ህዝቄላ 7

እስራኤልያዉ ዉርሰይ ጋኬዳ

1 መና ጎዳ ቃላይ ታኮ ሀዋዳን ያጊደ ዬዳ፤ 2 "ኔኖ አሳ ናአዉ፥ ኡባ ሞድያ መና ጎዳይ እስራኤልያ ቢታዉ ሀዋዳን ያጌ፤ ‘ዉርሰ በእተ! ኡባ ባጋና ቢታ ቦላን ዉርሰይ ጋኬዳ። 3 ሄኮ፥ ዉርሰይ ህንተ ቦላ ጋኬዳ! ታን ታ ሀንቁዋ ህንተ ቦላ የዳና። ታን ህንተ ኦሱዋዳን፥ ህንተ ቦላ ፕርዳና፤ ህንተ ቱና ሀኖታዳን፥ ታን ህንተና ሙራና። 4 ታን ህንተዉ ቃረትከነ ህንተፐ እቱዋነ አሽከ። ህንተ ኢታ ኦሱዋ ድራዉካ ሙራና፤ ህንተ ግዱዋን ደእያ እጸቴዳ ኤቃ ጎይኑዋካ ቆንጭሳና። ታን መና ጎዳ ግድያዋ ህንተ ሄዋን ኤራና’ ያጌ።

5 "ኡባ ሞድያ መና ጎዳይ ሀዋዳን ያጌ፤ ‘ባሻ! ባሻ ቦላን ባሻይ ዬ። 6 ዉርሰይ ጋኬዳ! ዉርሰይ ጋኬዳ! እ ህንተ ቦላን ደንዴዳ። በእተ፥ እ ጋኬዳ! 7 ሀ ቢታን ደእያዋንቶ፥ ህንተ ፕርዳይ ጋኬዳ፤ ዎዲ ጋኬዳ፤ ጋላሳይ ማታቴዳ! ሄዌ ሻቢርሳ ጋላሳፐ አትና፥ ዞዝያ ቦላን ናሸቻን እልልያ ጋላሳ ግደና። 8 ሀእ ማታን ታን ታ ሀንቁዋ ህንተ ቦላ ጉሳና፤ ታ ይሉዋካ ህንተ ቦላን ዉርሳና። ታን ህንተ ኦሱዋዳን፥ ህንተ ቦላ ፕርዳና፤ ህንተ ቱና ሀኖታዳን፥ ህንተና ሙራና። 9 ታን ህንተዉ ቃረትከነ ህንተፐ እቱዋነ አሽከ። ህንተ ኢታ ኦሱዋ ድራዉካ ሙራና፤ ህንተ ግዱዋን ደእያ ኤቃ ጎይኑዋካ ቆንጭሳና። ያቶፐ ህንተ ህንተና ሾጬዳዌ ታና መና ጎዳ ግድያዋ ኤራና።

10 " ‘ሄኮ ጋላሳይ! ሀዌሽ ጋኬዳ! ህንተ ባየይ ህንተ ፐንግያ ጋኬዳ! ህንተ ኢታተይ ኩኩሜዳ፤ ህንተ ኦቶሩካ ጪሼዳ። 11 ማካላ ጋሱዋን ኢታ ኦሱ ዳሬዳ፤ ኡንቱንቱፐ እቱነ አተና፤ ኡንቱንቱ ጮራተፐ፥ ዎይ ኡንቱንቱ ዱረተፐ፥ ዎይ ኡንቱንቱ ቦንቹዋፐ አይነ አተና። 12 ዎዲ ጋኬዳ፤ ጋላሳይካ ማታቴዳ! ሀንቁ አሳ ኡባ ቦላና ግድያ ድራዉ፥ ሻምያዌ ናሸቶፖ፤ ዎይ ዛልእያዌካ ካዮቶፖ። 13 ኡንቱንቱ ላኡ ፓጻ ደእያ ዎድያን፥ ዛልኤዳዌ ባረ ዛልኤዳዎ ጉየ ስመና። እራኤልያ አሳ ኡባ ቦላ ኦደቴዳ ሀ ሳጻይ ላመተና፤ ኡንቱንቱ ናጋራፐ ደንዴዳዋን ኡንቱንቱፐ እቱነ ባረ ሸምፑዋ አሸና። 14 ታ ሀንቁ አሳ ኡባ ቦላ ደእያ ድራዉ፥ ኡንቱንቱ ኦላዉ ኡልቱዋ ፑኒደ፥ ኡባባ ጊግሶፐካ፥ ኦንነ ኦላዉ ከሰና።

