ህዝቄላ 40

ህዝቄል ሳጻን የሩሳላመ ቤዳ

1 ኑን ኦሞደቴዳ ላታማነ እቼሸን ላይን፥ የሩሳላመ ጾነቴዳ ታማነ ኦይደን ላይን፥ ኦራ ላይይ ገሌዳ ኮይሮ አግናን ታማን ጋላሳን፥ መና ጎዳ ዎልቃይ ታ ቦላ ደኤ። እ ታና ደንደ የሩሳላመ አፌዳ። 2 ጾሳ ሳጻን እ ታና እስራኤልያ ቢታ አፊደ፥ እት ዳሮ ቃ ደርያ ሁጲያን ኤሴዳ። ሄ ደርያፐ ገድሳ ባጋና ካታማ ማላትያ ግምቢያ ጎለቱዋ በኣድ።✝40:2 ሳፃ 21:10 3 እ ታና ያ አኪደ አፌዳ፤ ታን ናስያ ብራታዳን ጶልያ እት ብታንያ በኣድ። ሄ ብታኒ ሊኑዋፐ ኦሰቴዳ ሜትርያነ ልክያ ጻምኣ ኦይቂደ፥ ድርሳ ፐንገን ኤቄዳ።✝40:3 ሳፃ 11:1፤ 21:15 4 እ ታና ሀዋዳን ያጌዳ፤ "ላ አሳ ናአዉ፥ ኔና ታን ሀ ሳኣ አሄዳዌ ታን ኔና በስያዋ ኡባ ኔን ምንሳ አኬካናሳ። ሄዋ ድራዉ፥ ነ አይፍያን ጼላ፤ ነ ሀይን ስሳ፤ ነ ዎዛናን ዎ። ኔን በእያዋ ኡባ እስራኤልያ አሳዉ ኦዳ" ያጌዳ።

አዋይ ዶልያ ባጋ ፐንግያ

5 ታን ጌሻ ጎልያ ኡባና ዩይ አዳ ድርሳ ግምቢያ በኣድ። ሄ ብታንያ ኩሽያን ልክያ ኡሱፑን አዱሳ ዋ ጻምአይ ደኤ። እት አዱሳ ዋይ እት ዋ ቦላ ኦይዱ ብራቱዋ ጉጄዳዋ። እ ግምቢያ ልኬዳ፤ ግምቢያዉ ጌሳይ 6 ዋ፤ ጎምፓይካ 6 ዋ ግዴዳ።✝40:5—42:20 1 ካታ. 6:1-38፤ 2 ኦዱዋ 3:1-9

6 ሄዋፐ ጉይያን፥ አዋይ ዶልያ ባጋና ደእያ ድርሳ ፐንግያኮ ቤዳ። ደቱዋ ፑደ ከሲደ፥ ፐንግያ ጎጭላ ልክና 6 ዋ ግዴዳ። 7 ሄዋፐ አና፥ ሎሱነ ኡሸቻናነ ሀድርሳና ፐንግያ ናግያዋንቱ ኤቂያ ሄዙ ሄዙ ክፍለቱ ደኢኖ፤ እት እት ክፍሊ 6 ዋ አዱሳነ 6 ዋ አካ። ኡንቱንቱ ግዶን ደእያ ጎዳቱ 5 ዋ ኦርዱዋ። ፐንግያ ናግያዋንቱ ክፍለቱዋፐ ያ ባጋና፥ ጌሻ ጎልያ ጼልያ ባራንዳ ጎጭላይ 6 ዋ።

8 ሄዋፐ ጉይያን፥ ሄ ብታኒ ገልያሳ ባራንዳ ልኬዳ፤ 8 ዋ ግዴዳ። 9 ሄዌ ጌሻ ጎልያ ጼልያ ፐንግያ ዉርሰን ደኤ። ሄ ባራንዳ ቆስለቱዋ ኦርዶተይ ላኡ ላኡ ዋ። 10 አዋይ ዶልያ ባጋ ፐንግያን ሶ ባጋና፥ ገልያ ሎሱዋ ፐንግያ ናግያዋንቱ ክፍለቱ፥ ሀ ባጋና ሄዙ ያ ባጋና ሄዙ ደኢኖ። ኡንቱንቱ ጎምፓይ ኡባዌካ ቃራ፤ ኡንቱንታ ሻክያ ድርሳ ግምቢያ ኦርዶተይካ ቃራ።

