥ ቢንያማ ዛዋን ደእያ ጸልጻሀ ግያ ሳኣን ላኡ አሳቱዋና ጋከታናሳ ኡንቱንቱ ኔና፥ ‘ኔን ኮሻ ቤዳ ሀረቱ ቤቴድኖ፤ ሀእ ነ አዉ ሀረቱዋ ቆፕያዋ አጊደ፥ "ታ ናአይ ዬዳ፤ ሽን ዋኖሻ?" ያጊደ ነባ ህርጌ’ ያጊደ ኦዳናዋ።

3 "ኔን ሄ ሳፐ ደንዳደ፥ ታቦራ ጌተትያ ዎልቃማ ም ጋካናዉ ባናሳ፤ ኔን ቢሽን፥ ጾሳኮ ቤቴለ ብያ ሄዙ አሳቱ ኔናና ጋከታናዋንታ። ኡንቱንቱፐ እቱ ሄዙ ዴሻ ማራቱዋ ቶኬዳ፤ ላኤን ሄዙ ኡክ ቶኬዳ፤ ሄዘን ኦጎሩዋ ኩሜዳ ዎይንያ ኤሳ ቶኬዳ። 4 ኡንቱንቱ ኔና ሳሮታና፤ ነዉ ላኡ ኡክ ኡንቱንቱ እማና፤ ኔን ኡንቱንቱ ኩሽያፐ ሄ ኡክ አካናሳ።

5 "ሄዋፐ ጉይያን፥ ኔን ፕልስጼማ ኦላንቻቱ ጭታይ ደእያ ጾሳ ግብኣ ግያ ካታማ ባና። ኔን ሄ ካታማ ጋክያ ዎደ፥ ዲና ካራቡዋና፥ ፑላልያናነ ማስንቁዋና ካኢድነ ትምቢትያ ኦዲደ፥ ጎይንያ ቃ ሳኣፐ ዱገ ዎያ ትምቢትያ ኦድያዋንቱ ጩጉዋና ጋከታናሳ፤ 6 መና ጎዳ አያናይ ነ ቦላ ዎልቃፐ ዎና ኔንካ ኡንቱንቱና ትምቢትያ ኦዳናሳ፤ ኔን ላመታደ ሀራ አሳ ግዳና። 7 ሀ ማላታቱ ፖለትያ ዎደ፥ ነ ኩሽያን ጋከቴዳባ አያነ ኦ፤ አያዉ ጎፐ፥ ጾሳይ ኔናና ደኤ።

8 "ኔን ታፐ ስንታደ ገልጋላ አ። ታንካ ቱሙፐ ጹግያ ያርሹዋነ ሳሮተ ያርሹዋ ያርሻናዉ ኔኮ ዱገ ባና። ታን ኔኮ ባደ ኔን ኦናባ ኦዳና ጋካናዉ፥ ላፑን ጋላሳ ጋምኣሳ" ያጌዳ።

9 ሳኦል ሳመላፐ ሻከትሽን፥ ጾሳይ ሳኦላ ዎዛና ላሜዳ፤ ቃይ ሄ ማላታቱ ኡባይ ሄ ጋላሳ ሀኔድኖ። 10 ሳኦልነ ቆማይ ግብኣ ጋክና፥ ትምቢትያ ኦድያዋንቱ ጩጉ አናና ጋከቴዳ፤ ጾሳ አያናይ አ ቦላ ዎልቃፐ ዎዳ፤ ኡንቱንቱ ግዶን ትምቢትያ ኦዴዳ። 11 ሳኦላ ካሰ ኤርያዋንቱ ኡባይ ትምቢትያ ኦድያዋንቱና ትምቢትያ ኦድያዋ በኢደ፥ እቱ እቱዋ፥ "ቂሳ ናአይ ዋን ክቼዴ? ቃይ ሳኦለካ ትምቢትያ ኦድያዋንቱ ዛቴየ?" ያጌድኖ። 12 ሄ ሳኣን ደእያ እት ብታኒ ኡንቱንቶ፥ "ኡንቱንቱ አዉ ኦኔ?" ያጊደ ዛሬዳ። ሄዋ ድራዉ፥ "ሳኦለካ ትምቢትያ ኦድያዋንቱ ዛቴየ?" ጉሳይ ቶሳ ግዴዳ።✝10:12 1 ሳሜላ 19:23-24 13 ሳኦል ትምቢትያ ኦድያዋ ዉርሴዳዋፐ ጉይያን፥ ጎይንያ ቃ ሳኣ ቤዳ።

