ህዝቄላ 22

የሩሳላመ ናጋራ

1 መና ጎዳ ቃላይ ታኮ ሀዋዳን ያጊደ ዬዳ፤ 2 "ላ አሳ ናአዉ፥ ሱ ጉስያዋንቱ ኩሜዳ ካታማ ቦላ ፕርዳናዉ ጊጋዲ? ያቶፐ፥ እ ኦዳ ቱና ኦሱዋ ኡባ አዉ ኦዳ። 3 ሀዋዳን ያጋ፤ ‘ኡባ ሞድያ መና ጎዳይ ሀዋዳን ያጌ፤ "ኔን ዳሮ አሳ ሱ ጉሴዳ ድራዉነ ኤቃዉ ጎይንያዋን ኔና ቱንሴዳ ድራዉ፥ ነ ዎዲ ዬዳ። 4 ኔን ጉሴዳ ሱን ባይዛንቻ ግዳዳ፤ ነ መዳ ኤቃንካ ቱናዳ። ያትና፥ ነ ፕርዳ ጋላሳይ ማታቴዳ፤ ነ ዉርሰ ላይይካ ጋኬዳ። ሄዋ ድራዉ፥ ታን ኔና ካዉተቶ ካያዋነ ሀራ ቢታቶካ ቅሊጭያዋ ከሳና። 5 ኔኖ፥ ሱን ባዬዳነ ሻቢረቴዳ ካታማትዉ፥ ማታንነ ሃኩዋን ደእያዋንቱ ኔና ቅሊጫና።

6 " ‘ "ነ ግዶን ደእያ እስራኤልያ ካፓቱ ኡባቱ ሱ ጉሳናዉ ባረንቱ ዎልቃ አይ ኬሻ ጎኤትንቶ በአ። 7 ነ ግዶን ደእያዋንቱ ባረንቱ አዉዋነ ባረንቱ አቶ ቦንችክኖ፤ ኡንቱንቱ በተቱዋካ ኡቁኔድኖ፤ አምኤቱዋነ አዉ አታ ባይና ናናቱዋ ናቂኖ።✝22:7 ከሳ 20:12፤ 22:21-22፤ ዛረ. 5:16፤ 24:17 8 ኡንቱንቱ ታ ጌሻ የዎቱዋ ካኖነ ታ ሳምባታካ ቱንሲኖ።✝22:8 ዎጋ 19:30፤ 26:2 9 ነ ግዶን ደእያዋንቱፐ እቱ እቱ ሀራቱዋ ዎሳናዉ ዎርዱዋ ኦዲኖ፤ ሀራቱ ደርያ ቦላ ደእያ ኤቃዉ ጎይንያ ሳአቱዋን ሚኖ፤ ቃይ ሀራቱ ኡባባን ቱንያዋንቱ ነ ግዶን ደእኖ። 10 ነ ግዶን ደእያዋንቱፐ እቱ እቱ ባረ አዉዋ ማቻትና ግሲኖ፤ ሀራቱ ቃይ ፒላይ ዬዳ ማጫ ምሽራትና ዎልቃን ጋከቲኖ።✝22:10-11 ዎጋ 18:7-20 11 ነ ግዶን ደእያዋንቱፐ እቱ እቱ ባረ ሾሩዋ ማቻትና ግሲኖ፤ ባረ ናኣ ማቻትና ግሲኖ፤ ባረ አዉዋ ናት፥ ባረ ምቻትና ዎልቃን ግሲኖ። 12 ነ ግዶን ደእያዋንቱፐ እቱ እቱ ሚሻ አኪደ፥ ሸምፑዋ ዎኖ፤ ሀራቱ ባረንቱ ሚሻ ድቻዉ እሚኖነ፥ ባረንቱ ሾሩዋ ሚሻ ያሽሲደ አኪኖ። ቃይ ህንተ ታና ኡባካ ዶጌድታ። ታን ኡባ ሞድያ መና ጎዳይ ሀዋ ኦዳይ።✝22:12 ከሳ 22:25፤ 23:8፤ ዎጋ 25:36-37፤ ዛረ. 16:19፤ 23:19

13 " ‘ "ነ ግዶን ደእያ አሳይ በሰና ሚሻ አክያ ድራዉነ ሸምፑዋ ዎያ ድራዉ፥ ታን ሀንቁዋን ታ ኩሽያ ባቃና። 14 ታን ኔና ሙርያ ጋላስ ነ ጎባተይ ኔናና ደአኔ? ዎይ ነ ኩሺ ምኖ ግዳኔ? ታን መና ጎዳይ ሀዋ ኦዳድ፤ ታን ኦዴዳዋ ታንካ ኦና። 15 ታን ነ አሳ ካዉተቱዋ ግዶንነ ሀራ ቢታቱዋ ግዶን ላላና፤ ነ ቱናተካ ታን ነ ቦላፐ ይሳና። 16 ሀራ ካዉተቱዋ ስንን ኔን ካዉሻና፤ ሽን ሄ ዎደ ታን መና ጎዳ ግድያዋ ኔን ኤራና" ያጌ’ ያጋ" ያጊደ ዬዳ።

