1 ሳሜላ 14

ዮናታን ፕልስጼማቱዋ ቦላ ዎራጄዳ

1 እት ጋላስ ሳኦላ ናአይ ዮናታን ባረ ኦላ ሚሻ ቶክያ ዎዳላ ሀዋዳን ያጌዳ፤ "ሃያ፤ ሄፍን ባጋን ደእያ ፕልስጼማቱ ሺቄዳ ሳኣ አነ ቦይተ" ያጌዳ። ሽን ባረ አዎ ሀ የዉዋ ኦድቤና።

2 ሄ ዎደ ሳኦል ግብኣ ማታን ምግሮናን፥ ሮማነ ጌተትያ ም ጋርሳን ደኤ። አናና ኡሱፑን ጼቱ አሳቱነ 3 ኤፉድያ ማዬዳ ቄሲ፥ አኪይ ደኢኖ። አኪይ እካቦዳ እሻነ አህጹባ ናኣ፤ አህጹብ ሴሎን መና ጎዳ ቄሰ ግዴዳ ኤላ ናአይ ፒንሃስ የሌዳዋ። ዮናታን ብ ክቼዳዋ አሳይ ኤርቤና።

4 ዮናታን ፕልስጼማቱ ሺቄዳ ሳኣ ጋካናዉ ፕናናዉ ቆፕያ ፕኑዋስ ላኡ ባጋናካ ጼራይ ጽንእ ጌዳ ዎልቃማ ዛላቱ ደኢኖ፤ እቱዋ ሱንይ ቦዴጻ፤ ላኤንዋ ሱንይ ሴና። 5 ዛላቱዋፐ እቱ ፕንያ ሳ ሁጲሳ ባጋና ምክማሳዉ ስንና ደእያ ዎደ፥ እቱ ቃይ ገድሳ ባጋና ገባአዉ ስንና ደኤ።

6 ዮናታን ባረ ኦላ ሚሻ ቶክያ ዎዳላ ሀዋዳን ያጌዳ፤ "ሃያ፤ ሀ ቃጻረትቤናዋንቱ ሺቄዳ ሳኣ አነ ሄፍን ቦይተ። ኦን ኤሪ፥ መና ጎዳይ ኑ ድራዉ ኦነንቶነ፤ መና ጎዳይ ዳሮ አሳን ግድና፥ ጉ አሳን ግድና፥ አሻናዋ አ ድግያባይ አያይነ ባዋ" ያጌዳ።

7 አ ኦላ ሚሻ ቶክያዌ፥ "ኔን ቆፔዳዋ ኡባ ኦ፤ ባ፤ ታ ኩመን ዎዛናፐ ታን ኔናና ደአይ" ያጌዳ።

8 ሄዋፐ ጉየ ዮናታን፥ "ያኖፐ ሃያ፤ ሄፍን አሳኮ ፕኒደ፥ አሳን በኤታና። 9 ኡንቱንቱ ኑና፥ ‘ኑን ህንተንቱኮ ባናዉ ሄዋን ናግተ’ ያጎፐ፥ ኑን ደእያ ሳኣን ታካናፐ አትና፥ ኡንቱንቱኮ ቦኮ። 10 ሽን ኡንቱንቱ፥ ‘ሃ ኑኮ ፑደ ከስተ ጎፐ፥ ኑን ፑደ ከሳና፤ አያዉ ጎፐ፥ ሄዌ መና ጎዳይ ኡንቱንታ ኑ ኩሽያን አደ እሜዳዎ ኑዉ ማላታ ግዳና’ " ያጌዳ።

11 ያትና፥ ላአቱካ ፕልስጼማቱዋ ጌሶቱዋ ባረንታ በሴድኖ። ፕልስጼማቱ፥ "በእተ! እብራዌቱ ባረንቱ ቆሰቴዳ ኦላፐ ዙሚደ ከሲኖ" ያጌድኖ። 12 ሄዋፐ አሳቱ ዮናታናነ ኦላ ሚሻ ቶክያዋ ጼጊደ፥ "ሃ ኑኮ ፑደ ከስተ፤ ኑን ህንተንታ በሳና" ያጌድኖ።

ሄዋ ድራዉ፥ ዮናታን ባረ ኦላ ሚሻ ቶክያዋ፥ "ታና ካላደ ሀ ፑደ ከሳ። መና ጎዳይ ኡንቱንታ እስራኤልያ ኩሽያን አደ እም ድጌዳ" ያጌዳ።

