ህዝቄላ 20

ማካላንቻ እስራኤልያ

1 ኑን ኦሞደቴዳ ላፑን ላይን፥ እቼሻን አግናን፥ ታማን ጋላሳን፥ እስራኤልያ ጭማቱዋፐ አማሬዳዋንቱ መና ጎዳ ኦቻናዉ ዪደ፥ ታ ስንን ኡቴድኖ።

2 ያትና፥ መና ጎዳ ቃላይ ታኮ ሀዋዳን ያጊደ ዬዳ፤ 3 "ላ አሳ ናአዉ፥ እስራኤልያ ጭማቶ ሀዋዳን ያጋደ ኦዳ፤ ‘ኡባ ሞድያ መና ጎዳይ ሀዋዳን ያጌ፤ "ህንተ ዬዳዌ ታና ኦቻናሴ? ታን ኡባ ሞድያ መና ጎዳይ ታ ደኡዋን ጫቃይ: ታን ህንተናን ኦሸትከ" ያጌ’ ያጋ።

4 "ኡንቱንቱ ቦላ ፕርዲቴ? ላ አሳ ናአዉ፥ ቱሙ ኡንቱንቱ ቦላ ፕርዲቴ? ሄዋ ግዶፐ፥ ኡንቱንቱ ማይዛ አዎቱዋ ቱና ኦሱዋ ኡንቱንታ ኤርሳ። 5 ኡንቱንቶ ሀዋዳን ያጋ፤ ‘ኡባ ሞድያ መና ጎዳይ ሀዋዳን ያጌ፤ "ታን እስራኤልያ ዶሬዳ ዎደ ታ ኩሽያ ደንደ ጫቃድ፥ ያቆባ ዛረቶ ግብጼን ደእሺና፥ ታናተ ኤርሳደ፥ ታ ኩሽያካ ደንደ ጫቃደ፥ ታን መና ጎዳ ህንተ ጾሳ"✝20:5-6 ከሳ 6:2-8 ጋደ ኦዳድ። 6 ታን ህንተና ግብጼፐ ከሳደ፥ ህንተዉ ዶሬዳ ቢታ፥ ማይነ ኤሳይ ጎግያ ቢታ፥ ቢታ ኡባፐ አዳ ሎኦ ቢታ አሀና ጋደ ጫቃድ። 7 ቃይ ታን ኡንቱንታ፤ "ህንተፐ እቱ እቱ ባረ ሲቅያ ቱና ኤቃቱዋ ድጎ፤ ግብጼ ኤቃቱዋን ቱኖፕተ። ታን መና ጎዳ ህንተ ጾሳ" ያጋድ።

8 " ‘ሽን ኡንቱንቱ ታዉ ማካሊደ፥ ታ ኦድያዋ ስሰናን እጼድኖ። ኡንቱንቱ ባረንቱ አሞቴዳ ቱና ኤቃቱዋ ድግበይክኖ፤ ግብጼ ኤቃዉካ ጎይንያዋ አግበይክኖ። ሄዋ ድራዉ፥ ኡንቱንቱ ግብጼን ደእሺና፥ ታ ሀንቁዋ ኡንቱንቱ ቦላ ጉሳናዉ፥ ታ ይሉዋካ ኡንቱንቱ ቦላ ዉርሳናዉ ቆፓድ። 9 ሽን ኡንቱንቱ ደእያ ካዉተቱዋ ግዶንነ እስራኤልያ አሳ ግብጼፐ ከስያዋን፥ ታን ታናተ ኤርሴዳ አሳ ስንን ታ ሱንይ ቱነናዳን ኦድ። 10 ሄዋ ድራዉ፥ ታን ኡንቱንታ ግብጼፐ ከሳደ፥ መላ ቢታ አሃድ። 11 አዛዘትያ ኡባዉ ደኡዋ እምያ ታ ዎጋ ታን ኡንቱንቶ እማድ፤ ታ ህግያካ ኡንቱንቱ ታማርሳድ።✝20:11፣ 13 ዎጋ 18:5 12 ቃይ ኡንቱንታ ጌሽያዌ ታና መና ጎዳ ግድያዋ ኡንቱንቱ ኤራና ማላ፥ ታን ታ ሳምባታ ታፐነ ኡንቱንቱፐ ግዱዋን ማላ ኦደ እማድ።✝20:12 ከሳ 31:13-17