ጾሳ ታማይ ጌሼ

17 ሄዋፐ ጉይያን፥ መና ጎዳ ቃላይ ታኮ ሀዋዳን ያጊደ ዬዳ፤ 18 "ላ አሳ ናአዉ፥ እስራኤልያ አሳይ አይነ ፓና ብራታ ሽኣ ማላ፤ ኡንቱንቱ ኡባይካ ብራ ሙሽሲደ ጌሽያ ዎደ፥ ሽኣ ግዲደ አትያ ናሃስያ፥ ቆርቆሩዋ፥ ብራታነ እርሳስያ ማላ። 19 ሄዋ ድራዉ፥ ኡባ ሞድያ መና ጎዳይ ሀዋዳን ያጌ፤ ‘ህንተ ኡባይካ ብራታ ሽኣ ማላ ግዴዳ ድራዉ፥ ታን ህንተና ኡባካ የሩሳላመ ግዶ ሺሻና። 20 አሳይ ብራ፥ ናስያ፥ ብራታ፥ እርሳስያነ ቆርቆሩዋ ታማ ጮጭያኮ ሺሺደ ዎምፒናን ፑኒደ ሙሽስያዋዳን፥ ታን ታ ሀንቁዋንነ ታ ይሉዋን ህንተና ሺሻደ፥ ካታማ ግዶን ሙሽሳና። 21 ታን ህንተና ሺሻደ፥ ታ ሀንቁዋ ታማ ህንተ ቦላ ዎምፒና ፑንና፥ ህንተ ሄዋን ሙሻና። 22 ብራይ ጮጭያን ሙሽያዋዳን፥ ህንተ የሩሳላመን ሙሻና። ሄ ዎደ ታን መና ጎዳይ ታ ሀንቁዋ ህንተ ቦላ ጉሴዳዋ ህንተ ኤራና’ ያጌ" ያጊደ ዬዳ።

እስራኤልያ አሳ ካለያዋንቱ ናጋራ

23 መና ጎዳ ቃላይ ታኮ ዛሪደካ ሀዋዳን ያጊደ ዬዳ፤ 24 "ላ አሳ ናአዉ፥ ኡንቱንቱ ቢታይ ቱኔዳ ድራዉ፥ ታ ሀንቁዋን እራይ ቡከናዳን ድጋደ፥ ታን እስራኤልያ አሳ ሙሩዋ ዶሞዋ ኡንቱንቶ ኦዳ። 25 ኡንቱንቱ ካፓቱ ባረ ዎዳዋ ጉዲደ መንሬያ ጋሙዋ ማላ፤ ኡንቱንቱ አሳ ዎኖ፤ አልኦ ሚሻ ግድና፥ ሀራ ዱረታ ግድና፥ ኡባ ባረንቶ አኪኖ፤ ኡንቱንቱ ሄ ቢታን ዳሮ ማጫ አሳ አምኤ ከሴድኖ። 26 ቄሳቱ ታ ህግያ መንድኖ፤ ታ ጌሻባካ ቱንሴድኖ። ጌሻነ ቱና ሻክክኖ፤ ቃይ ቱናፐነ ቱና ግደናዋፐ ግዱዋን ደእያ ዱማተ ታማርስክኖ፤ ታ ሳምባታዉ ጋትያ እምበይክኖ። ሄዋፐ ደንዴዳዋን፥ ታን እስራኤልያ አሳ ግዶን ቦንቼታበይከ።✝22:26 ዎጋ 10:10 27 አ ግዶን ደእያ ካፓቱ ባረንቱ ዎዳዋ ዱሰረያ ኦኮሮቱዋ ማላ፤ ኡንቱንቱ ባረንቶ በሰና ዱረተ ደማናዉ ሸምፑዋ ዎኖ። 28 የሩሳላመ ካታማን ትምቢትያ ኦድያዋንቱ ጎዳ ቦሹንቻ ኦክያ አሳዳን፥ ዎርዱዋ ሳፃ በእያዋንነ ዎርዱዋ ትምቢትያ ኦድያዋን፥ ኡንቱንቱ ናጋራ ገንኖ። መና ጎዳይ ኦደናን ደእሺና፥ ‘ኡባ ሞድያ መና ጎዳይ ሀዋዳን ያጌ’ ያጊኖ። 29 ሄ ቢታ አሳቱ ቦንቂኖ፤ ዛራፍኖ፤ ህዬሳቱዋነ መቶታንቻቱዋ ኡቁኒኖ፤ ኡንቱንቱ በተቱዋካ ኡንኤደ ሱረ ፕርዳ ጌላዪኖ።

30 "ታን ቢታ ይሰናዳን፥ ድርሳ ግምቢያ ኬጽያ፥ ኮለቴዳ ድርሳ ፐንግያ ባጋና ኤቂደ ናግያ እት አሳ ኮያድ፤ ሽን ኦናነ ደማበይከ። 31 ሄዋ ድራዉ፥ ታ ሀንቁዋ ኡንቱንቱ ቦላ ጉሳና፤ ታን ታ ሀንቁዋ ታማን ኡንቱንታ ይሳና፤ ታን ኡንቱንቱ ኦዳ ኦሱዋ ኡንቱንቱ ቦላ ዛራና። ኡባ ሞድያ መና ጎዳይ ሀዋ ኦዳይ" ያጊደ ዬዳ።