1 ሳሜላ 23

ዳዊተ ቃኢላ ካታማ ፕልስጼማቱዋፐ አሼዳ

1 "ፕልስጼማ አሳቱ ቃኢላ ካታማ ኦሊኖ፤ ካካ ቦንቂኖ" ያግያ ኦዱዋ ዳዊተ ስሴዳ።

2 ዳዊተ መና ጎዳ፥ "ታን ባደ ፕልስጼማ አሳቱዋ ኦሎ?" ያጊደ ኦቼዳ።

መና ጎዳይ ዳዊታ፥ "ባ፤ ፕልስጼማ አሳቱዋ ኦላ፤ ቃኢላ ካታማ አሻ" ያጌዳ።

3 ሽን ዳዊታ አሳቱ፥ "ኑን ሀዋን ይሁዳ ቢታን ደኢደነ ያዬቶ፤ ሽን ፕልስጼማ አሳቱዋና ኦለታናዉ ኑን ቃኢላ ካታማ ቢደ፥ ዋን አ ያያኔሻ!" ያጌድኖ።

4 ሄዋ ድራዉ፥ ዳዊተ ዛረደ መና ጎዳ ኦቼዳ፤ መና ጎዳይ አ፥ "ፕልስጼማ አሳቱዋ ታን ነዉ አ እማና፤ ደንዳ፤ ቃኢላ ካታማ ባ" ያጌዳ። 5 ዳዊተነ አ አሳይ ቃኢላ ካታማ ቢደ፥ ፕልስጼማ አሳቱዋና ኦለቴድኖ፤ ኡንቱንቱ መህያ ኦሞዴድኖ። ኡንቱንቱፐ ዳሮ አሳ ዎደ፥ ዳዊተ ቃኢላ ካታማ አሳ አሼዳ።

6 አብመሌካ ናአይ አብያታረ ዳዊታኮ ቃኢላ ካታማ ባቃትያ ዎደ፥ ኤፉድያ ጌተትያ ማዩዋ አኪደ ቤዳ።

7 ዳዊተ ቃኢላ ካታማ ቤዳዋ ሳኦል ስሲደ፥ "ጾሳይ ዳዊታ ታ ኩሽያን አ እሜዳ፤ አያዉ ጎፐ፥ እፍይነ ድርሳይ ደእያ ካታማ ገሊደ፥ ባረካ ቃሸቴዳ" ያጌዳ። 8 ቃኢላ ካታማ ቢደ፥ ዳዊታነ አ አሳ ዶዳና ማላ፥ ሳኦል ባረ ኦላንቻቱዋ ኡባ ጼሴዳ።

9 ሳኦል ባረ ቦላ ኢታባ ማቀቴዳዋ ዳዊተ ኤሬዳ፤ ቄስያ አብያታራ፥ "ኤፉድያ ሃ አካ ያ" ያጌዳ። 10 ሄዋፐ ጉይያን ዳዊተ፥ "አቤት መና ጎዳዉ፥ እስራኤልያ ጾሳዉ፥ ታ ጋሱዋን ሳኦል ቃኢላ ካታማ ባይዛናዉ ማቀቴዳዋ ታን ነ ቆማይ ዉርሳደ ስሳድ። 11 ቃኢላ ካታማ አሳይ ታና ሳኦላዉ አደ እማኔሻ? ታን ነ ቆማይ ስሴዳዋዳን ሳኦል ቱሙካ ሃ ያኔሻ? አቤት መና ጎዳዉ፥ እስራኤልያ ጾሳዉ፥ ታዉ ነ ቆማዉ ኦዳርኪ" ያጌዳ።

መና ጎዳይ ዳዊታ፥ "ኤ፤ ሳኦል ያናዋ" ያጊደ ዛሬዳ።

12 ዳዊተ፥ "ቃኢላ ካታማ አሳቱ ታናነ ታ አሳ ሳኦላዉ አደ እማኔሻ?" ያጊደ ዛረደካ ኦቼዳ።

መና ጎዳይ፥ "ኤ፤ ኡንቱንቱ ህንተንታ አደ እማና" ያጌዳ። 13 ዳዊተነ ኡሱፑን ጼቱ ግድያ አሳይ ቃኢላ ካታማፐ ከሲደ፥ እት ሳፐ እት ሳኣ ሄመታ ኦይቄድኖ። ዳዊተ ቃኢላ ካታማፐ ባቃቴዳዋ ሳኦል ስሴዳ ዎደ፥ ባናዉ ቆፔዳዋ አግ ባሼዳ።

