ጎጋ ቦላ ኦደቴዳ ትምቢትያ
(38:1—39:29)
1 መና ጎዳ ቃላይ ታኮ ሀዋዳን ያጊደ ዬዳ፤ 2 "ላ አሳ ናአዉ፥ ማጎጋ ቢታን ደእያ ጎጋኮ፥ መሸካነ ቱባላ አሳዉ ዋና ካፑዋኮ ስማደ፥ አ ቦላ ትምቢትያ ኦዳ።38:2 ሳፃ 20:8 3 ሀዋዳን ያጋ፤ ‘ኡባ ሞድያ መና ጎዳይ ሀዋዳን ያጌ፤ ላ ጎጋ፥ መሸካነ ቱባላ አሳዉ ዋና ካፖ፥ ታን ነዉ ሞርከ። 4 ታን ኔና ጉየ ዛራና፤ ነ ጎጎጩዋን ማጋ ገልሳደ፥ ኔና ነ ኩመን ኦላንቻቱዋና፥ ነ ፓራቱዋና፥ ኩመን ኦላ ሚሻ ማዬዳ ነ ፓራ አሳቱዋናነ ባረንቱ ማሻ ለለስያ፥ ዎልቃማነ ጉ ጎንዳልያ ኦይቄዳ ጉይተ አሳና ኔና ጎቻደ ከሳና። 5 ፓርሰፐ፥ ቶጵያፐነ ሊብያፐ ዬዳ አሳይ ጎንዳልያ ኦይቂደ፥ ሁጲያን ብራታ ቆብያ ዎደ፥ ኡንቱንቱና ግዳና።38:5 ሊብያፐ፦ እብራዌዋን ሄ ቢታይ "ፑጻ" ጌተቴ። 6 ቃይ ጎመርነ አ ኦላንቻቱ ኡባይ፥ ሁጲሳ ጋጻን ቤት-ቶጋርምነ አ ኦላንቻቱ ጉይቲ፥ ሄ ጮራ አሳቱ ኔናና ግዳና።
7 " ‘ኔንነ ኔኮ ሺቄዳ አሳይ ኡባይ ጊግተ፤ ህንተና ማክተ። ያታደ ኔን ኡንቱንታ አዛዝያዋ ግዳ። 8 ዳሮ ዎድያፐ ጉይያን፥ ኔን ኮየታና፤ ስንፐ ያና ላይቱዋን ኔን ዳሮ ዎድያ መላ ግዲደ ደኤዳ ቢታ፥ ኦላፐ ሸምፔዳ ቢታ፥ አን አሳይ ዳሮ ካዉተቱዋፐ እስራኤልያ ደረቱዋኮ ሺቄዳ ቢታ ገሌዳ። ኡንቱንቱ ዳሮ ካዉተቱዋፐ ሺቄዳዋንታነ ኡባይካ ሀእ ሳሩዋን ደእያዋንታ። 9 ኔን፥ ነ ኦላንቻቱነ ኔናና ደእያ ዳሮ ካዉተቱ ጎትያዳን ደንዳና፤ ህንተ ሻርያዳን፥ ቢታ ካማና’ " ያጌ።
10 ኡባ ሞድያ መና ጎዳይ ሀዋዳን ያጌ፤ "ሄ ዎደ ቆፋይ ነ ዎዛና ግዶ ዪና፥ ኔን ኢታባ ሀልቻና። 11 ኔን ሀዋዳን ያጋና፤ ‘ታን ሄ ድረትቤና ቄር ካታማቱ ደእያ ቢታ ገላደ፤ ሄ ዎፑ ጊደ፥ ህርግ ባይናን ደእያ አሳቱዋ፥ ኡንቱንቶ ኡባዉካ ድርሳ፥ ፐንጊ ዎይ ኩሉቡ ባይናዋንታ ታን ኦላና። 12 ታን ኡንቱንታ ኦሞዳናነ ቦንቃና፤ ካሰ መላ ግዴዳ ቢታ ስሚደ ኡቴዳ፥ ካዉተቱዋ ግዶፐ ሺቄዳ፥ ሚዛነ ሚሻ ሞዴዳ፥ ቢታዉ ጉልአን ኡቴዳ አሳ ቦላን ታ ኩሽያ ደንና ያጋና። 13 ሳባ አሳይ፥ ዳዳና አሳይነ ታርሴሰ ካታማቱዋ ዛልአንቻቱ ያላጋ ኦላንቻቱ ኡባይ፥ ኔን ቦንቃናዉ ያድ? ኔን ነ ኦላንቻቱዋ ኦሞዱዋ ቶሳናዉ፥ ብራነ ዎርቃ አፍሳናዉ፥ ሚዛነ ሚሻ አካናዉነ ሎይ ዳሮ ኦሞዱዋ ኦይቃናዉ ሺሻዲ? ያጋና’ ያጌ" ያጋ።
