የሩሳላመ ቦላ ጾሳ ፕርዳ
(4:1—24:27)
1 "ኔኖ አሳ ናአዉ፥ ኡርቃፐ መዳ ጹብያ አካደ፥ ነ ስንን ዎ፤ ያታደ የሩሳላመ ካታማ ምስልያ አ ቦላ መ። 2 አ ዶዳ፤ ድርሳ ኦንነ ከስ አከናዳ ድራ፥ ካታማ ግምቢያ ዩሹዋን ቢታ ዶራ፤ ኦላንቻቱ ኤቂያሳ ጊግሳ፤ ግምቢያ ላልያ ኦላ ሚሻ ዩሹዋን ጊግሳ። 3 ቃይ ብራታ ባሽያ አካደ፥ ብራታ ጎዳዳን ኔፐነ ካታማፐ ግዱዋን ኤሳ። ነ ሶምኡዋካ ሀንቁዋን አኮ ዛራ። ሄ ካታማይ ዶደታና፤ ቃይ ዶዴዳዌካ ኔና። ሀዌ እስራኤልያ አሳዉ ማላ ግዳናዋ።
4 "ሄዋፐ ጉይያን፥ እስራኤልያ አሳዉ ሙሩዋ ማላ ግዳና ማላ ነ ሀድርሳ ምይያን ግሳ። ኔን ነ ሀድርሳ ምይያን ግሴዳ ጋላሳቱዋ ፓይዱዋ ኬሻ እስራኤልያ አሳ ኡንቱንቱ ዋን ሙረታነንቶ በሳሳ። 5 ቃይ ኔን ግሳደ እስራኤሊ ዎት ሙረታነንቶ በሳናዳን 390 ጋላሳ ነዉ እማድ። ሄ እት እት ጋላሳይ ኡንቱንቱ ሙረትያ እት እት ላይና ቃራ።
6 "ሄ ጋላሳ ነ ዉርሴዳዋፐ ጉይያን፥ ቃይ ዛራደ ነ ኡሸቻ ምይያን ይሁዳ አሳይ ዎት ሙረታነንቶ በሳናዉ ግሳ፤ እት እት ጋላሳይ እት እት ላይ ሙሩዋና ቃራ ግድያ ድራዉ፥ ሄዋዳን ኡንቱንቱ ኦዳ ናጋራ ሙሩዋ ኦይታሙ ጋላሳ ኔን ግሳናዳን፥ ታን ነዉ እማድ። 7 ነ ሶምኡዋ የሩሳላመ ዶደኮ ሀንቁዋን ዛራደ፥ ነ ኩሽያ ደን ማንዳደ፥ የሩሳላመ ቦላ ትምቢትያ ኦዳ። 8 ሄ ዶደን ኔን ጋምእያ ጋላሳይ ዉራናዉ፥ እት ምይያፐ ሀራ ምይያዉ አ ዎናዳን፥ ታን ኔና ዎዶሩዋን ቃቻና።
9 "ሀእ ኔን፥ ዛርጋነ ባንጋ፥ ባኤላነ ምስርያ፥ ማልዱዋነ ሞርገ ም አካደ፥ ካ ዎያ እት ባን ቆላደ፥ አፐ ነዉ ቁማ ካደ፤ ሄዋ ኔን ምይያን ግስያ 390 ጋላሳ ማና። 10 ሀች ሀች ኔን ምያ ኡክ ልካ፤ እካ 230 ግራምያ ዴጽያዋ ግዶ፤ ሄዋ አ ዎድያን ዎድያን ማ። 11 ቃይ ኔን ሀች ሀች ኡሽያ ሃካ ልካ፤ እካ ላኡ ቡርጩኮ ግዶ፤ ሄዋ አ ዎድያን ዎድያን ኡሻ። 12 ሄ ዋላኬዳ ካ ባንጋ ኡክ ኡክያዋዳን ኡካ፤ አሳይ ጼልሽን፥ አሳ ዎራ ሼሻ መላ ኤደ ኡካ፤ ያታደ ማ። 13 ሄዌ እስራኤልያ አሳይ ታን ኡንቱንታ ላልያ ካዉተቱዋ ግዶን ደኢድ፥ ቱኔዳ ቁማ ማናዎ ማላታ" ያጌዳ መና ጎዳይ።
14 ያትና፥ ታን ዛራደ ሀዋዳን ያጋድ፤ "ሀይ! ኡባ ሞድያ መና ጎዳዉ፥ ሄዌ ሀኖፖ! ታን ታና ቱንሳ ኤርከ። ታ ናአተፐ ዶማደ ሀች ጋካናዉ፥ ባኩታ ዎይ ባዞ ዶአይ ፑዚደ ዎዳዋ ማ ኤርከ፤ ቱኔዳ አሹ ታ ዶናኮ ሺቅ ኤረና" ያጋድ።
15 እ ዛሪደ፥ ታና ሀዋዳን ያጌዳ፤ "ዳሮ ሎአ፥ ያቶፐ፥ አሳ ዎራ ሼሻ መላን ኡክያዋ አጋደ፥ ሚዛ ኦሻ ከዊያን ነ ኡክ ኡካሳ" ያጌዳ።
16 እ ቃይካ ሀዋዳን ያጌዳ፤ "ኔኖ አሳ ናአዉ፥ በአ፤ የሩሳላመ ካታማ ካ ገለናዳን፥ ታን ድጋና ሀናይ። አሳይ ካ ህርጊደ፥ ማኪደ ማና፤ ቃይ ሃካ ያዪደ፥ ልኪደ ኡሻና። 17 ሄዎ ኡንቱንቶ ደእያ ካይነ ሃይ ዉራና፤ ኡንቱንቱ እቱ እቱዋ፥ ‘ፖራ!’ ጊደ ጼላና፤ ኡንቱንቱ ባረንቱ ናጋራ ሙሩዋን ግልቃና።