ህዝቄላ 32

ግብጼ ጻድያን ሌምሰቴዳ

1 ኑን ኦሞደቴዳ ታማነ ላኤን ላይን፥ ታማነ ላኤን አግናን፥ ኮይሮ ጋላሳን፥ መና ጎዳ ቃላይ ታኮ ሀዋዳን ያጊደ ዬዳ፤ 2 "ላ አሳ ናአዉ፥ ግብጼ ካትያዉ ዝላላ! ሀዋዳን ያጋ፤ ‘ኔን ካዉተቱዋ ግዶን ኔና ጋሙዋ ከሳዳ፤ ሽን ኔን አባ ግዶን ደእያ ጻድያ ማላ። ኔን ሃቱዋፐ ከሳዳ፤ ነ ገደቱዋን ፑርቻካደ፥ ሃ ቡሉቃዳ።

3 " ‘ኡባ ሞድያ መና ጎዳይ ሀዋዳን ያጌ፤ "ዳሮ አሳይ ሺቅያ ዎደ፥ ታን ታ ግትያን ኔና ኦይቃና፤ ሄ አሳይ ኔና ጎቺደ፥ ሃፐ ጋጻ ከሳና። 4 ታን ኔና ቢታን ኦላ አጋና፤ ደምባ ቦላካ ምጫና፤ ያታደ ሳሉዋ ካፎቱዋ ኡባይ ነ ቦላ ኡትሳና፤ ቢታ ኡባን ደእያ ባዙዋ ዶአቱዋካ ነ አሹዋ ካልሳና። 5 ታን ነ አሹዋ ደረቱዋ ቦላን ላላና፤ ነ ዎምባቱዋካ ነ አሃን ኩንና። 6 ደረቱዋ ካሚደ፥ ሻፋቱዋ ኩማና ጋካናዉ፥ ነ ሱይ ጉካናዳን ኦና። 7 ታን ኔና ይስያ ዎደ፥ ሳሉዋ ጎዛና፤ ጾልንተቱዋካ ምሳና፤ አዋካ ሻርያን ካማና፤ አግናይካ ባረ ፖኡዋ ድጋና።✝32:7 ኢሳ. 13:10፤ ማቶሳ 24:29፤ ማር. 13:24-25፤ ሉቃሳ 21:25፤ ሳፃ 6:12-13፤ 8:12 8 ኔፐ ቦላና ደእያ ሳሉዋ ፖኦቱዋ ኡባ ይሳደ፥ ነዉ ቢታ ምሳና። ታን ኡባ ሞድያ መና ጎዳይ ሀዋ ኦዳይ።

9 " ‘ "ታን ነ ቦላ ጋኬዳ ባየ ኦዱዋ ኔን ኤረና ካዉተቱዋ ኡባ ስስያ ዎደ፥ ጮራ አሳ ዎዛናይ ሻቢረታና። 10 ታን ነ ቦላ ጋያዌ ካዉተቱዋ ኡባ ዳጋንና። ታን ታ ማሻ ኡንቱንቱ ስንን ለለስያ ዎደ፥ ካተቱ ያሻን ኮኮራና፤ ኔን ኩንድያ ጋላስ ኡንቱንቱ ኡባይካ ባረንቱ ሸምፖ ሸምፖ ያያና" ያጌ።