13 " ‘ሽን እስራኤልያ አሳይ ሀ መላ ቢታንካ ታ ቦላን ማካሌድኖ። አዛዘቴዳ ኡባዉ ደኡዋ እምያ ታ ዎጋዳን ሀመትበይክኖ፤ ታ ህግያካ መንድኖ፤ ታ ሳምባታካ ዳሮ ቱንሴድኖ። ያትና፥ ታን መላ ቢታን ታ ሀንቁዋ ኡንቱንቱ ቦላ ጉሳደ፥ ኡንቱንታ ዉርሳናዉ ቆፓድ። 14 ሽን ታን ኡንቱንታ ግብጼፐ ከስያዎ በኤዳ ካዉተቱዋ ስንን ታ ሱንይ ቱነናዳን፥ ኡንቱንታ ይሳበይከ። 15 ቃይ ኡንቱንቶ እሜዳ ቢታ፥ ማይነ ኤሳይ ጎግያ ቢታ፥ ቢታ ኡባፐ ሎእያ ቢታ ኡንቱንታ ገልሰናዳን መላ ቢታን ደእሽን ጫቃድ።✝20:15 ፓይ. 14:26-35 16 አያዉ ጎፐ፥ ኡንቱንቱ ኤቃዉ ጎይኒደ፥ ታ ህግያ እጼዳ ድራሳ፥ ታ ዎጋዳን ሀመትቤና ድራሳነ ታ ሳምባታካ ቱንሴዳ ድራሳ። 17 ግዶፐነ፥ ታን ኡንቱንቶ ቃረቴዳ ድራዉ፥ መላ ቢታን ኡንቱንታ ዉርሳ ይሳበይከ።

18 " ‘ኡንቱንቱ መላ ቢታን ደእሺና፥ ታን ኡንቱንቱ ናናቱዋ ሀዋዳን ያጋድ፤ "ህንተ አዎቱዋ ዎጋዳን ሀመቶፕተ፤ ኡንቱንቱ ህግያካ ናጎፕተ፤ ዎይ ኡንቱንቱ ኤቃቱዋን ቱኖፕተ። 19 ታን መና ጎዳ ህንተ ጾሳ። ታ ዎጋዳን ሀመትተ፤ ታ ህግያካ ናግተ። 20 ታፐነ ህንተፐ ግዱዋን ማላ ግዳና ማላነ ታን መና ጎዳ ህንተ ጾሳ ግድያዋ ህንተ ኤራና ማላ፥ ሳምባታ ሀራ ጋላሳፐ ዱማይተ" ያጋድ።

21 " ‘ሽን ሄ ናናቱካ ታ ቦላን ማካሌድኖ፤ አዛዘትያ አሳ ኡባዉ ደኡዋ እምያ ታ ዎጋዳን ሀመትበይክኖ፤ ታ ህግያካ ኡንቱንቱ ናግበይክኖ፤ ታ ሳምባታካ ቱንሴድኖ። ያትና፥ ታን መላ ቢታን ታ ሀንቁዋ ኡንቱንቱ ቦላ ጉሳናዉ፥ ታ ይሉዋካ ኡንቱንቱ ቦላ ዉርሳናዉ ኮያድ። 22 ሽን ታን ታ ኩሽያ ሺሻ አካድ። ታን ኡንቱንታ ግብጼፐ ከስያዋ በኤዳ ካዉተቱዋ ስንን ታ ሱንይ ቱነናዳን፥ ኡንቱንታ ይሳበይከ። 23 ቃይ ኡንቱንታ ሀራ ካዉተቶነ ሀራ ቢታቶ ላላናዉ መላ ቢታን ጫቃድ።✝20:23 ዎጋ 26:33 24 አያዉ ጎፐ፥ ኡንቱንቱ ታ ዎጋዉ አዛዘተናን እጼድኖ፤ ታ ህግያካ መንድኖ፤ ታ ሳምባታ ቱንሴድኖነ ባረንቱ አዎቱዋ ኤቃ አሞቴድኖ። 25 ሄዋዳንካ፥ ቃይ ኡንቱንቶ ሎኦ ግደና ዎጋቱዋነ ደኡዋ እመና ህገቱዋ እማድ። 26 ኡንቱንቱ ባረንቱ ያርሹዋን ቱናናዳን፥ ባረንቱ ባይራ ናናቱዋ ያርሻናዳን፥ ታን ኡንቱንታ የዳ በሳድ። ታን ሄዋ ኦዳዌ ኡንቱንታ ዳጋንናሳነ ታን መና ጎዳ ግድያዋ ኡንቱንታ ኤርሳናሳ ያጌ’ ያጋ።

