1 መና ጎዳ ቃላይ ታኮ ሀዋዳን ያጊደ ዬዳ፤ 2 "ላ አሳ ናአዉ፥ ጺሮሳዉ ዝላላ። 3 አባ ዶናን ደእያነ አባ ዶና ዳሮ ቢታቱዋን ደእያ አሳና ዛልእያ፥ ሄ ካታማዉ ሀዋዳን ያጋደ ኦዳ፤ ‘ኡባ ሞድያ መና ጎዳይ ሀዋዳን ያጌ፤ "ኔኖ ጺሮሳ፥ ኔን፥ ታን ፑላን ልከትያዌ ባይና ኩመን ያጋደ ኦቶረታዳ። 4 ነ ዛዋይ አባ ጉልኣና፤ ኔና ኬጽያዋንቱ ኔና ሎይደ ኬጼድኖ። 5 ነ ሳንቃ ሳኒራ ግያ ሳኣፐ ቃንጼዳ ጺዳን ኦድኖ፤ ነ ማርካብያ ቱሳ ሊባኖሳፐ ዬዳ ዝጋፐ ጊግሴድኖ። 6 ማርካብያ ሶልድሳናዉ ሃ ጉየ ፑሻክያ ነ ሞቀቱዋ ባሳነ ኤፐ ኦድኖ፤ ነ ዉይግያ ቆጲሮሳፐ ዬዳ ዱማ ጺዳ ሳንቃን ኦድኖ፤ ሄ ዉይግያ ዳንጋርሳ ዛልያን አሌቀቴዳ። 7 ነ ሻራይ ባንድራዳን ሃኩዋን ቤታና ማላ፥ ኩሽያን ስኪደ አሌቂሴዳ ግብጼቱዋ ሊኑዋፐ ኦሰቴዳዋ፤ ኔና ካምያ ጋርዶቱካ ኤሊሻ ዎምባፐ ዬዳ፥ ሳሉዋ ማላትያነ ኦቻ ቴራ ማላትያ ጫርቂያፐ ኦሰቴዳዋንታ። 8 ነ ማርካብያ ሶልድስያዋንቱ ሲዶናነ አርዋዳ ጌተትያ ካታማቱዋፐ ዬዳዋንታ፤ ነ ማርካብያ ላግያዋንቱ ሎሄዳ ነ አሳቱዋ። 9 ማርካብያ ግዶን ዛኤዳሳ ሽድያዋንቱ ገባላፐ ዬዳ ጭማቱዋነ ኤራንቻ አሳቱዋ፤ አባን ብያ ማርካብያ ኡባን ደእያ ኦሳንቻቱ ነ ግዶን ዎ ዎይ ጉጃ ጊደ ፓሉመቲደ ዛልኢኖ።

10 " ‘ "ፓረሳፐ፥ ሊድያፐነ ሊብያፐ ዬዳ ኦላንቻቱ ነ ኦላንቻቱዋ ማዲደ ኦለቴድኖ፤ ባረንቱ ጎንዳልያነ ባረንቱ ኦላ ቆብያ ነ ግዶን ካቄድኖ፤ ኡንቱንቱ ኔና ቦንችሴዳዋንታ። 11 አርዋደፐነ ሄሌካፐ ዬዳ ኦላንቻቱ ነ ድርሳ ግምቢያን ናጊኖ፤ ጋማዳፐ ዬዳ አሳቱ ነ አዱሳ ግምቢያን ናጊኖ። ኡንቱንቱ ባረንቱ ጎንዳልያ ነ ግምቢያ ዩሹዋን ካቄድኖ፤ ነ ፑላና ልከትያዌ ባይና ኩመን ግዳናዳን ኦዳዋንቱ ኡንቱንታ።

12 " ‘ "ነ ዱረተ ዳሩዋ ጋሱዋን ታርሴስ ኔናና ዛልኤዳ፤ እ ብራ፥ ብራታ፥ ቆርቆሩዋነ እርሳስያ እሚደ፥ ነ ሚሻና ላሜዳ። 13 ግሪኪ፥ ቱባልነ መሸክ ኔናና ዛልኤድኖ፤ አይለቱዋነ ናስያ ብራታፐ ኦሰቴዳ ሚሻ እሚደ፥ ነ ሚሻና ላሜድኖ። 14 ቤት-ቶጋርም ቶግያ ፓራቱዋ፥ ኦላ ፓራቱዋነ ባሉቆቱዋ እሚደ፥ ነ ሚሻና ላሜዳ። 15 ሮዳ ቢታ አሳይ ኔናና ዛልኤዳ፤ ቃይ አባ ዶና ቢታቱዋን አሳይ ዳንጋርሳ ዛልያነ ዞጵያ ግያ ም አሂደ፥ ነዉ ቃንጼዳ።

16 " ‘ "ነ ዱረተ ዳሩዋ ጋሱዋን፥ ሶርያ አሳቱካ ኔናና ዛልኤድኖ፤ ኡንቱንቱ ማታ ማላትያ እንቁዋ፥ ዞኦ እንቁዋ፥ የሌሉዋፐ ኦሰቴዳ አሌቁዋ፥ ኦቻ ቴራ ማላትያ ጫርቂያ፥ ሌኦ ሊኑዋነ አሌቁዋ ስኬዳ ማዩዋ እሚደ፥ ነ ሚሻና ላሜድኖ። 17 ይሁዳነ እስራኤልያ አሳቱ ኔናና ዛልኤድኖ፤ ኡንቱንቱ ምንተ ጋደ ዛርጋ፥ ማልዱዋ፥ ኤሳ፥ ዛይትያነ ባላሳመ ግያ ልያ ዛይትያ እሚደ፥ ነ ሚሻና ላሜድኖ። 18 ነ ዱረተ ዳሩዋ ጋሱዋንነ ነ ሺሼዳ ዱማ ዱማ ሚሻቱዋ ጋሱዋን ዳማስቆ አሳቱ ኔናና ዛልኤድኖ፤ ኡንቱንቱ ሄልቦና ዎይንያ ኤሳነ ሳሆራ ዶርሳ እስክያ እሚኖ። 19 ኡዛላን ደእያ ዳናዌቱነ ግሪከ አሞናቱ ነ ሚሻና ላሜድኖ። ሄዋዳንካ ቃይ፥ ቆጼዳ ብራታነ ዱማ ዱማ ቅማመቱዋ ነዉ እሚደ ላሜድኖ።