11 ሄዋፐ ጉይያን፥ ሄ ብታኒ ድርሳ ፐንግያ አያ ሳኣ ጎምፓ ልኬዳ፤ ኡባና 10 ዋ ግዴዳ። ፐንገቱዋፐ ግዱዋን ደእያ ሎሱ 13 ዋ። 12 እት እት ፐንግያ ናግያዋንቱ ክፍልያ ስንን ደእያ ግምቢያ ጌሳይ እት ዋ፥ ጎምፓይካ እት ዋ ግዴዳ ጎዳይ ደኤ፤ ናግያዋንቱ ክፍለቱ ላኡ ባጋናካ ኡሱፑን ኡሱፑን ዋ።

13 ሀፍንን ደእያ ናግያዋንቱ ክፍለቱዋ ጉየ ጋጻፐ ሄፍንን ደእያ ናግያዋንቱ ክፍለቱዋ ጉየ ጋጻ ጋካናዉ ደእያ ሳኣ ልክና 25 ዋ ግዴዳ። 14 ሄ ብታኒ ዳባባ ጼልያ ዉርሰ ክፍልያ ልክና 20 ዋ ግዴዳ። 15 ፐንግያ ገልያ ሳፐ ቢደ፥ ህን ዉርሰን ደእያ አ ባራንዳ ጋካናዉ ደእያ አዱሳተይ 50 ዋ። 16 ክፍለቱዋ ኡባን ካረ ባጋ ጼልያ ጉ ጉ ማስኮተቱ ደኢኖ፤ ቃይ ክፍለቱዋፐ ግዱዋን ደእያ ጎዳዉካ ማስኮተቱ ደኢኖ። ያነ ሃነ ሻክያ ጎዳቱዋ ቦላን ዛምባ ምስሊ መት ኡቴዳ።

ካረ ዳባባ

17 ሄዋፐ ጉይያን፥ ሄ ብታኒ ታና ካረ ዳባባኮ አፌዳ። ሄዋን ታን ዳባባ ዩሹዋን ሹቻ ሂጸቴዳ ባሱዋነ ሄ ባሱዋ ዩሹዋን ኬጸቴዳ ሀታሙ ክፍለቱዋ በኣድ። 18 ሹቻይ ሂጸቴዳ ባሱ ዳባባ ዩሹዋ ኡባ ጋኬዳ፤ ሄዌ ካረ ዳባባይ ግዶ ዳባባፐ ዝቄ። 19 ግዶ ዳባባኮ ጋያ፥ ቃን ኦሰቴዳ፥ ድርሳ ፐንጊ ደኤ። ሄ ብታኒ ላኡ ፐንገቱዋፐ ግዱዋን ደእያ ሳኣ ልክና ሁጲሳ ባጋነ ገድሳ ባጋ ጎምፓይ 100 ዋ ግዴዳ።

ሁጲሳ ፐንግያ

20 ሄዋፐ ጉይያን፥ ሄ ብታኒ ታና ሁጲሳ ባጋ አፌዳ። ሁጲሳ ባጋ ጼልያ ድርሳ ፐንግያ ጉታራነ ጎምፓ እ ልኬዳ። ሄ ድርሳ ፐንጊ ካረ ዳባባኮ ጋያዋ። 21 ሎሱዋፐ ኡሸቻነ ሀድርሳ ባጋና ደእያ ሄዙ ሄዙ ናግያዋንቱ ክፍለቱ፥ ኡንቱንቱፐ ግዱዋን ደእያ ጎዳቱነ አ ባራንዳይ ኮይሮ አዋይ ዶልያ ፐንግያ ባጋን ልኬዳዋንቱና ብጸ ላገ ግዴድኖ። ድርሳ ፐንግያ ጉታራይ ኡባና 50 ዋ፤ ጎምፓይካ 25 ዋ። 22 ባራንዳይ፥ ማስኮተቱነ መቴዳ ዛምባ ምስሊ ካሰ አዋይ ዶልያ ፐንግያ ባጋን በኤዳዋንቱና እት ማላ። ያ ጋያ ላፑን ደቱ ደኢኖ። ባራንዳይ ዳባባ ስንን ዉርሰ ባጋና ደኤ። 23 አዋይ ዶልያ ባጋዳን፥ ሀ ሁጲሳ ባጋንካ ግዶ ዳባባዉካ ሀራ ፐንጊ ደኤ። ሄ ብታኒ ሀ ላኡ ድርሳ ፐንገቱዋፐ ግዱዋን ሳኣ ልክና 100 ዋ ግዴዳ።

