አማነተና የሩሳላሞ
1 መና ጎዳ ቃላይ ታኮ ሀዋዳን ያጊደ ዬዳ፤ 2 "ላ አሳ ናአዉ፥ የሩሳላሞ እ ቱና ኦሶቱዋ ኤርሳ። 3 ሀዋዳን ያጋ፤ ‘ኡባ ሞድያ መና ጎዳይ የሩሳላሞ ሀዋዳን ያጌ፤ "ነ ማይዛይነ ነ ሼሻይ ካናነ ቢታና፤ ነ አዉ አሞረ ቢታ አሳ፤ ነ አታካ ሂተ ቢታ አሳ። 4 ነ የለታይ ጋላስ ነ ጉልአይ ቃንጸትቤና፤ ዎይ ኔና ጌሻናዉ ሃን ሜጨታባካ፤ ዎይ ማጽንያን ጎርፐታደ ጫርቂያን ጻጸታባካ። 5 ሀ ጌተቴዳዋንቱፐ እቱዋነ ኦናዉ ነዉ ካዮቴዳዌ ባዋ። ኔን የለቴዳ ጋላስ ካቴዳ ድራዉ፥ ደምባን ኦለታዳፐ አትና፥ ነዉ ኦንነ ቃረትቤና።
6 " ‘ "ሄዋና ታን ካንደ፥ ኔን ነ ሱ ግዶን ሙርቁቃደ ዞሄትሽና በኣድ፤ ኔን ነ ሱ ግዶን ግሳ ደእሺና፥ ፓጻ ደአ ያጋድ። 7 ታን ኔና ሾይቃን ደእያ ካዳን ድቻድ። ኔን ድጫ አዱቃደ፥ ጋማ ጋካዳ። ነ ንይ ኡቴዳ፤ ነ ብናናይካ ድጬዳ፤ ሽን ኔን ጺራ ካሎ አታዳ።
8 " ‘ "ላኤንዋ ታን ሄዋና አደ፥ ኔና ጼልያ ዎደ፥ ኔን ዎዶሮ ጋካደ ቦርሴዳ አሳ ግዳዳ። ያትና፥ ታ ማዩዋ ነ ቦላ የጋደ፥ ነ ካሉዋ ካማድ። ታን ነዉ ጫቃደ ኔናና ጫቁዋ ጫቀትና፥ ኔን ታኖ ግዳዳ። ታን ኡባ ሞድያ መና ጎዳይ ሀዋ ኦዳይ።
9 " ‘ "ታን ነ ቦላይ ሱን ባዬዳዋ ሃን ሜጫ ጌሻደ፥ ዛይትያን ኦካድ። 10 ታን ኔና ጽባብያ ቃምሽያ ማይዛድ፤ ቃይ ሎኦ ጋልባፐ ኦሰቴዳ ጫማካ ዎስሳድ፤ ቃይ ላይኑዋ ሻሽያካ ኔና ጎዝሳድ፤ ቃይ አልኦ ኩታካ ቁማይሳድ። 11 ኔና ታ አሌቁዋን አሌቃድ፤ ነ ኩሽያን ሳጋዩዋ ዎድ፤ ነ ቆያንካ ቆያ አሌቁዋ ዎድ። 12 ቃይ ነ ሲያን ጉትቻ፥ ነ ሀይንካ ጉትቻ፥ ነ ሁጲያንካ ሎኦ ካላቻ ዎድ። 13 ኔን ዎርቃንነ ብራን አሌቀታዳ፤ ነ ማዩ ኡባይ ፓጻ ላይኑዋ፥ አልኦ ኩታነ አሌቆ ቃምሽያ። ነ ምያ ቁማይ በርተ ልያ፥ ኤሳነ ዛይትያ። ኔን ሎይ ዳሪ ፑላንቻ ግዳደ፥ ካታቶ ከሳናዉ ደንዳዳ። 14 ኔን ፑላንቻ ግድያ ድራዉ፥ ካዉተቱዋን ኤረታዳ። አያዉ ጎፐ፥ ታን ነዉ እሜዳ ቦንቹ ኔና ሀዋዳን ፖሎ ኦዳ። ታን ኡባ ሞድያ መና ጎዳይ ሀዋ ኦዳይ።