27 "ሄዋ ድራዉ፥ አሳ ናአዉ፥ እስራኤልያ አሳዉ ሀዋዳን ያጋደ ኦዳ፤ ‘ኡባ ሞድያ መና ጎዳይ ሀዋዳን ያጌ፤ ህንተ አዎቱካ ታናን አማነተናን እጺደ፥ ሄ የዎቱዋን ታና ቦሬድኖ። 28 ኡንቱንቶ እማናዉ ታ ኩሽያ ደን ጫቄዳ ቢታ ኡንቱንታ አሄዳ ዎደ፥ ኡንቱንቱካ ቃ ደርያ ኡባነ እርጻ ም ኡባ በኤድኖ። ኡንቱንቱን ኡባን ባረንቱ ያርሹዋ ያርሼድኖ። ባረንቱ ጩዋይያ እጻናንነ ባረንቱ ጉስያ ኡሻ ያርሹዋን ታና ሀንቀድኖ። 29 ያትና፥ ታን ኡንቱንታ፥ ሀዌ ህንተ ብያ ቃ ሳአይ አዬ? ያጋደ ኦቻድ። ሀች ጋካናዉ ሄ ሳአይ ባማ ጌተቴ፤ ሄዋ ጉሳይካ ጎይንያ ቃ ሳኣ ጉሳ’ " ያጌ ያጋ።

30 ሄዋ ድራዉ፥ እስራኤልያ አሳዉ ሀዋዳን ያጋደ ኦዳ፤ "ኡባ ሞድያ ጾሳይ ሀዋዳን ያጌ፤ ‘ህንተ ማይዛ አዎቱ ኦዳ ናጋራ ኡባ ኦደ፥ አያዉ ህንተና ቱንሲቴ? ኡንቱንቱ ቱና ኤቃ ጎይናናዉ አሞቲደ አያዉ ካሊቴ? 31 ሀችካ ሄዋ ማላ እሙዋ ሺሽያ ዎደነ ህንተ አቱማ ናናቱዋ ታማን ጹጊደ ያርሽያ ዎደ፥ ህንተ ኤቃን ኡባን ህንተና ቱንሲታ። ህንተኖ፥ እስራኤልያ አሳቶ፥ ታን ህንተናን ኦሸቶ? ታን ኡባ ሞድያ መና ጎዳይ ታ ደኡዋን ጫቃይ: ታን ህንተናን ኦሸትከ። 32 ህንተ፥ "ኑን ምዉነ ሹቻዉ ጎይንያ ሀራ ካዉተቱዋ ማላነ ጾሳ አማነና አሳ ማላ ግዳና" ያጊደ ቆፒታ። ሽን ህንተ ቆፋይ ኡባካ ሀነና።

ጾሳይ ሙሬነ ማሬ

33 " ‘ታን ኡባ ሞድያ መና ጎዳይ ታ ደኡዋን ጫቃይ: ታን ታ ምኖ ቀስያን፥ ታ ሙራናዉ ደንዳ ኩሽያንነ ታ ጉሴዳ ሀንቁዋን ህንተ ቦላ ካተታና። 34 ካዉተቱዋ ግዶፐ ታን ህንተና ከሳና፤ ህንተ ላለቴዳ ቢታ ኡባፐ ታ ምኖ ቀስያን፥ ታ ምጨቴዳ ኩሽያንነ ታ ጉሴዳ ሀንቁዋን ታን ህንተና ሺሻና። 35 ታን ህንተና ካዉተቱዋ መላ ቢታ ግያ ባዙዋ አሀና፤ ህንተና ታ ስንን ኤሳደ፥ ህንተ ቦላ ፕርዳና። 36 ግብጼ ቢታ ባዙዋን ህንተ ማይዛ አዎቱዋ ቦላ ፕርዴዳዋዳን፥ ሄዋዳንካ ህንተ ቦላ ፕርዳና። ታን ኡባ ሞድያ መና ጎዳይ ሀዋ ኦዳይ። 37 ታን ህንተና ታ ካዉተ ጻምኣ ጋርሳን ዎና፤ ታ ጫቁዋ ህንተ ናጋናዳን፥ ታን ህንተና ኦና። 38 ማካላንቻቱዋነ ናጋራንቻቱዋ ታን ህንተ ግዶፐ ድጋና፤ ሀእ ኡንቱንቱ ደእያ እማተ ቢታፐ ታን ኡንቱንታ ከሳና፤ ሽን ኡንቱንቱ እስራኤልያ ቢታ ገለናዳን ድጋና። ሄ ዎደ ታን መና ጎዳ ግድያዋ ህንተ ሄዋን ኤራና’ ያጌ።