ገድሳ ፐንግያ

24 ሄዋፐ ስሚደ፥ ሄ ብታኒ ታና ገድሳ ባጋ ድርሳ ፐንገ ካለና ባደ፥ ሄዋን ሀራ ድርሳ ፐንግያ በኣድ። እ አ ልክያ ዎደ፥ ግዶ ግምበቱዋነ ሀራቱዋ ልክና እካ ሀራቱዋ ኬሻ ግዴዳ። 25 ልክያ ሀራቱዋዳን፥ ሀ ድርሳ ፐንግያ ማታን ደእያ ክፍለቶ ኡባዉ ማስኮተቱ ደኢኖ። ድርሳ ፐንግያ አዱሳተይ 50 ዋ፤ ጎምፓይካ 25 ዋ። 26 ያ ጋያ ላፑን ደቱ ደኢኖ። ባራንዳይ ዳባባ ስንን ዉርሰ ባጋና ደኤ። ፐንግያ ቦላ ያ ባጋናነ ሀ ባጋና ዛምባ ምስሊ መት ኡቴዳ። 27 ግዶ ዳባባዉካ ሀራ ፐንጊ ደኤ። ሄ ብታኒ ሀ ላኡ ድርሳ ፐንገቱዋፐ ግዱዋን ደእያ ሳኣ ልክና 100 ዋ ግዴዳ።

ግዶ ዳባባዉ ገድሳ ባጋ ፐንግያ

28 ሄ ብታኒ ታና ገድሳ ድርሳ ፐንግያ ባጋና ህን ግዶ ዳባባኮ አፌዳ። እ ድርሳ ፐንግያ ልክና፥ ሀራ ፐንገቱዋና ልከ ግዴዳ። 29 ሄዎ ናግያዋንቱ ክፍለቱ፥ ጎዳቱነ ባራንዳቱ ኡባይ ሀራ ድርሳ ፐንገቱዋና እት ማላ። ሄ ድርሳ ፐንግያ ዩሹዋን ክፍለቱዋ ኡባዉ ማስኮተቱ ደኢኖ። ሀ ፐንግያ አዱሳተይ 50 ዋ፤ ጎምፓይካ 25 ዋ። 30 አ ዩሹዋን ባራንዳቱ ደኢኖ፤ ኡንቱንቱ አዱሳተይ 25 ዋ፤ ጎምፓይካ 5 ዋ። 31 ሄ ባራንዳቱ ካረ ባጋ ዳባባ ጼሊኖ። ፐንግያ ቦላ ያ ባጋናነ ሀ ባጋና ዛምባ ምስሊ መት ኡቴዳ። ያ ጋያ ሆስፑን ደቱ ደኢኖ።

ግዶ ዳባባዉ አዋይ ዶልያ ባጋ ፐንግያ

32 ሄ ብታኒ ታና አዋይ ዶልያ ባጋ ድርሳ ፐንግያና ህን ግዶ ዳባባኮ አፌዳ። እ ሄ ድርሳ ፐንግያ ልክና፥ ሀራ ፐንገቱዋና ልከ ግዴዳ። 33 ናግያዋንቱ ክፍለቱ፥ ጎዳቱነ ባራንዳይ ኡባይ ሀራ ድርሳ ፐንገቱዋና እት ማላ። ሄ ድርሳ ፐንግያ ዩሹዋን ደእያ ክፍለቱዋ ኡባዉ ማስኮተቱ ደኢኖ። ሄ ፐንግያ አዱሳተይ 50 ዋ፤ ጎምፓይካ 25 ዋ። 34 ባራንዳይ ካረ ባጋ ዳባባ ጼሌ። ፐንግያ ቦላ ያ ባጋናነ ሀ ባጋና ዛምባ ምስሊ መት ኡቴዳ። ያ ጋያ ሆስፑን ደቱ ደኢኖ።

ግዶ ዳባባዉ ሁጲሳ ባጋ ፐንግያ

35 ሄ ብታኒ ታና ሁጲሳ ባጋ ድርሳ ፐንግያኮ አፌዳ። እ ሄ ድርሳ ፐንግያ ልክና፥ እካ ሀራ ፐንገቱዋና ልከ ግዴዳ። 36 ናግያዋንቱ ክፍለቱ፥ ጎዳቱነ ባራንዳይ ኡባይ ሀራ ድርሳ ፐንገቱዋና እት ማላ። ሄ ድርሳ ፐንግያ ዩሹዋን ማስኮተቱ ደኢኖ። ሄ ፐንግያ አዱሳተይ 50 ዋ፤ ጎምፓይካ 25 ዋ። 37 ባራንዳይ ካረ ባጋ ዳባባ ጼሌ። ፐንግያ ቦላ ያ ባጋናነ ሀ ባጋና ዛምባ ምስሊ መት ኡቴዳ። ያ ጋያ ሆስፑን ደቱ ደኢኖ።

