ህዝቄላ 44

አዋይ ዶልያ ፐንግያ ዎጋ

1 ሄዋፐ ጉይያን፥ ሄ ብታኒ ታና ጉየ ዛሪደ፥ ጌሻ ጎልያዉ አዋይ ዶልያ ባጋና ደእያ ካረ ባጋ ድርሳ ፐንግያኮ አህያ ዎደ፥ ድርሳ ፐንጊ ጎርደት ኡቴዳ። 2 መና ጎዳይ ታና ሀዋዳን ያጌዳ፤ "ሀ ፐንጊ ጎርዱዋን ደእ ባሻናፐ አትና፥ ላኤን ዶየተና። አሳይካ አናና ገለና፤ አያዉ ጎፐ፥ መና ጎዳይ እስራኤልያ ጾሳይ አናና ገሌዳ። ሄዋ ድራዉ፥ ሄ ፐንጊ ጎርዱዋን ደአና። 3 ግዶፐነ፥ እስራኤልያ ቄስያ ጻላላይ መና ጎዳ ስንን ኡክ ማናዉ ሄዋን ኡታና ዳንዳዬ። ፐንግያ ባራንዳና እ ገላናዉነ ከሳናዉ ዳንዳዬ" ያጌዳ።

ጌሻ ጎልያ ገልያ ዎጋ

4 ሄዋፐ ጉይያን፥ ሄ ብታኒ ታና ሁጲሳ ፐንግያኮ አፍያ ኦግያና አፊደ፥ ጌሻ ጎልያ ስን ባጋ ጋዳ። ሄዋን ታን ጼልያ ዎደ፥ መና ጎዳ ቦንቹ መና ጎዳ ጎልያ ኩም ኡቴዳዋ በኣድ፤ ሄኮ፥ ታ ሶምኡዋ ቢታ ጋደ ጉፋናድ።

5 ያትና፥ መና ጎዳይ ታና ሀዋዳን ያጌዳ፤ "ላ አሳ ናአዉ፥ መና ጎዳ ጌሻ ጎልያ ዎጋቱዋ ኡባነ አ ህገቱዋ ኡባ ጼልያዋን ታን ነዉ ኦድያዋ ነ ሀይን ሎይደ ስሳ፤ ነ አይፍያንካ ሎይደ ጼላ። ጌሻ ጎልያ ገላናዉነ ከሳናዉ በስያ አሳቱነ በሰና አሳቱ ሀቃዋንተንቶ ሎይደ አኬካ። 6 ማካላንቻ እስራኤልያ አሳዉ ሀዋዳን ያጋደ ኦዳ፤ ‘ኡባ ሞድያ መና ጎዳይ ሀዋዳን ያጌ፤ "ህንተኖ፥ እስራኤልያ አሳቶ፥ ህንተ ኦያ ቱና ኦሱ ኤቆ። 7 ህንተ ታዉ ታ ቁማ፥ ሞዋነ ሱ ያርሹዋ ኦደ ሺሽያ ዎደ፥ ዎዛናይነ አሹ ቃጻረትቤና አላጋ አሳቱዋ ታ ጌሻ ጎልያ ገልሲደ፥ ኡንቱንቱ አ ቱንሳናዳን ኦድታ። ህንተ ቱናተ ኡባ ቦላንካ ጉጂደ፥ ታ ቃላ ጫቁዋ ኮሌድታ። 8 ቃይ ታ ጌሻ ሚሻቱዋ ቦላ አዎተናን እጺደ፥ ታ ጌሻ ጎልያን አላጋቱዋ አዎዬድታ" ያጌ።

9 " ‘ሄዋ ድራዉ፥ ኡባ ሞድያ መና ጎዳይ ሀዋዳን ያጌ፤ "እስራኤልያ አሳ ግዶን ደእያ አላጋ አሳይ፥ ባረ ዎዛናንነ ባረ አሹዋን ቃጻረትቤናዌ፥ ኦንነ ታ ጌሻ ጎልያ ገሎፖ።

