ህዝቄላ 6

ጾሳይ ኤቃዉ ጎይንያዋ ፕርዴዳ

1 መና ጎዳ ቃላይ ታኮ ሀዋዳን ያጊደ ዬዳ፤ 2 "ኔኖ አሳ ናአዉ፥ እስራኤልያ ዞዘቱዋኮ ነ ሶምኡዋ ደረቃን ዛራደ፥ ኡንቱንቱ ቦላ ትምቢትያ ኦዳ። 3 ሀዋዳን ያጋ፥ ‘ህንተኖ፥ እስራኤልያ ዞዘቶ፥ ኡባ ሞድያ መና ጎዳ ቃላ ስስተ! ኡባ ሞድያ መና ጎዳይ እስራኤልያ ዞዘቶነ ከራቶ፥ ቡቡሀቶነ ዛንጋራቶ ሀዋዳን ያጌ፤ በእተ፥ ታን፥ ታ ማሻ ህንተ ቦላ የዳና፤ ቃይ ህንተ ኤቃ ጎይንያ ሳኣካ ይሳና። 4 ህንተ ያርሽያ ሳአቱ ኮለተና፤ ቃይ ህንተ እጻና ጩዋይያ ሚሻቱካ መኤረታና። ታን ህንተ አሳ ህንተ ኤቃቱዋ ስንን ዎና። 5 ታን እስራኤልያ አሳ አሃ ኡንቱንቱ ኤቃቱዋ ስንን ግስሳና፤ ህንተ መቀካ ህንተ ያርሽያ ሳአቱዋ ዩሹዋን ላላና። 6 ህንተ ደእያ ሳን ኡባን፥ ህንተ ካታማቱነ ህንተ ጎይንያ ሳአቱ ኮለተና። ሄዋዳንካ ህንተ ያርሽያ ሳአቱ ቱናናነ ላለታና፤ ህንተ ኤቃቱ መኤረታናነ ያና፤ ህንተ እጻና ጩዋይያ ሳአቱካ መኤረት ዎና፤ ህንተ ኦዳ ኦሱ ኡባይ ፕተት ያና። 7 ህንተ አሳይ ሹከቲደ፥ ህንተ ግዶን ኩንዳና። ታን መና ጎዳ ግድያዋ ህንተ ሄዋን ኤራና።

8 " ‘ታን ህንተፐ አማሬዳዋንታ ፓጻ አሻና፤ ማሻፐ አቴዳዋንቱ ቢታነ ካዉተ ግዶን ላለታና። 9 ማሻፐ አቴዳዋንቱ ያን ኦሞዱዋን ደአና። ያን ደእያ ዎደ፥ ኡንቱንቱ ታና ሀሳያና፤ ቃይ ዎሹምያ ዎዛናንነ ባረንቱ አይፍያን ኤቃ ጎይናናዉ ጉየ ስምያዋን፥ ኡንቱንቱ ታ ዎዛና መንዳዋ ሀሳያና። ኡንቱንቱ ባረንቱ ኦዳ ኢታ ኦሱዋፐነ ኡንቱንታ ዬላይያ ሀኖታፐ ደንዴዳዋን፥ ባረና ባረ ሁጲያዉ ሻታና። 10 ቃይ ታን መና ጎዳ ግድያዋ ኡንቱንቱ ኤራና። ታን ኡንቱንቱ ቦላ ኢታባ አሀና ጌዳዌ ጮ መላ ባብሱዋ ግደና’ " ያጌ።

11 ኡባ ሞድያ መና ጎዳይ ታና ሀዋዳን ያጌ፤ "ነ ብራያ ሀንቁዋን ጾርሳ! ይሉዋን ነ ገድያንካ ቢታ ቃካ! ቃይ ሀዋዳን ያጋ፤ ‘እስራኤልያ አሳ ሸነይያ ኦሶ አየ አና!’ ያጋ። አያዉ ጎፐ፥ ኡንቱንቱ ኦላን፥ ኮሻንነ ኢታ ሀርግያን ዉራና። 12 ሃኩዋን ደእያዌ ኢታ ሀርግያን ሀይቃና፤ ማታን ደእያዌ ኦላን ሀይቃና፤ ቃይ ፓጻ አቴዳዌ ኮሻን ሀይቃና። ሄዋዳን ኦደ፥ ታን ታ ሀንቁዋ ኡንቱንቱ ቦላ ዉርሳና። 13 ኡንቱንቱ አሳ አሃይ ኡንቱንቱ ኤቃቱዋ ግዱዋ ኡባን፥ ኡንቱንቱ ያርሽያ ሳ ዩሹዋ ኡባን፥ ቃ ዞዘቱዋ ቦላነ ደረቱዋ ኪክያ ኡባ ቦላን፥ እርጻ ም ጋርሳ ኡባን፥ ዳሮ ቦንጪ ደእያ ኤ ጋርሳ ኡባን፥ ባረንቱ ኤቃቶ ሳዊያ ያርሹዋ ጹጌዳ ሳኣ ኡባን ኩንዴዳ ዎደ፥ ኡንቱንቱ ታን መና ጎዳ ግድያዋ ኤራና። 14 ቃይ ታን ታ ኩሽያ ኡንቱንቱ ቦላ ምጫደ፥ ኡንቱንቱ ደእያ ቢታ ኡባ፥ ገድሳ ባጋ ባዙዋፐ ቢደ ሁጲሳ ባጋ ርብላ ግያ ካታማ ጋካናዉ፥ መላ ኦና። ታን መና ጎዳ ግድያዋ ኡንቱንቱ ሄዋን ኤራና ያጌ ያጋ" ያጊደ ዬዳ።