11 " ‘ኡባ ሞድያ መና ጎዳይ ግብጼ ካትያዉ ሀዋዳን ያጌ፤ "ባብሎነ ካትያ ማሻይ ነ ቦላን ያና። 12 ሀራ ካዉተፐ አደ፥ መቀ ኢትያ ኦላንቻቱ ባረንቱ ማሻን ነ ጮራ አሳ ዉርሳናዳን ታን ኦና። ኡንቱንቱ ግብጼ ኦቶሩዋ ይሳና፤ አ ጮራ አሳይካ ዉራና። 13 ዳሮ ሃ ማታን ደእያ መህያ ኡባካ ታን ይሳና፤ ሄዋፐ ጉይያን፥ ሃ ቡሉቂያ አሳ ግድና መህያ ግድና፥ ኡባካ ደኤና። 14 ሄ ዎደ ታን ነ ሃቱዋ ጽልሳና፤ ነ ሻፋቱዋካ ዎፑ ኦደ ጎግሳና። ታን ኡባ ሞድያ መና ጎዳይ ሀዋ ኦዳይ። 15 ታን ግብጼ መላ ከስያ ዎደ፥ አን ደእያዋ ኡባ ቁጫደ ይስያ ዎደነ አን ደእያ አሳ ኡባ ሾጭያ ዎደ፥ ታን መና ጎዳ ግድያዋ ኡንቱንቱ ኤራና።

16 " ‘ "ሄዌ ኡባይ ኡንቱንቶ ዝላልያ ዝላሳ ግዳናዋ። ካዉተቱዋ ማጫ አሳቱ ግብጼስነ አ ጮራ አሳዉ ዝላላና። ታን ኡባ ሞድያ መና ጎዳይ ሀዋ ኦዳይ" ያጌ’ ያጋ" ያጊደ ዬዳ።

ዱፉዋ ገልያ አሳቱዋባ

17 ኑን ኦሞደቴዳ ታማነ ላኤን ላይን፥ ሄ አግናን፥ ታማነ እቼሸን ጋላሳን፥ መና ጎዳ ቃላይ ታኮ ሀዋዳን ያጊደ ዬዳ፤ 18 "ላ አሳ ናአዉ፥ ግብጼ ጮራ ኦላንቻቱዋ ድራዉ ዬካ! ግብጼነ ዎልቃማ ካዉተቱዋ ማጫ ናናቱዋ፥ ሀራ ሀይቂደ ዱፉዋን ገሌዳዋንቱና እትፐ ስኦልያ ሞይዛ። 19 ኡንቱንቱ፥ ‘ህንተኖ ግብጼቶ፥ ህንተ ሀራቱዋፐ አ ሎኢቴ? ህንተ ስኦልያን ገላና፤ ሄዋን ህንተ ጾሳ አማንቤናዋንቱና እትፐ ሞገታና።’

20 "ግብጼ ቢታዉ ማሻይ ሾደት ኡቴዳ ድራዉ፥ ኡንቱንቱ ማሻን ሀይቄዳዋንቱ ግዶ ኩንዳና፤ ግብጼ ባረ ጮራ አሳ ኡባና ዱገ ጎሸታና። 21 ስኦልያን ደእያ ዎልቃማ ካፓቱ ግብጼባነ ግብጼ ማዴዳዋንቱባ ሃሳዪደ፥ ‘ኡንቱንቱ ሃ ዱገ ዬድኖ፤ ጾሳ አማነናን፥ ማሻን ሀይቄዳዋንቱና ኡንቱንቱ ግሴድኖ’ ያጊኖ።

22 "አሶረ ስኦልያን ደኤ። ኦላን ሀይቄዳ አሶረ ኦላንቻቱዋ ዱፎቱ አ ዩሹዋን ዶድ ኡቴድኖ። 23 ሄ ዱፎቱ ጪማ ኦላቱዋፐ ዉርሰን ደኢኖ። አ ኦላንቻቱ፥ ካሰ ካዉተቱዋ ኡባ ያሻን ኮኮርሴዳዋንቱ፥ ሀእ አ ኦላንቻቱ ዱፉዋ ዩሹዋን ሺቄድኖ። ደኡዋን ደእያዋንቱ ቢታን ሻብረ መዳዋንቱ ኡባቱ ማሻን ዉሬድኖ።