እስራኤልያ አሳ ናጋራ ጋሱዋን ይያ ሙሩዋ

15 " ‘ካረና ኦላይ፥ ሶና ኢታ ሀርጊነ ኮሻይ ደኤ። ካታማፐ ጋጻን ደእያዌ ኦላን ሀይቃና፤ ካታማ ግዶን ደእያዋንቱ ኮሻንነ ኢታ ሀርግያን ዉራና። 16 ኡንቱንቱፐ አቴዳዋንቱ፥ ደምባ ጋድያፐ ያሻን ባቃቴዳ ሀራጰቱዋዳን ባረንቱ ናጋራ ጋሱዋን ደርያ ቦላን ኦላና። 17 ኩሽያ ኡባይ ዶንጭላና፤ ጉልባታይ ኡባይ ኮልድና ያሻን ሙሻና። 18 ኡንቱንቱ ማቃ ማያና፤ ቃይ ያሻን ኮኮራና። ኡንቱንቱ ኡባ ሶምኢካ ዬላ ማያና፤ ኡንቱንቱ ኡባ ሁጲካ ሜደታና። 19 ኡንቱንቱ ባረንቱ ብራ ኦግያን ኦላና፤ ኡንቱንቱ ዎርቃይካ ቱናባ ግዳናዋ። ኤጽያ መና ጎዳ ሀንቁዋ ጋላስ፥ ኡንቱንቱ ብራይነ ኡንቱንቱ ዎርቃይ ኡንቱንታ አሻናዉ ዳንዳየና። ኡንቱንቶ በ ግዲደ፥ ናጋራን ገልሴዳ ብራይነ ዎርቃይ ኡንቱንቱ ኡሉዋ ኩሚደ፥ ኡንቱንታ ኮሻፐ አሸና።

20 " ‘ኡንቱንቱ ባረንቱ ሎኦ አሌቁዋን ኦቶረቴድኖ፤ ሄዋንታ ባረንቱ እጸቴዳ ቱና ኤቃነ ዬላይያ ምስልያ መናዉ ጎኤቴድኖ። ሄዋ ድራዉ፥ ታን ሄ ሎኦ አሌኤቁዋ ኡንቱንቶ ቱናባ ከሳድ። 21 ታን ኡንቱንቱ አሌቁዋ ኦሞዱዋ ኦደ፥ አላጋዉነ ቢታ ኡባን ደእያ ኢታቶ አደ እምና፥ ኡንቱንቱ አ ቱናባ ከሳና። 22 ሄ ዎደ ታን ታ ሶምኡዋ ዎራ ዛራና፤ ቃይ ታ ቦንቾ ጌሻ ጎልያ ፓንጋቱ ገሊደ ቱንሳና።

23 " ‘ሱረ ፕርዳ ዩሳን፥ ቢታይ ኡባይ ሱን ኩሜዳ ድራዉነ ካታማይካ ማካላ ኦሱዋን ኩሜዳ ድራዉ፥ ሳንሳላታ ጊግሳ። 24 ኡንቱንቱ ጎለቱዋ ባረሳ ኦና ማላ፥ ታን ኡባፐ ኢታ ካዉተ አሀና። ዎልቃማቱዋ ኦቶሩዋካ ታን ይሳና፤ ኡንቱንቱ ጌሻ ሳአቱካ ቱናና። 25 ዳጋማይ ይያ ዎደ፥ ኡንቱንቱ ሳሩዋ ኮያና፤ ሽን ደምክኖ። 26 ባሻይ ባሻ ቦላ፥ ቃይ ኢታ ኦዱ ኢታ ኦዱዋ ቦላ ያና። ኡንቱንቱ ትምቢትያ ኦድያዋ፥ "ነ ሳፃ ኦዳ" ያጋና። ቄሳቶ ታማርስያ ትምርቲ ያና፤ ጭማቶካ ዞርያዌ ያና። 27 ካቲ ዬካና፤ ካፑ ህዶታ ቃንጻና፤ ሄ ቢታ አሳ ኩሺ ያሻን ኮኮራና። ታን ኡንቱንቶ ኡንቱንቱ ኦሱዋዳን ኦና፤ ኡንቱንቱ ፕርዳዳን፥ ኡንቱንቱ ቦላ ፕርዳና። ታን መና ጎዳ ግድያዋ ኡንቱንቱ ሄዋን ኤራና’ ያጌ" ያጊደ ዬዳ።