15 " ‘ "ሽን ኔን ነ ፑላን አማነታዳ፤ ሀራቱዋን ኤረቴዳዋፐ ደንዴዳዋን ሻርሙጻ ግዳዳ፤ ኦግያና አያ ኡባዉ ኔና አ እማዳ። 16 ነ ማዩዋፐ አማሬዳዋ አካደ፥ ጎይንያ ሳኣ መደ አሌቂሳዳ፤ ያታደ ያን ሻርሙጻዳ። ሄዋ ማላ ሀኖታይ ሀዋፐ ካሰ ሀንቤና፤ ሀዋፐ ስንናዉካ ሀናናዉ በሰና። 17 ነዉ እሜዳ ዎርቃፐነ ብራፐ ኦሰቴዳ ሎኦ አሌቁዋ፥ አቱማ ምስለቱዋ ኦደ መዳ፤ ያታደ ኡንቱንቱና ሻርሙጻዳ። 18 ታን እሜዳ አሌቆ ማዩዋ ሄ ምስለቱዋ ማይዛዳ። ቃይ ታ ዛይትያነ ታ እጻና ኡንቱንቶ ሺሻዳ። 19 ቃይ ታን ነዉ እሜዳ ቁማ፥ በርተ ልያ፥ ዛይትያነ ኤሳ ኡንቱንቱ ስንን ሳዉዋ ቶሹኩ ግያ ያርሹዋ ኦደ ሺሻዳ። ሀዌካ ሀኔዳ። ታን ኡባ ሞድያ መና ጎዳይ ሀዋ ኦዳይ።
20 " ‘ "ቃይካ፥ ኔን ታዉ የሌዳ አቱማ ናናቱዋነ ማጫ ናናቱዋ አፋደ፥ ኤቃቱ ማና ማላ ቁማ ኦደ ያርሻዳ። ኔን ሻርሙጻ ከሴዳዌ ነዉ ጉጼዴ? 21 ኔን ታ ናናቱዋ ሹካደ፥ ኤቃዉ ታማን ያርሻዳ። 22 ኔን ቱናተንነ ነ ሻርሙጻን ኡባን ደኣደ፥ ካሰ ነ ያላጋተ ላይ፥ ጺራ ካሎ ነ ሱን ሙርቁቃደ፥ ዞሄቴዳ ዎድያ ዶጋዳ።
23 " ‘ "አየ አና! ነዉ አየ አና! ታን ኡባ ሞድያ መና ጎዳይ ሀዋ ኦዳይ። ሀ ነ ኢታተ ኡባ ቦላ ቃይ፥ 24 ዳባባ ኡባን ቃ ሳኣ ግምባደ ኤቃዉ ጎይንያ ሳአቱዋ ነዉ ጊግሳዳ። 25 ኦገ ዶናን ኡባን ሻርሙጽያ ሳአቱዋ ኬጻዳ፥ ነ ፑላ ቱንሳዳ፤ ኦግያና ካንያ ኡባዉ ነ አሳተ አ እማደ፥ ሻርሙጹዋ ዳርሳዳ። 26 ኔን አሞ ጻላላን ኩሜዳ፥ ነ ሾሮ ግብጼቱዋና ሻርሙጻዳ፤ ነ ሻርሙጹዋ ዳሩዋንካ ታና ሀንቀዳ። 27 ሄዋ ድራዉ፥ ታን ታ ኩሽያ ነ ቦላ የዳድ፤ ኔና ጋክያ ነ ሻኩዋካ ጉድ። ታን ኔና ነ ፖኮ ሀኖታን ዬላትያ፥ ኮዮዋ ኦናዳን ነ ሞርከቱዋ ፕልስጼማ ማጫ አሳቱዋ ሸንያዉ አደ እማድ። 28 ኔን አለና አሳ ግድያ ድራዉ፥ አሶረ ቢታ አሳናካ ሻርሙጻዳ። ሄ ኡባንካ ሀዌ ታዉ ግዳና ጋባካ። 29 ሄዋፐ ቃይ፥ ዛልእያን አቄዳ ባብሎነቱዋናካ ሻርሙጽያዋ ዳርሳዳ፤ ሄዋንካ ግዳናዋ ጋባካ።