ሌዋቱ አክያ ሙሩዋ

10 " ‘ "ታፐ ሃኬዳ ሌዋቱ፥ እስራኤልያ አሳይ ታና አጊደ ዎራ ስምና፥ ባረንቱ ኤቃቶ ጎይናናዉ ዎራ ስሜዳዋንቱ፥ ባረንቱ ሙሩዋ አክኖ። 11 ግዶፐነ፥ ኡንቱንቱ ታ ጌሻ ጎልያን ኦሳንቻ ግድኖ፤ ታ ጌሻ ጎልያ ድርሳ ፐንገቱዋ ናግኖ፤ ጌሻ ጎልያ ኦሱዋካ ኦኖ። ኡንቱንቱ ጹግያ ያርሹዋነ አሳይ አህያ ሀራ ያርሹዋ ሹክኖ፤ ቃይ አሳዉ ኦናዉ፥ ኡንቱንቱ አሳኮ ሺቅኖ። 12 ሽን ኡንቱንቱ ካሰ እስራኤልያ አሳ ኤቃቶ ጎይንሴዳ ድራዉነ አሳ ናጋራን ኩንድስያ በ ግዴዳ ድራዉ፥ ኡንቱንቱ ባረንቱ ናጋራ ሙሩዋ አካናዳን፥ ታን ኩሽያ ደንደ ጫቃድ። ታን ኡባ ሞድያ መና ጎዳይ ሀዋ ኦዳይ። 13 ኡንቱንቱ ቄስያ ግዲደ ኦናዉ ታኮ ሺቆፕኖ፤ ዎይ ታዉ ዱማቴዳ ጌሻባኮነ ኡባፐ አዳ ጌሻባኮ ሺቆፕኖ። ኡንቱንቱ ባረንቱ ኦዳ ቱና ኦሱዋ ድራዉ፥ ዬላ ማይኖ። 14 ግዶፐነ፥ ኡንቱንቱ ጌሻ ጎልያን አዎታናዳንነ አ ግዶን ኦናዉ ደእያ ኦሱዋ ኡባካ ኦናዳን፥ ታን ኡንቱንታ ሱንና።

ቄሳቱ ዋ ዎጋ

15 " ‘ "ሽን እስራኤልያ አሳይ ታና አጊደ፥ ዎራ ስሜዳ ዎደ፥ ታ ጌሻ ጎልያ ዎጋ አማነቲደ ፖሌዳ፥ ሌዊያ ዛረ ቄሳቱ፥ ጻዶቃ ያራቱ፥ ኡንቱንቱ ታዉ ኦናዉ ታኮ ሺቅኖ። ሞዋነ ሱ ሺሺደ፥ ኡንቱንቱ ታ ስንን ኦኖ። ታን ኡባ ሞድያ መና ጎዳይ ሀዋ ኦዳይ። 16 ታ ጌሻ ጎልያ ኡንቱንቱ ገልኖ፤ ታዉ ኦናዉ ታ ያርሽያ ሳ ኡንቱንቱ ሺቅኖ፤ አዎተካ ኡንቱንቱ ኦይቂኖ። 17 ኡንቱንቱ ጌሻ ጎልያዉ ግዶ ዳባባ ገልያ ዎደ፥ ሊኑዋፐ ዳደቴዳ ማዩዋ ማይኖ፤ ግዶ ዳባባ ፐንገን ዎይ ጌሻ ጎልያ ግዶን ኦያ ዎደ፥ ሱፍያ ማዩዋ ማዮፕኖ።✝44:17-18 ከሳ 28:39-43፤ ዎጋ 16:4 18 ኡንቱንቱ ባረንቱ ሁጲያን ላይኑዋ ሻሽያ ጻጽኖ፤ ባረንቱ ጼሳንካ ላይኑዋ ቃን ሱርያ ዳንጭኖ። ባረንታ ጫዋይያዋ አያነ ማዮፕኖ። 19 አሳይ ደእያ ካረ ዳባባ ኡንቱንቱ ከስያ ዎደ፥ ጌሻ ጎልያን ኦደ ማዬዳ ማዩዋ ቃሪደ፥ ጌሻ ክፍለቱዋን ዎኖ። ሄዌ ዮፐ፥ ኡንቱንቱ ባረንቱ ጌሻ ማዩዋን አሳ ጾሳዉ ጌሻና።✝44:19 ዎጋ 16:23

