ህዝቄላ 5

የሩሳላመ ቦላ ይያ ባሻ ማላታ

1 "ኔኖ አሳ ናአዉ፥ ቃራ ማሻ አካደ፥ ነ ሁጲያነ ነ ቡቻ ሁጲያ ጊግስያዋንቱ ምላጭያዳን አን ሜዳ። ያታደ ሚዛናን ልካደ፥ ነ ብናና ሄዙ ከሳደ ሻካ። 2 ኔን ዶድያ ዎዲ ዉርያ ዎደ፥ ነ ሻኬዳ ብናናዉ እት ኩሽያ የሩሳላመ ካታማ ምስልያዉ ግዱዋን ታማን ጹጋ። ላኤን ኩሽያ ካታማ ዩሹዋን ኡባን ማሻን ቃንጸሬ። ሄዘን ኩሽያ ቃይ ጫርኮ ላላ፤ አያዉ ጎፐ፥ ታን ኡንቱንታ ማሻን የደርሳና። 3 ቃይ ሄዋፐ ጉ ብናና አካደ፥ ነ ማዩዋ ጼራን ቃቻ። 4 ሄ ኔን ቃቼዳዋፐ ጉ አካደ፥ ታማን ኦላደ ጹጋ። ሄዋን ዶሜዳ ታማይ እስራኤልያ አሳ ኡባ ጋካናዋ" ያጌዳ።

5 ኡባ ሞድያ መና ጎዳይ ሀዋዳን ያጌ፤ "ሀዌ የሩሳላመ ካታማ፤ ታን ቢታቱዋ እዝ ዩሹዋን ዎደ፥ ካዉተቱዋ ኡባዉ ግዶ ጉልአን እዞ ዎድ። 6 ሽን እዛ ባረ ኢታ ኦሱዋን፥ ባረ ዩሹዋን ደእያ ቢታቱዋፐነ ካዉተቱዋፐ ያ ኢታደ፥ ታ ህግያነ ታ ዎጋ ናገናን እጻዱ፤ ቱሙካ እዛ ታ ህግያዉ ማካላዱ፤ ታ ዎጋካ ካለናን እጻዱ" ያጌ።

7 ሄዋ ድራዉ፥ ኡባ ሞድያ መና ጎዳይ ሀዋዳን ያጌ፤ "ህንተንቱ ህንተ ዩሹዋ ካዉተፐ አደ መቱዋ መድታ፤ ታ አዛዙዋ ካለናንነ ታ ዎጋ ናገናን እጼድታ። ሀራይ አቶ ሽን ህንተንቱ ዩሹዋን ደእያ ካዉተቱዋ ዎጋካ ናግበይክታ" ያጌ።

8 ሄዋ ድራዉ፥ ኡባ ሞድያ መና ጎዳይ ሀዋዳን ያጌ፤ "ኔኖ፥ የሩሳላመ፥ ታን ነዉ ሞርከ፤ ሀራ ካዉተቱ ኡባይ በእሽና፥ ነ ቦላ ታ ፕርዳ አሀና። 9 ኔን ታን እጽያ ኤቃ ጎይና ኡባ ኦዳ ድራዉ፥ ታን ሀዋፐ ካሰ ሀንቤናዋ፥ ቃይ ሀዋፐ ስንዉካ ሀነና ፕርዳ ነ ቦላ አሀና። 10 ሄዋፐ ደንዴዳዋን፥ ህንተ ግዶን አዎቱ ባረንቱ ናናቱዋ ማና፤ ቃይ ናናቱካ ባረንቱ አዎቱዋ ማና። ታን ህንተ ቦላ ፕርዳ አሀና፤ ህንተፐ አቴዳዋንታካ ኦይዱ ጫርኩዋ ሚዛና ኡባዉ ላላና።✝5:10 ስቁዋ 4:10

11 "ሄዋ ድራዉ፥ ታን ኡባ ሞድያ መና ጎዳይ ታ ደኡዋን ጫቃይ: ህንተ ህንተ ሸነይያ ኤቃቱዋንነ ቱና ኦሶቱዋን ታ ጌሻ ጎልያ ቱንሴዳ ድራዉ፥ ታንካ ህንተና ቡ ይሳና። ህንተዉ ቃረትከነ ህንተፐ እቱዋነ አሽከ። 12 ነ አሳፐ እት ኩሺ ካታማ ግዶን ኢታ ሀርግያን ዎይ ኮሻን ሀይቃና፤ ላኤን ኩሺ ካታማፐ ካረና ኦላን ዉራና፤ ቃይ ሄዘን ኩሽያ ታን ኦይዱ ጫርኩዋ ሚዛናዉ ኡባዉ ላላደ፥ ኡንቱንታ ማሻን የደርሳና።

13 "ታ ይሉ ዉራና፤ ታን ኡንቱንቱ ቦላ ሀንቀቴዳ ሀንቁካ ኤቃና፤ ያቶፐ ታ ሀንቁ ዶቻና። ታን ኡንቱንቱ ቦላን ሀንቀቴዳ ሀንቁዋ ዉርስያ ዎደ፥ ታን መና ጎዳይ ቃናትያን ሃሳዬዳዋ ኡንቱንቱ ኤራና።

14 "ህንተንቱ ዩሹዋን ደእያ ካዉተቱዋ ግዶንነ ህንተ ማታና አያ ኡባ ስንን ታን ህንተና ባዙዋነ ቅሊጭያዋ ኦና። 15 ታን ህንተና ታ ሀንቁዋን፥ ታ ይሉዋንነ ቃረታይ ባይና ሴራን ፕርድያ ዎደ፥ ህንተ ህንተ ዩሹዋን ደእያ ካዉተቶ ቅሊጮነ ሸቃዉ፥ ህንተና በኤዳ አሳዉ ናገትያባነ ዳጋምያባ ግዳና። ታን መና ጎዳይ ሀዋ ኦዳድ። 16 ታን ህንተ ቦላ ዎያነ ይስያ ኮሻ ዎንዳፍያ ዱክያ ዎደ፥ ህንተና ይሳናዉ ዱካና። ህንተዉ ኮሻ ያ ያ ዳርሳና፤ የሩሳላመ ካታማ ካይ ገለናዳን፥ ታን ድጋና። 17 ታን ኮሻነ ባዞ ዶኣ ህንተ ቦላ የድና፥ ኡንቱንቱ ህንተ ናናቱዋ ይሳና። ታን ኢታ ሀርግያ፥ ሱ ጉስያዋነ ኦላ ህንተ ቦላ አሀና። መና ጎዳይ ሀዋ ኦዳድ" ያጌ።✝5:17 ሳፃ 6:8