14 ሄዋ ድራዉ፥ "አሳ ናአዉ፥ ጎጋ ቦላ ትምቢትያ ኦዳ። ሀዋዳን ያጋ፤ ‘ኡባ ሞድያ መና ጎዳይ ሀዋዳን ያጌ፤ ሄ ዎደ፥ ታ አሳይ እስራኤሊ ህርግ ባይናን ደእያ ዎደ፥ ኔን አኬካና። 15 ኔን ደእያ ሁጲሳ ጋጻ ቢታፐ ያና። ኔንነ ኔናና ጮራ ካዉተቱ ፓራ ቶጊደ፥ ምኖ ኦላንቻ ግዲደ፥ ጉይቲ ያና። 16 ቢታ ካምያ ሻርያዳን፥ ኔን ታ አሳ እስራኤልያ ቦላ ኦላና። ላ ጎጋ፥ ስንፐ ያና ዎደ፥ ታን ኔና ታ ቢታ ቦላ ዎራጅሳና። ሄዋ ታን ኦያዌ ካዉተቱ ታና ኤራናሳነ ታን ነ ባጋና ኦያዋን ታ ጌሻተይ ኡንቱንቱ ስንን ቤታናሳ’ " ያጌ።
17 ኡባ ሞድያ መና ጎዳይ ሀዋዳን ያጌ፤ "ታን ታ ቆማቱዋ ባጋና፥ እስራኤልያን ትምቢትያ ኦድያዋንቱ ባጋና ካሰ አዳ ዎደ ኦዴዳዌ ኔና። ኡንቱንቱ ሄ ዎደ ዳሮ ላይ ታን ኔና ኡንቱንቱ ቦላ አሀናዋ ኦዴድኖ" ያጌ።
ጎጋ ቦላ ይያ ፕርዳ
18 ኡባ ሞድያ መና ጎዳይ ሀዋዳን ያጌ፤ "ጎግ እስራኤልያ ቦላ ገልያ ዎደ፥ ታ ሀንቁ ሱላና። 19 ሄ ዎደ እስራኤልያ ቢታን ዎልቃማ ቢታ ቃይ ሀናና፤ ሄዋ ታን ታ ምሹዋንነ ታ ኤጽያ ሀንቁዋን አዋያይ። 20 አባ ሞሊ፥ ሳሉዋ ካፉ፥ ደርያን ደእያ መሂነ ዶአይ፥ ሳኣ ቦላን ዎጽ ቃጽያ መታ ኡባይነ ሳኣን ደእያ አሳይ ኡባይ ታ ስንን ኮኮራና። ደረቱ ኩንዳና፤ አፎቱካ ዎዳና፤ ቃይ ድርሳ ግምቢ ኡባይካ ኮለተና። 21 ታን ታ ደረቱዋ ኡባን ጎጋ ቦላ ማሻይ ደንዳናዳን ኦና፤ ኦላንቻቱ ባረንቱ ማሻ ባረንቱ ቦላ ዛሪደ፥ እቱ እቱዋ ሲፋና። ታን ኡባ ሞድያ መና ጎዳይ ሀዋ ኦዳይ። 22 ታን ኢታ ሀርግያንነ ሀይቁዋን አ ሙራና፤ ቃይ ዎልቃማ እራ፥ ሻቻ፥ ኤጽያ ዲንያ ታን አ ቦላ፥ አ ኦላንቻቱዋ ቦላነ አናና ደእያ ጮራ ካዉተቱዋ ቦላ ቡክሳና። 23 ሄዋዳን ኦደ፥ ታን ታ ግታተነ ታ ጌሻተ በሳና። ቃይ ዳሮ ካዉተቱዋ ታን ታናተ ኤርሳና። ታን መና ጎዳ ግድያዋ ኡንቱንቱ ሄዋን ኤራና" ያጌ ያጋ።