30 " ‘ "ኔን ሀ ዬላይ ባይና ሻርሙጻቲዳን ሀንያና፥ ነ አይባ ላፋ አሴ! ታን ኡባ ሞድያ መና ጎዳይ ሀዋ ኦዳይ። 31 ኔን ኦግያ ዶናን ሻርሙጽያ ሳአቱዋ ነዉ ኬጻዳነ ዳባባ ኡባን ኤቃዉ ጎይንያ ሳአቱዋ ጊግሳዳ። ሽን ሀራ ሻርሙጻቱዋዳን፥ ሻርሙጻቱ አክያ ሚሻካ አካባካ።
32 " ‘ "ሀነ ሀ ሻርሙጻ ማጫ ምሽራቴ፥ ኔን ነ አስና ጭማደ፥ አላጋቱዋና ግሳዳ! 33 አቱማ አሳይ ሻርሙጻቶ ሚሻ ጭጌ፤ ሽን ኔን ኔናና ግስያዋንቶ እሞታ እማሳ፤ ኡንቱንቱ ኡባ ሳፐ ኔኮ ያናዳን፥ ማጋንጻ ኡንቱንቶ እማሳ። 34 ሄዋን ነ ሻርሙጻተይ ሀራ ማጫ አሳቱዋፐ ዱማ፤ ኔናና ሻርሙጻናዉ ኔና ካልያዌ እቱነ ባዋ። ሀራይ ነዉ ጭገናን፥ ያ ጭጋደ ሻርሙጽያዋን፥ ሀራቱዋፐ ኔን ዱማ" ያጌ።
ጾሳይ የሩሳላመ ቦላ ፕርዳና
35 " ‘ሄዋ ድራዉ፥ ሀኔ ሻርሙጻቴ፥ መና ጎዳ ቃላ ስሳ! 36 ኡባ ሞድያ መና ጎዳይ ሀዋዳን ያጌ፤ "ኔን ነ ሻርሙጻተ አሙዋን ነ ላገቶ ነ ቦላ ቃሬዳ ድራዉ፥ ነ ቱና ኤቃቱዋ ኡባ ድራዉነ ነ ናናቱዋ ሱ ኔን ኡንቱንቶ ጉሴዳ ድራዉ፥ 37 ኔን ኡንቱንቱን ናሸቴዳ ነ ላገቱዋ ኡባ፥ ኔን ሲቅያዋንታነ ኔን እጽያዋንታ ታን ነዉ ሞርከ ኦደ ሺሻና። ታን ኡንቱንታ ነ ቦላ ኡባ ሳና ሺሻደ፥ ኡንቱንቱ ስንን ኔና ሙልጹ ኦደ ቃራና፤ ኡንቱንቱ ነ ካሉዋ በአና። 38 ታን ሻርሙጼዳ ማጫ አሳቱዋ ቦላነ ሱ ጉሴዳ ማጫ አሳቱዋ ቦላ ፕርድያዋዳን፥ ነ ቦላ ፕርዳና፤ ታን ታ ሀንቁዋንነ ታ ምሹዋን ነ ቦላ ሀይቁዋ አሀና። 39 ታን ኔና ነ ላገቶ አ እማና፤ ኡንቱንቱ ነ ሻርሙጽያ ሳአቱዋነ ኤቃዉ ጎይንያ ሳአቱዋ ኮል ይሳና። ኡንቱንቱ ነ ማዩዋ ሙልጹ ኦ ቃሪደ፥ ነ ሎኦ አሌቁዋካ ዎ አኪደ፥ ኔና ካሎ ጺራ አሻና። 