14 ሳኦላ አዉዋ እሻይ ሳኦላነ ቆማ፥ "ሀቃ ቤድቴ?" ያጌዳ።

ሳኦል፥ "ሀረቱዋ ኮሻ ቤዶ፤ ሀረቱ ቤተናን ይና፥ ሳመላኮ ቤዶ" ያጌዳ።

15 ሳኦላ አዉዋ እሻይ፥ "ሀያና ሳመል ነዉ ጌዳዋ ታዉ ኦዳርኪ" ያጌዳ።

16 ሳኦል ባረ አዉዋ እሻዉ፥ "ሀረቱ ቤቴዳዋ ሳመል ኑዉ ጌሺደ ኦዴዳ" ያጌዳ፤ ሽን ሳመል፥ "ካትያ ግዳሳ" ጊደ አዉ ኦዴዳዋ ኦድቤና።

ሳኦል ካተቴዳዌ ቆንጭያን ኦደቴዳ

17 ሄዋፐ ጉይያን፥ ሳመል ምጽጳን እስራኤልያ አሳ መና ጎዳኮ ጼስ ሺሼዳ። 18 ኡንቱንታ፥ "መና ጎዳይ፥ እስራኤልያ ጾሳይ ሀዋዳን ያጌ፤ ‘ታን እስራኤልያ ግብጼፐ ከሳድ፤ ግብጼ አሳቱዋ ኩሽያፐነ ህንተንታ ናቂያ ካዉተቱ ኡባ ኩሽያፐ ታን አሻድ’ ያጌ። 19 ሽን ሀቼ ህንተንቱ መቱዋፐነ ዋይያፐ ኡባፐ ህንተንታ አሽያ ህንተንቱ ጾሳ እጼድታ፤ ቱይት! ‘ኑ ቦላ ካትያ ካተያ’ ያጌድታ። ሄዋ ድራዉ፥ ሀእ ህንተንቱ ህንተንቱ ዛርያንነ ህንተንቱ ያራን ግዲደ፥ መና ጎዳ ስን አተ" ያጌዳ።

20 ሄዎ ሳመል እስራኤልያ ዛርያ ኡባ አና፥ ሳማይ ቢንያማ ዛርያን ዎዳ። 21 ቢንያማ ዛርያ ያራን ያራን አና፥ ሳማይ ማጽራ ያራን ዎዳ፤ ዉርሰን ቂሳ ናአይ ሳኦል ዶረቴዳ። ኡንቱንቱ አ ኮዬድኖ፤ ሽን እ ቤትቤና። 22 ሄዋ ድራዉ ኡንቱንቱ መና ጎዳ፥ "ብሮ ሀ ሳኣ ያና አሳይ ደኢ?" ያጊደ ኦቼድኖ።

ሽን መና ጎዳይ፥ "ኤ! ሳኦል ሚሻ ግዱዋን ቆሰት ኡቴዳ" ያጌዳ።

23 ኡንቱንቱ ዎጽ ቢደ፥ ያፐ አ ከስ አሄድኖ። አሳ ግዶን እ ኤቂያ ዎደ፥ ሀሽያፐ ቆሞ ባጋን አሳ ኡባፐ አዱቄ። 24 ሳመል አሳ ኡባዉ፥ "መና ጎዳይ ዶሬዳ ብታንያ በኢቴ? ሀ አሳ ግዶን አ ማላትያባይ ኦንነ ቱሙ ባዋ" ያጌዳ።

ሄዋፐ ጉየ አሳይ ኡባይ ባረ ቃላ ቁ ኦደ፥ "ካትያ ሸምፑ ጋምኦ" ያጌዳ።

25 ሄዋፐ ጉይያን፥ ሳመል ካዉተ ዎጋ አሳዉ ኦዴዳ፤ ጻጸትያ ማጻፋን ሄ ዎጋ ጻፊደ፥ መና ጎዳይ ስንን ዎዳ። ሳመል አሳ ኡባ ሁጲያን ሁጲያን አ ሶ አ ሶ የዴዳ።

26 ሳኦለካ ባረ ሶ ግብኣ ቤዳ፤ ጾሳይ ኡንቱንቱ ዎዛና ቦቼዳ ምኖ አሳቱ ሳኦላና ቤድኖ። 27 ሽን እት እት ጬጮ አሳቱ፥ "ሀ ብታኒ ኑና ዋቲደ አሻኔ?" ያጌድኖ፤ ኡንቱንቱ አ ካደ፥ አዉ አይነ እሞታ እምበይክኖ። ሽን ሳኦል ጮኡ ጌዳ።