13 ዮናታን ባረ ኦላ ሚሻ ቶክያዋ ካለደ፥ ገድያንነ ኩሽያን ሀምቡሩጪደ ፑደ ከሴዳ። ፕልስጼማቱ ዮናታና ኩሽያን ኩንዴድኖ፤ አ ኦላ ሚሻ ቶክያዌ ካል ካሊደ ኡንቱንታ ዎዳ። 14 ሄ ኮይሮ ዎራጁዋን ዮናታንነ አ ኦላ ሚሻ ቶክያዌ እት ጎሻ ጋደን ላታሙ ግድያ አሳ ዎድኖ። 15 ሄዋፐ ጉይያን፥ ጋጻ ቢታን ደእያ ፕልስጼማ አሳቱ ዳጋሜድኖ፤ ቆፐናዋ ኦልያዋንቱነ ሄራን ደእያ ኦላንቻቱ ያሻዉ ኮኮሬድኖ። ቢታይካ ቃጼዳ፤ ሄዌነ፥ ጾሳፐ ኪተቴዳ ዳጋማ።

ፕልስጼማቱዋ ጾነቱሳ

16 ሳኦል ቢንያማ ቢታን፥ ግብአን ዎዳ ዎችያ አሳቱ ጼሊደ፥ ፕልስጼማ ኦላንቻቱ ያና ሃና ፕስክ ጊደ ላለትያዋንታ በኤድኖ። 17 ያትና፥ ሳኦል ባረናና ደእያ አሳቱዋ፥ "አነ ኦላንቻቱዋ ሺሽተ፤ ኑ ግዶፐ ኦን ቤድኖንቶ በእተ" ያጌዳ። ኡንቱንቱ ሺሺደ ፓይድያ ዎደ፥ ዮናታንነ አ ኦላ ሚሻ ቶክያዌ ባይናዋ ቤኤድኖ።

18 ሳኦል ቄስያ አክያ፥ "ጾሳ ኦቻናዉ አነ ኤፉድያ ሃ አካደ ያ" ያጌዳ። ሄ ዎደ አኪ እስራኤልያ አሳ ስንን ኤፉድያ ማዬ። 19 ሳኦል ቄስያና ሃሳይሽን፥ ፕልስጼማቱዋ ሄራን ዋላሳይ ዳር ዳር ቤዳ። ሄዋ ድራዉ፥ ሳኦል ቄስያ፥ "ኤፉድያፐ ነ ኩሽያ ከሳ ድጋ" ያጌዳ።

20 ሄዋፐ ጉይያን፥ ሳኦልነ አ አሳይ ኡባይ ሺቂደ፥ ኦላ ቤድኖ። ፕልስጼማ አሳቱ ኡባይ ሻቢረቲደ፥ ባረንቱ ማሻን እቱ እቱዋ ቡሳኪደ ደእያዋንታ ደሜድኖ። 21 ካሰ ፕልስጼማ አሳቱዋና ደኢደ፥ ኡንቱንቱና ፑደ ኡንቱንቱ ሺቄዳ ሳኣ ቤዳ። እብራዋቱካ ኡንቱንታ አጊደ፥ ሳኦላናነ ዮናታናና ደእያ እስራኤልያ አሳን ጋከቴድኖ። 22 ኤፍሬማ ገዝያን ቆሰት ኡቴዳ ሀራ እስራኤላቱካ ፕልስጼማቱ ባቃቲደ ደእያዋ ስሴድኖ። ኡንቱንቱካ የደርሱዋ ኡክያ አሳን ጋከቴድኖ። 23 መና ጎዳይ ሄ ጋላስ እስራኤልያ አሳ አሼዳ። ቤት-አዌና ካታማፐ ሄፍን ጋካናዉካ ኦላይ ኦለቴዳ።

ኦላፐ ስምና ሀኔዳባቱዋ

24 ሄ ጋላስ እስራኤልያ አሳቱ ኮሻን ላባኔድኖ፤ አያዉ ጎፐ፥ ሳኦል አሳ፥ "ሳአይ ቃመናን ደእሺናነ ታን ታ ሞርከቶ ሀሉዋ ከሰናን ደእሽን፥ ቁማ ምያ ኡራይ ሸቀቴዳዋ ግዶ" ያጊደ አሳ ጫቁዋን ቃቼዳ። ሄዋ ድራዉ፥ ኦላንቻቱዋፐ ቁማ ዶናኮ ሺሼዳ አሳይ ኦንነ ባዋ።