40 ኡንቱንቱ ኔና ሹቻን ጫድ ዎያነ ባረንቱ ማሻን ቃንጸሬያ ጉይተ አሳ ነ ቦላ ኡንቱንቱ አሀና። 41 ኡንቱንቱ ነ ጎልያ ጹጊደ፥ ዳሮ ማጫ አሳ ስንን ነ ቦላ ፕርዳና። ታን ነ ሻርሙጻተ አግሳና፤ ኔንካ ነ ላገቶ ላኤን ያ ሚሻ ጭጋካ። 42 ሄዋዳን ኦና፥ ታን ነ ቦላ ሀንቀቴዳ ሀንቁ ዛርባና፤ ታን ነ ሀኖታን ምሸቴዳ ምሹካ ሄዋን አና። ታን ሄዋን ዎፑ ጋደ፥ ላኤን ሀንቀትከ።
43 " ‘ "ኔን ነ ያላጋተ ላይ ዶጋደ፥ ሀ ኢታ ኦሱዋ ኡባን ታና ሀንቀዳ። ሄዋ ድራዉ፥ ቱሙዋፐ ነ ኦዳዋ ኡባ ታን ነ ቦላን ዛራና። ኔን ነ ቱና ኦሶቱዋ ኡባ ቦላ ሻርሙጻተ አያዉ ጉጃዲ? ታን ኡባ ሞድያ መና ጎዳይ ሀዋ ኦዳይ።
ናታካ አትዳን
44 " ‘ "ሀነ የሩሳላመ፥ አሳይ ነ ቦላ፥ ናታካ አት ማላ ጊደ ሌምሱዋ ኦዳና። 45 ቱሙ ኔን ባረ አስናነ ባረ ናናቱዋ ሸነቴዳ ነ አት ማላ፤ ቃይ ባረንቱ አስና አስናነ ባረንቱ ናናቱዋ ናናቱዋ ሸነቴዳ ነ ምቼቱዋ ማላ። ነ አታ ሂተ ቢታ አሳ፤ ነ አዉ ቃይ አሞረ ቢታ አሳ። 46 ነ ባይራ ምቻታ ባረ ማጫ ናናቱዋና ኔፐ ሁጲሳ ባጋና ደእያ ሳማርያ፤ ቃይ ኔፐ ቴፋ ምቻታ ባረ ማጫ ናናቱዋና ኔፐ ገድሳ ባጋና ደእያ ሳዶሞ። 47 ኔን ኡንቱንቱ ኦግያ ካሌዳዌነ ኡንቱንቱ ቱና ኦሶቱዋ ኦዳዌ ኔና አልቤና። ሽን ኔን ጉ ዎድያን ኦዳ ኦሱ ኡንቱንቱዋፐ ኢታ ዳሬ።
48 " ‘ "ታን ኡባ ሞድያ መና ጎዳይ ታ ደኡዋን ጫቃይ: ኔንነ ነ ማጫ ናናቱ ኦዳዋዳን፥ ነ ምቻታ ሶዶማነ እ ማጫ ናናቱ ኦበይክኖ። 49 ነ ምቻታ ሶዶማ ኦዳ ናጋራይ ሀዋ: አነ እ ማጫ ናናቱ ኦቶራንቻ፥ ካሌዳዋንታነ እሻሉዋን ደእያዋንታ ግዶፐነ፥ ኡንቱንቱ ናቀቴዳዋንታነ ህዬሳ ማድበይክኖ። 50 ኡንቱንቱ ኦቶራንቻ ግዲደ፥ ታ ስንን ቱና ኦሶቱዋ ኦድኖ። ሄዋ ድራዉ፥ ህንተ በኤዳዋዳን፥ ታን ኡንቱንታ ይሳድ።