ሳኦል ዳዊታ ኦይቃናዉ ኮዬዳ

14 ዳዊተ ባዙዋ ጌሶቱዋንነ ዚፋ ዎራን ደእያ ዞዘቱዋን ደኤዳ። ሳኦል አ ደማናዉ ኡባ ጋላስ ኮዬ፤ ሽን ጾሳይ አ ሳኦላ ኩሽያን አ እምቤና። 15 ዳዊተ ዚፋ ዎራን ደእያ ሆሬሻ ግያ ሳን ደእሽን፥ ሳኦል ባረና ዎናዉ ከሴዳዋ ዳዊተ ኤሬዳ። 16 ሳኦላ ናኣ ዮናታን ደንዲደ፥ ዳዊታኮ ሆሬሻ ቤዳ፤ ዳዊታ ጾሳን ዎልቃ ደማናዳን ምንደ፥ 17 "ያዮፓ፤ ታ አዉዋ ሳኦል ኔና ኩሽያንነ ቦቼና፤ ኔን እስራኤልያ ቦላ ካተታና፤ ታንካ ኔፐ ጋርሳና ሞዳና፤ ሀራይ አቶ ታ አዉ ሳኦለካ ሄዋ ኤሬዳ" ያጌዳ። 18 ኡንቱንቱ ላአቱካ መና ጎዳ ስንን እቱ እቱዋና ጫቀቴድኖ፤ ዳዊተ ሆሬሻን ጋምእና ዮናታን ባረ ሶ ቤዳ።✝23:18 1 ሳሜላ 18:3

19 ዚፋ አሳቱ ሳኦላኮ ግብኣ ካታማ ቢደ፥ "ዳዊተ ያሰሞናፐ ገድሳ ባጋና ሀኪላ ደርያ ቦላ ሆሬሻ ጌሱዋን ኑ ማታን ቆሰት ኡቴዳ።✝23:19 ማዝ. 54 (ሁጲያ) 20 ኑ ካትያዉ፥ ሀእካ ኔን ዶሴዳ ዎደ ሃ ዱገ ዎ፤ ያቶፐ፥ ኑን አ ነ ኩሽያን አ እማና" ያጌድኖ።

21 ሳኦል ኡንቱንታ፥ "ህንተንቱ ታዉ ቃረቴዳ ድራዉ፥ ህንተንታ መና ጎዳይ አንጆ። 22 ቢደ አነ ጉጂደካ ጌሽተ፤ ዳዊተ ዳሮ ገደ ሀቃ ብንቶነ ቃይ ያን ኦን አ በኤደንቶ፥ ጌሺደ ኤርተ፤ አያዉ ጎፐ፥ እ ሎይ ጭንጫ ግያዋ ታን ስሳድ። 23 ዳዊተ ቆሰትያ ሳኣ ኡባ በኢደ፥ ሙሩታ የዉዋ አኪደ፥ ታኮ ስሚደ ዪተ። ሄዋፐ ጉይያን፥ ታን ህንተናና ባና፤ እ ሄ ሄራን ደኦፐ፥ ታን አ ኩመን ይሁዳ ያራ ግዶን ደማና ጋካናዉ ኮያና" ያጌዳ።

24 ሄዋ ድራዉ፥ ኡንቱንቱ ሳኦላፐ ስንቲደ ዚፋ ቤድኖ። ዳዊተነ አ አሳይ ያሰሞናፐ ገድሳ ባጋና ደእያ ማኦና ዎራን አራባ ጌተትያ ጋን ደኢኖ። 25 ሳኦልነ አ አሳይ ዳዊታ ኮያናዉ ቤድኖ። ዳዊተ ሄዋ ስሴዳ ዎደ፥ ዛላኮ ዎደ፥ ማኦና ዎራን ኡቴዳ። ሳኦል ሄዋ ስሴዳ ዎደ ማኦና ባዙዋ ዳዊታ ኮዪደ ቤዳ። 26 ሳኦል ደርያፐ እት ባጋ ምይያና ቤ፤ ዳዊተነ አ አሳይ ህንኮ ባጋ ምይያና ቢኖ። ኡንቱንቱ ሳኦላፐ ባቃታናዉ ኤሌሊኖ፤ አያዉ ጎፐ፥ ሳኦልነ አ አሳቱ፥ ዳዊታነ አ አሳቱዋ ኦይቃናዉ ማት ኡቴድኖ። 27 ሽን ኪተቴዳዌ ሳኦላኮ ዪደ፥ "ሃያ! ፕልስጼማ አሳቱ ቢታ ቦላ ዎራጄድኖ" ያጌዳ። 28 ሳኦል ዳዊታ ኮይያዋ አጊደ፥ ፕልስጼማ አሳቱዋና ኦለታናዉ ቤዳ። ሄዋ ድራዉ፥ ሄ ሳአይ "ሻክያ ዛላ" ጌተቴዳ። 29 ዳዊተ ሄ ሳፐ ከሲደ፥ ኤንጋዳ ካታማ ማታን ደእያ ጌሶቱዋን ኡቴዳ።