24 "ኤላምካ ስኦልያን ደኤ። ኤላማ ኦላንቻቱ ኡባይ አ ዱፉዋ ዩሹዋን ዶድ ኡቴድኖ። ኡባቱ ሹከቴድኖ፥ ማሻን ኩንዴድኖ፤ ደኡዋን ደእያ አሳ ቢታን ሻባርሳ ደንዳ ኡባይ አማነናዋንታ ግዲደ ዬላን ቢታ ጋርሳ አድኖ፤ ዱፉዋ ጋርሳ ገሊደ ግሴድኖ። 25 ሀይቄዳዋንቱ ግዱዋን ኤላማዉ ሳአይ ጊግ ኡቴዳ። ኤላማ ኦላንቻቱዋ ኡባ ዱፎቱ አ ዩሹዋን ደኢኖ፤ ኡንቱንቱ ኡባይካ ማሻን ሀይቄድኖ። ኡንቱንቱ ኡባይካ ጾሳ አማንቤናዋንታ። ኡንቱንቱ ደኡዋን ደእያዋንቱ ግዶን ሻብረ ደንዳ ድራዉ ዱፉዋ ገሌዳዋንቱና እትፐ ግሴድኖ።

26 "መሸክነ ቱባል ኦላንቻቱዋ አሳቱዋ ዱፉ እትፐ ሄዋን ደኢኖ፤ ኡንቱንቱ ካሰ ደኡዋን ደእያዋንቱ ቢታን ካዉተቱዋ ኡባ ያሻን ሻባርሴዳዋንታ ግዶፐካ፥ ኡንቱንቱ ኡባይካ ማሻን ሀይቄድኖ። ኡንቱንቱ ኡባይካ ጾሳ አማነናዋንታ። 27 ካሰ ኦላንቻቱ ሞገትያዌ ባረንቱ ኩመን ኦላ ሚሻና፤ ኡንቱንቱ ጎንዳለቱዋ ኡንቱንቱ ትራን ዎና፥ ኡንቱንቱ ማሻቱዋ ኡንቱንቱ ሁጲሳን ዎና፥ ሞገቴድኖ። ሽን ሀዋንቱ ሄዋ ማላ ኩመን ቦንቹ እመትና ሞገትበይክኖ። ኡንቱንቱ ካሰ ደኡዋን ደእያዋንቱ ካዉተቱዋ ሻባርሴድኖ።

28 "ህንተ ግብጼ አሳቱካ ጾነታናነ ማሻን ሀይቄዳ፥ አማነና አሳቱዋና እትፐ ግሳና።

29 "ኤዶም ባረ ካተቱዋናነ ባረ ሞድያዋንቱና እትፐ ስኦልያን ደኤ፤ ኡንቱንቱካ ካሰ ምኖ ኦላንቻቱዋ፤ ሽን ሀእ ኦላን ሀይቄዳ፥ አማነና አሳቱዋና ጪማ ኦላን ገሌድኖ።

30 "ሁጲሳ ባጋ ካፓቱነ ሲዶና አሳቱ ኡባይ ዱፉዋን ደኢኖ። ኡንቱንቱ ካሰ ባረንቱ ዎልቃን አሳ ያሽሴድኖ፤ ሽን ሀእ ኡንቱንቱካ ሹከቴዳዋንቱና ባረንቱ ዬላና ያ ገሌድኖ። ጾሳ አማነናዋንታ ግዲደ፥ ማሻን ሀይቄዳ አሳቱዋና እትፐ ጋከቲደ፥ ዬላቲደ ዱፉዋ ገሊኖ።

31 "ግብጼ ካዉነ አ ኦላንቻቱ ማሻን ሀይቄዳ ኦላንቻቱዋ ያን በኢደ ምነታና። ታን ኡባ ሞድያ መና ጎዳይ ሀዋ ኦዳይ። 32 ታን ሀዋፐ ካሰ ካዉተቱ ኡባይ ግብጼ ካትያዉ ደኡዋን ደእያዋንቱ ቢታን ያያናዳን ኦዳዋ ግዶፐካ፥ እነ አ ኦላንቻቱ ጾሳ አማነናን፥ ማሻን ሀይቄዳ አሳቱዋና እትፐ ግሳና። ታን ኡባ ሞድያ መና ጎዳይ ሀዋ ኦዳይ" ያጌዳ።