51 " ‘ "ሳማራታ ኔን ኦዳ ናጋራዉ ባጋካ ኦበይኩ፤ ኔን ኡንቱንቱዋፐ አዳ ቱና ኦሶቱዋ ኦዳ። ያታደ ሄ ነ ኦዳ ቱና ኦሶቱዋ ኡባ ጋሱዋን፥ ነ ምቼቱ ጽሉዋ ማላታናዳን ኦዳ። 52 ኔን ነ ምቼቱዋ ሱረ አሳ ከሴዳ ድራዉ፥ ካዉሻ ማያ። አያዉ ጎፐ፥ ነ ናጋራይ ኡንቱንቱዋፐ አ ኢትና፥ ሄዋን ኡንቱንቱ ኔፐ ጽሎ ማላቴድኖ። ሄዋ ድራዉ፥ ዬላታደ፥ ካዉሻ ማያ።
53 " ‘ "ግዶፐነ፥ ሳዶሞነ እ ማጫ ናናቱዋ፥ ቃይ ሳማርያነ እ ማጫ ናናቱዋ ታን ዛራደ እሻልስያ ዎደ፥ ኔናካ እሻልሳና። 54 ነባን ኔን ሎይ ዬላታና፤ ኔን ካዉሼዳዋን፥ ነ ምቼቱ ኔፐ ኬክያዋ ኤሪደ ምነታና። 55 ነ ምቼቱ፥ ሶዶማ ባረ ማጫ ናናቱዋና፥ ቃይ ሳማራታካ ባረ ማጫ ናናቱዋና ባረንቱ ካሰ እሻሎ ስማና፤ ኔንካ ነ ማጫ ናናቱዋና ህንተ ካሰ እሻሎ ስማና። 56 ነ ኢታተይ ቆንጫናፐ ካሰ፥ ነ ኦቶሩዋ ዎደ፥ ኔን ሀራይ አቶ፥ ነ ምቻት ሳዶም ቦላ ቅሊጫበይኪ? 57 ግዶፐነ፥ ሀእ ኔን ኤዶማ ማጫ ናናቱነ አ ሾሮ ኡባይ፥ ቃይ ፕልስጼማ ማጫ ናናቱነ ነ ዩሹዋን ደእያ፥ ኔና እጽያ ኡባይ ቅያባ ከሳዳ። 58 ነ ሻርሙጻተንነ ነ ቱና ኦሶቱዋ ጋሱዋን ሙረታና። ታን መና ጎዳይ ሀዋ ኦዳይ" ያጌ።
59 " ‘ኡባ ሞድያ መና ጎዳይ ሀዋዳን ያጌ፤ "ኔን ቃላ ጫቁዋ ካ ድራዉነ ህዶታ ቃላ ኮሌዳ ድራዉ፥ ኔን ኦዳ ኦሱዋዳን፥ ታን ነዉ ኦና። 60 ግዶፐነ፥ ታን ነ ያላጋተ ዎድያን ኔናና ጫቀቴዳ ቃላ ጫቁዋ ሀሳያና፤ ቃይ መና ጫቁዋካ ኔናና ጫቀታናዋ። 61 ሄዋፐ ጉይያን፥ ታን ነ ባይራነ ነ ቴፋ ምቼቱዋ ኔኮ አህያ ዎደ፥ ኔን ነ ሄመታ ሀሳያደ ዬላታና። ታን ኡንቱንታ ነዉ ማጫ ናናቱዋ ኦደ እማና፤ ሽን ሄዌ ታን ኔናና ጫቀቴዳ ጫቁዋዳን ግደና። 62 ሄዎ ታን ታ ጫቁዋ ኔናና ዎና። ታን መና ጎዳ ግድያዋ ኔን ሄዋን ኤራና። 63 ታን ኔን ኦዳ ናጋራ ኡባ አቶ ያግያ ዎደ፥ ኔን ነ ኦዳዋ ሀሳያደ፥ ዬላዉ ነ ዶና ኦይቃና። ታን ኡባ ሞድያ መና ጎዳይ ሀዋ ኦዳይ" ያጌ’ ያጋ" ያጊደ ዬዳ።