25 ኦላንቻቱ ኡባይ ኡባና ዎራ ግዶ ገልያ ዎደ፥ ሳኣን ኤሳይ ደኤ። 26 ኡንቱንቱ ዎራ ግዶን ኤሳይ ጎግያዋ በኤድኖ፤ ሽን ጫቁዋ ያዬዳ ድራዉ፥ እት አሳይነ ባረ ኩሽያ ዶናኮ ሺሽቤና። 27 ሽን ዮናታን ባረ አዉ አሳ ጫቁዋን ቃቼዳዋ ስስቤና። ሄዋ ድራዉ፥ ባረ ኩሽያን ደእያ ጻምኣ ጼራ እልሉዋን የድ ከሲደ፥ ላጬዳ፤ አ አይፊ ዶየቴዳ። 28 ሄዋፐ ጉይያን፥ ኦላንቻቱዋፐ እቱ አ፥ "ነ አዉ ኦላንቻቱዋ ኡባ፥ ‘ሀች ቁማ ምያ ኡራይ ሸቀቴዳዋ ግዶ’ ያጊደ፥ ጫቁዋን ቃች ዎዳ፤ አሳይ ኡባይ ላባኔዳዌ ሀዋሳ" ያጌዳ።

29 ሄዋፐ ጉየ ዮናታን ሀዋዳን ያጌዳ፤ "ታ አዉ ቢታዉ መቶ መዳ። ታን ሀ ኤሳፐ ላፋ ላጭና ታ አይፊ አይ ኬሻ ዶየቴደንቶ በአ። 30 አሳይ ባረ ሞርከቱዋፐ ኦሞዴዳዋፐ ሀቼ ሜዳባ ግድንቶ፥ አይባ ሎኤ ሽን፤ ኡንቱንቱ ዎና ፕልስጼማቱዋ ፓይዱካ አይ ኬሻ ዳራናዋ ሽን" ያጌዳ።

31 ሄ ጋላስ እስራኤልያ አሳቱ ምክማሳፐ አያሎና ጋካናዉ፥ ፕልስጼማቱዋ ሾጭ ስሚደ ዳቡሬድኖ። 32 ኡንቱንቱ ኦሞዱዋ ጋዉሀዪደ፥ ዶርሳቱዋ፥ ሚዛቱዋነ ማራቱዋ አኬድኖ፤ ቢታን ጮ ሹኪደ፥ ሱናካ ሜድኖ። 33 ሄዋፐ ጉይያን፥ እት አሳይ ሳኦላ፥ "በአ፤ አሳይ ሱና ደእያ አሹዋ ሚደ፥ መና ጎዳ ቦላ ናጋራ ኦ" ያጌዳ።

ሄዋፐ ጉየ እ ኡንቱንታ፥ "ህንተንቱ ናጋራ ኦድታ፤ ዎጋ ሹቻ ኤለካ ሃ ታኮ ጎንዶርስተ" ያጌዳ።✝14:33 ዶመ 9:4፤ ዎጋ 7:26-27፤ 17:10-14፤ 19:26፤ ዛረ. 12:16፣ 23፤ 15:23 34 ዛረደካ፥ "ከሲደ አሳ ግዶ ቢተ፤ ኡንቱንታ ሀዋዳን ያግተ፤ ‘ሁጲያን ሁጲያን ህንተንቱ ቦራነ ዶርሳ ታዉ ሃ አኪደ ዪተ፤ ያቲደ ሀዋን ዎጋዳን ሹኪደ ሚተ። ሱና ደእያ አሹዋ ሚደ፥ መና ጎዳ ቦላ ናጋራ ኦፕተ’ ያጋ" ያጌዳ።

ሄዋ ድራዉ፥ ሄ ጋላስ ቃማ አሳቱ ኡባይ ባረ ቦራ ቦራ አሂደ፥ ያን ሹኬድኖ። 35 ሳኦል ሄ ሳኣን መና ጎዳዉ ያርሽያ ሳኣ ግምቤዳ፤ ጾሳዉ ያርሽያ ሳኣ እ ግምቢሽን፥ ሄዌ አዉ ኮይሩዋ።

36 ሳኦል፥ "ሀ ቃማና ዱገ ፕልስጼማቱዋ ካሊደ አነ ቦይተ፤ ሳአይ ዎንታና ጋካናዉ፥ ኡንቱንቱዋ ኡባ ቦንቆይተ፤ ኡንቱንታካ እቱዋነ አሸናን ዎይተ" ያጌዳ።

ኡንቱንቱ፥ "ኤኖ፥ ኔና ሎኤዳባ ኡባ ኦ" ያጊደ ዛሬድኖ።

ሽን ቄሲ፥ "አነ ሀዋን ጾሳ ኦቼቶ" ያጌዳ።

37 ሄዋ ድራዉ፥ ሳኦል ጾሳ፥ "ፕልስጼማ አሳቱዋ ካላደ ቦ? ኔን ኡንቱንታ እስራኤላቱ ኩሽያን አደ እማኒ?" ያጊደ ኦቼዳ። ሽን ሄ ጋላስ ጾሳይ አዉ ኦድቤና።