ያርሹዋ ጊግስያ ክፍለቱዋ

38 ካረ ዳባባዉ ሁጲሳ ባጋና፥ ግዶ ድርሳ ፐንግያ ባራንዳና ኦይቀቴዳ፥ ሀራ ክፍሊካ ደኤ። ጹግያ ያርሾ አህያ መህያ አሹ ሜጨትያዌ ሄ ክፍልያና። 39 ሄ ባራንዳን ሀ ባጋና ላኡ ጻርጴዛቱ፥ ያ ባጋናካ ላኡ ጻርጴዛቱ ደኢኖ፤ ጹግያ ያርሾ፥ ናጋራ ያርሾነ ናቁዋ ያርሾ ሹክያ መህያ ኡባይ ሹከትያዌ ሄ ጻርጴዛቱዋ ቦላና። 40 ባራንዳፐ ካረ ባጋና ሁጲሳ ድርሳ ፐንግያ ማታን ላኡ ጻርጴዛቱ ሀ ባጋና፥ ላኡ ጻርጴዛቱ ያ ባጋና ደኢኖ። 41 ሄዋ ድራዉ፥ ያርሾ ሺቄዳ መሂ ሹከትያ ኡባና ሆስፑን ጻርጴዛቱ ደኢኖ፤ ኡንቱንቱፐ ኦይዳቱ ባራንዳን ደኢኖ፤ ኦይዳቱ ቃይ ካረ ዳባባን ደኢኖ። 42 ቃይ ጹግያ ያርሹዋ ዎናዉ ጊግሴዳ፥ ሹቻፐ ማሰቲደ ኦሰቴዳ ኦይዱ ጻርጴዛቱ ደኢኖ። ኡንቱንቶ ጌሳይ እት ዋ፤ አዱሳተይ እት ዋነ ታካ፤ ቃይ ጎምፓይካ እት ዋነ ታካ። ጹግያ ያርሹዋነ ሀራ ያርሾቱዋ ኡባ ሹክያ ሚሻቱ ሄ ጻርጴዛቱዋ ቦላን ኡቲኖ። 43 ኦይዱ ብራያ አዱቂያ ካቂያ ማጋቱ ጎዳ ቦላ ዩይ አደ ሸት ኡቴድኖ። ያርሾ ሺሽያ አሹ ኡባይ ሄ ጻርጴዛቱዋ ቦላ ዎ።

44 ሄዋፐ ጉይያን፥ ሄ ብታኒ ታና ግዶ ዳባባ ገልሴዳ። ሄዋን ፐንገቱ ግዶ ዳባባኮ ዶየትያ ላኡ ክፍለቱ ደኢኖ። ኡንቱንቱፐ እት ክፍሊ ሁጲሳ ድርሳ ፐንግያ ማታና ገድሳ ባጋ ጼሌ፤ ላኤን ቃይ ገድሳ ድርሳ ፐንግያ ማታና ሁጲሳ ባጋ ጼሌ። 45 ሄ ብታኒ ታና ሀዋዳን ያጌዳ፤ "ገድሳ ባጋ ጼልያ ክፍሊ ጌሻ ጎልያን ኦያ ቄሳቱ ዋ። 46 ሁጲሳ ባጋ ጼልያ ክፍሊ ቃይ ያርሽያሳን ኦያ ቄሳቱ ዋ። ቄሳቱ ኡባይ ጻዶቃ ያራፐ የለቴዳ ሌዋቱዋ፤ መና ጎዳኮ ሺቂደ፥ አስ ኦናዉ በሲኖ ጌተቴዳዌ ኡንቱንቱ ጻላላ" ያጌዳ።

ግዶ ዳባባነ ጌሻ ጎልያ

47 ሄ ብታኒ ዳባባ ልክና አዱሳተይ 100 ዋ፥ ጎምፓይካ 100 ዋ ግዴዳ። ዳባባን ጌሻ ጎልያፐ ስን ባጋና እት ያርሽያሳይ ደኤ። 48 ሄዋፐ ጉይያን፥ እ ታና ጌሻ ጎልያ ባራንዳ አፌዳ። ባራንዳ ገልያ ቆስለ ልክና ጌሳይ 5 ዋ፤ ጎምፓይካ 14 ዋ። ሀድርሳናነ ኡሸቻና ደእያ ጎዳቱዋ ኦርዶተይ ሄዙ ሄዙ ዋ ግዴዳ። 49 ባራንዳ አዱሳተይ 20 ዋ፤ ጎምፓይካ 12 ዋ። ያ ጋያ 10 ደቱ ደኢኖ። ገልያሳን ኡሸቻናነ ሀድርሳና ኤቄዳ ላኡ ቱቀቱ ደኢኖ።