20 " ‘ "ቄሳቱ ባረንቱ ሁጲያ ሜደቶፕኖ፥ ዎይ ባረንቱ ብናና አዱሶፕኖ፤ ባረንቱ ሁጲያ ልክያን ቃንጽስኖ።✝44:20 ዎጋ 21:5 21 አይ ቄሲነ ግዶ ዳባባ ገልያ ዎደ፥ ዎይንያ ኤሳ ኡሾፖ።✝44:21 ዎጋ 10:9 22 ኡንቱንቱ አስናይ ሀይቄዳ፥ ዎይ የደቴዳ ማጫ አሳ አኮፕኖ። እስራኤልያ አሳፐ ጌላያቶ አክኖ፤ ዎይ አስናይ ቄስያ ግዲደ ደኢድ ሀይቄዳ ማጫ አሳ አክኖ።✝44:22 ዎጋ 21:7፣ 13-14

23 " ‘ "ቄሳቱ ጾሳዉ ዱማቴዳዋፐነ ዱማተናን ጮ ደእያዋፐ ግዱዋን ደእያ ዱማተ ታ አሳ ታማርስኖ። ቃይ ጌሻፐነ ቱናፐ ግዱዋን ደእያ ዱማተ ኡንቱንቱ በስኖ።✝44:23 ሳፃ 10:10 24 አይ ሞቱ ደንዶፐካ፥ ቄሳቱ ታ ህጊ ኦድያዋዳን ፕርድኖ። ታ ህግያነ ታ ዎጋ ናጊደ፥ ታ ባላቱዋ ቦንችኖ፤ ታ ሳምባታካ ዱማዪደ ቦንችኖ።

25 " ‘ "ቄሲ ሀይቄዳ አሃኮ ሺቂደ፥ ባረና ቱንሶፖ። ግዶፐነ፥ ሀይቄዳዌ አዉዋ፥ ዎይ አቶ፥ ዎይ የሌዳ አቱማ ናኣ፥ ዎይ ማጫ ናኣ፥ ዎይ እሻ፥ ዎይ አስና ገላቤና ምቻቶ ግዶፐ፥ አሃ ቦቻናዉ ዳንዳዬ።✝44:25 ዎጋ 21:1-4 26 እ ባረ ቱናተፐ ጌዬዳዋፐ ጉይያን፥ ላፑን ጋላሳ ፓይዲደ ታኮ። ሄዋፐ ጉይያን፥ እ ጌሻ ግዳና። 27 ሄዋፐ ስሚደ፥ ጌሻ ሳኣን ኦናዉ ግዶ ዳባባ ብያ ጋላስ፥ ባረ ናጋራ ያርሹዋ ሺሾ። ታን ኡባ ሞድያ መና ጎዳይ ሀዋ ኦዳይ።

28 " ‘ "ቄሳቶ ላታይ ባዋ፤ ታን ኡንቱንቶ ላታ። እስራኤልያ ቢታን ኡንቱንቶ አይ ላታነ እሞፕተ፤ ኡንቱንቱ ላታይ ታና።✝44:28 ፓይ. 18:20 29 ኡንቱንቱ ካ ያርሹዋ፥ ናጋራ ያርሹዋነ ናቁዋ ያርሹዋ ሚኖ። እስራኤልያ ቢታን መና ጎዳዉ ዱማዬዳዌ ኡባይ ኡንቱንቱሳ።✝44:29-30 ፓይ. 18:8-19 30 ኮይሮ ጋክያ ዱማ ዱማ ካዉ ኮይሮ አይፊነ ህንተ ጾሳዉ እምያ እሞታ ኡባይ ቄሳቱ ዋሳ። ህንተ ጎልያን አንጁ ሸምፓና ማላ፥ ህንተ ልያፐ ኮይሮ ኩሽያ ኡንቱንቶ እምተ። 31 ቄሳቱ ባኩቴዳዋ ዎይ ዶአይ ዎዳዋ ካፉዋ አሹዋ ግድና፥ መህያ አሹዋ ግድና፥ አያነ ሞፕኖ።✝44:31 ዎጋ 22:8