38 ያትና ሳኦል፥ "ኦላንቻቱዋ ካፓቶ፥ ኡባይ ሃይተ፤ ሀቼ አይባ ናጋራይ ኦሰቴደንቶነ አነ ቆሪደ ደሞይተ። 39 እስራኤልያ አሽያ መና ጎዳይ ኤሮ! ታ ናኣ ዮናታና ግዶፐነ፥ ሀይቃናዉ በሰ" ያጌዳ። ሽን አሳፐ እት ኡራይነ ቃላ ቃትቤና።

40 ሄዋፐ ጉይያን፥ ሳኦል እስራኤልያ አሳ ኡባ፥ "ህንተንቱ ኡባይካ ያ ባጋን ኤቂተ፤ ታንነ ታ ናኣ ዮናታን ሀ ባጋን ኤቃና" ያጌዳ።

ሄዋፐ ጉየ አሳቱ፥ "ኤኖ፥ ኔና ሎኦዋ ኦ" ያጌድኖ።

41 ሄዋፐ ጉይያን፥ ሳኦል መና ጎዳ እስራኤልያ ጾሳ፥ "ታዉ ልከ ዛሩዋ እማ" ያጊደ ዎሴዳ። ሳማይ ሳኦላ ቦላነ ዮናታና ቦላ ዎና አሳይ ጌዬዳ።✝14:41 ፓይ. 27:21፤ 1 ሳሜላ 28:6 42 ቃይ ሳኦል፥ "ታ ቦላነ ታ ናኣ ዮናታና ቦላ የግተ" ያጌዳ። ሄዋፐ ጉየ ሳማይ ዮናታና ቦላ ዎዳ።

43 ሳኦል ዮናታና፥ "አነ ኔን ኦዳዋ ኦዳ" ያጌዳ።

ዮናታን፥ "ታን ጉ ኤሳ እልሉዋ ታ ጻምኣ ጼራፐ ላጫድ። ሄኮ ታን ሀዋን ደአይ፤ ታን ሀይቃና" ያጌዳ።

44 ሳኦል ሀዋዳን ያጌዳ፤ "ዮናታና፥ ኔን ሀይቃና ዮፐ፥ ጾሳይ ታና ዎ!" ያጌዳ።

45 ሽን አሳይ ሳኦላ፥ "ዮናታን፥ እስራኤልያዉ ሀ ዎልቃማ ጾኑዋ አሄዳዌ ሀይቃኔ? ሄዌ ኡባካ ሀነና! ደኡዋ መና ጎዳይ ኤሮ! አ ሁጲያፐ እት ብናናይነ ቢታን ዎና፤ አያዉ ጎፐ፥ እ ሀቼ ሀዋ ጾሳ ማዱዋን ኦዳ" ያጌድኖ። ያቲደ አሳይ ዮናታና አሽና፥ እ ሀይቀናን አቴዳ።

46 ሄዋፐ ጉይያን፥ ሳኦል ፕልስጼማ አሳቱዋ የደርስያዋ አጌዳ፤ ኡንቱንቱ ባረንቱ ጋድያ ስሜድኖ።

ሳኦላ ካዉተነ አ ሶ አሳ

47 ሳኦል እስራኤልያ ቦላ ካተ ግዶዋፐ ጉይያን፥ ኡባ ኤለካ ደእያ ባረ ሞርከቱዋ ኦሌዳ፤ ሄዋንቱካ: ሞኣባቱዋ፥ አሞናቱዋ፥ ኤዶማቱዋ፥ ጾባ ካተቱዋነ ፕልስጼማ አሳቱዋ። ባረ ቤዳ ሳኣን ኡባን ጾኔዳ። 48 እ ምኒደ ኦለቴዳ፤ አማሌቃ አሳቱዋ ጾኔዳ፤ እስራኤልያ አሳ ቦንቂያዋንቱ ኩሽያፐ አሼዳ።

49 ሳኦላ አቱማ ናናይ ዮናታና፥ ይሽዊነ ማልክሹአ፤ አዉ ባይራ ናት ሱንይ መራቦ፤ ቴፋ ናት ሱንይ ሚካሎ። 50 አ ማቻታ አህማኣጻ ናቶ አህኖኣሞ። አ ኦላንቻቱ ጋዳዋይ አ አዉዋ እሻ ኔራ ናኣ አባኔራ። 51 ሳኦላ አዉዋ ቂስነ አባኔራ አዉዋ ኔር አቢኤላ ናና።

52 ሳኦል ደኤዳ ላይ ኡባን ፕልስጼማ አሳቱዋና ሱሎ ኦላ ኦለቲደ ደኤዳ። ምኖ አሳ ዎይ ጻላ አሳ ደሜዳ ዎደ ኡባን፥ እ ሄ ኡራ ባረ ኦላንቻቱዋን ጉጄ።