39 "ኡባ ሞድያ መና ጎዳይ ሀዋዳን ያጌ፤ ‘ህንተኖ፥ እስራኤልያ አሳቶ፥ ህንተ ሀእ ታን ኦድያዋ ስሰናን እጾፐ፥ ቢደ ኡባይካ ህንተ ኤቃዉ ጎይንተ። ሽን ሄዋፐ ጉይያን፥ ህንተ እሙዋንነ ህንተ ኤቃን ታ ጌሻ ሱን ቱንስክታ። 40 ታ ጌሻ ደርያን፥ ቁ ጌዳ እስራኤልያ ደርያ ቦላን ህንተ እስራኤልያ አሳይ ኩመንይ ታዉ፥ ኡባ ሞድያ መና ጎዳዉ ሄ ቢታን ጎይናና። ታንካ ህንተና ሞካ አካና፤ ህንተ ያርሹዋ፥ ህንተ ዶረቴዳ እሙዋነ ህንተ ጌሻ እሙዋ ታን ህንተፐ ኮያይ። 41 ህንተ ላለቴዳ ካዉተቱዋ ግዶፐ ታን ህንተና አህያ ዎደነ ሀራ ቢታቱዋፐ ታን ህንተና ሺሽያ ዎደ፥ ሳዉዋ ቶሹኩ ግያ ያርሹዋ አክያዋዳን፥ ታን ህንተና አካና። ካዉተቱ ጼልሽን፥ ታን ህንተ ግዶን ጌሻ ግድያዋ ኤርሳና። 42 ታን ካሰ ህንተ ማይዛ አዋቶ እማና ጋደ ጫቄዳ እስራኤልያ ቢታ ህንተና ዛራደ አሄዳ ዎደ፥ ታን መና ጎዳ ግድያዋ ህንተ ኤራና። 43 ህንተ ህንተ ኢታ ሀመታነ ህንተ ቱና ኦሱዋ ህንተ ሄ ሳኣን ሀሳያና፤ ህንተ ኦዳ ኢታ ኦሱዋ ኡባ ህንተ ሸነታና። 44 ህንተኖ፥ እስራኤልያ አሳቶ፥ ታን ህንተ ኢታ ሀመታዳንነ ህንተ ቱና ኦሱዋዳን ግደናን፥ ታ ሱን ድራዉ ታን ኦያ ዎደ፥ ታን ጾሳ ግድያዋ ህንተ ኤራና። ታን ኡባ ሞድያ መና ጎዳይ ሀዋ ኦዳይ ያጌ’ ያጋ" ያጊደ ዬዳ።

ገድሳ ባጋ ታማ ፕርዳ

45 መና ጎዳ ቃላይ ታኮ ሀዋዳን ያጊደ ዬዳ፤ 46 "ላ አሳ ናአዉ፥ ገድሳ ባጋ ስማደ ጼላ፤ ገድሳ ባጋዉ ኦዳ፤ ገድሳ ዎራ ቦላ ትምቢትያ ኦዳ። 47 ገድሳ ዎራዉ ሀዋዳን ያጋ፤ መና ጎዳ ቃላ ስሳ! ኡባ ሞድያ መና ጎዳይ ሀዋዳን ያጌ፤ ‘ታን ነ ግዶን ታማ ኦይና፤ ሄ ታማይ ነ እርጻ ምካ ነ መላ ምካ ኡባ ማና። ሄ ኤጽያ ታማይ ቶኤና፤ ገድሳፐ ቢደ፥ ሁጲሳ ጋካናዉ ደእያ አሳ ሶምኡዋ ኡባ ሄ ላጩ ላባና። 48 ታን መና ጎዳይ ኦይዳ ታማ ግድያዋ አሳይ ኡባይ በአና። ሄ ታማይ ቶኤና ያጌ’ ያጋ" ያጊደ ዬዳ።

49 ታን ዛራደ፥ "ሀእ ኡባ ሞድያ መና ጎዳዉ፥ ሀዋ ታ ኦዳናዉ ታና አዛዞፓ። ኡንቱንቱ ታና፥ ‘እ ኡባቶ ሌምሱዋ ኦዴ ግደኔ?’ ያጊደ ሃሳዪኖ" ያጋድ።