20 " ‘ "ዳዳና አሳቱ ኮራ ግላስያ አሂደ ዛልኤድኖ። 21 አራባቱነ ቄዳረ ቢታ ካፓቱ ኡባይ ነ ዛልእያ ሚሻዉ ዶርሳ ማራቱዋ፥ ዶርሳ ኦርገቱዋነ ዴሻቱዋ አሂደ ዛልኤድኖ። 22 ሳባነ ራእማ ዛልአንቻቱ እንቁዋ፥ ዎርቃነ ሎኦ ዶረቴዳ ቅማመቱዋ እሚደ፥ ነ ሚሻና ላሜድኖ። 23 ካራነ፥ ካኔሀ፥ ኤደነ፥ ሳባ፥ አሶረነ ክልማዳ ጌተትያ ካታማቱ ኡባይ ኔናና ዛልኤድኖ። 24 ኡንቱንቱ ሎኦ ማዮቱዋ፥ ሳሉዋ ማላትያ ማዩዋ፥ አሌቁዋ ስኬዳ ማዩዋ፥ ጋዛ ምንጻፈቱዋ፥ ሎይ ዶቄዳ ባቀነ ዎዶሩዋ እሚደ፥ ነ ገያን ሚሻና ላሜድኖ።

25 " ‘ "ነ ሚሻቱ ተርሴሰ ዛልአንቻቱዋ ዎልቃማ ማርካባቱዋን ጫነቲደ ቤድኖ። ኔንካ ዳሮባይ ጫነትና ኩማደ፥ አባ ቦላን ብያ ማርካብያ ማላ ግዳዳ።✝ 26 ነ ማርካብያ ሶልድስያዋንቱ ኔና አኪደ፥ አባዉ ግዶ ግሻቻ አፌድኖ፤ ሽን አዋይ ዉልያ ባጋ ጫርኩ ኔና አባዉ ግዶ ግሸቻን መንሬዳ። 27 ኔን መኤረቴዳ ጋላስ ነ ዱረተይነ ነ ዛልእያ ሚሻይ ኡባይ፥ ነ ማርካብያ ሶልድስያዋንቱ፥ ነ ማርካብያ ላግያዋንቱ፥ ነ ማርካብያ ግዶን ዛኤዳሳ ሽድያዋንቱ፥ ነ ዛልአንቻቱነ ነ ግዶን ኦላንቻቱ ኡባይ አባ ግዶ ሙከቴድኖ። 28 ማርካብያን ብያ አሳቱዋ ዋሱዋ ኮሻይ አባ ጋጻ ጋካናዉ ስሰቴ።

29 " ‘ "ማርካብያ ሶልድስያዋንቱነ ላግያዋንቱ ኡባይ ባረንቱ ማርካበቱዋፐ ከሲደ፥ አባ ጋጻን ኤቄድኖ። 30 ኡንቱንቱ ኡባይካ ባረንቱ ሁጲያን ባና ቆሊደ፥ ብድንን ጎንዶረቲደ፥ ነ ባየ ድራዉ፥ ኢታ ዬኩዋ ዬኬድኖ። 31 ነዉ ካዮቲደ፥ ባረንቱ ሁጲያ ሜዲደ፥ ማቃ ማዬድኖ፤ ኡንቱንቱ ዳሮ ሴለቲደ፥ ነዉ ዬኬድኖ። 32 ነዉ ኡንቱንቱ ሀዋዳን ያጊደ ዝላሌድኖ፤

" ‘ "ሀእ አባ ግዶን ስርጵ ጌዳ፥

ጺሮሳና ልከትያዌ ኦኔ?

33 ነ ዛልእያ ሚሻይ አባ ፕኒደ ይያ ዎደ፥

ቢታን ደእያ ዳሮ አሳ ካልሳዳ፤

ነ ማጹዋን ካተቱ ዱረቴድኖ።

34 ሽን ሀእ አባ ጪማን መኤረታዳ።

ነ ዛልእያ ሚሻይካ፥ ነዉ ኦያ አሳቱ ኡባቱካ፥

ኔናና አባ ግዶን ሙከቲደ ዬድኖ።

35 አባ ዶና ቢታቱዋን ደእያ አሳይ ኡባይ፥

ነ ቦላ ጋኬዳዋ በኢደ ዳጋሜድኖ።

ኡንቱንቱ ካተቱካ ዳሮ ያዬድኖ፤

ኡንቱንቱ ሶምኢ ያሻ ኤርሴ።

36 ነ ዉርሰይ ዳጋንያዋ ግዴዳ፤

ኔን ላኤን ኡባካ ደአካ።

ሄዋ ድራዉ፥ ቢታ ኡባን ደእያ፥

ዛልአንቻቱ፥ ፖራ! ጌድኖ

ያጊደ ዝላሌድኖ" ያጌ’ ያጋ" ያጊደ ዬዳ።