ህዝቄላ 34

እስራኤልያ ሄንንቻቱዋ

1 መና ጎዳ ቃላይ ታኮ ሀዋዳን ያጊደ ዬዳ፤ 2 "ላ አሳ ናአዉ፥ እስራኤልያ ሄንንቻቱዋ ቦላን ሀዋዳን ያጋደ ትምቢትያ ኦዳ፤ ‘ኡባ ሞድያ መና ጎዳይ ሀዋዳን ያጌ፤ "ህንተኖ፥ ህንተና ሄምያ እስራኤልያ ሄንንቻቶ፥ ህንተዉ አየ አና! ህንተ ዉድያ ሄማናዉ በሰኔ? 3 ኡንቱንቱ ማ ኡሺታ፤ ኡንቱንቱ እስክያፐ ዳደቴዳ ሱፍያ ማዪታ፤ ኡንቱንቱፐ ሞዳዋንታ ሹኪደ ሚታ፤ ሽን ዉድያ ሱረ ሄምክታ። 4 ዳቡሬዳዋንታ ምንስበይክታ፤ ሀርጌዳዋንታ ፓበይክታ፤ መኤዳዋንታ ኮልበይክታ፤ ዎራ ቤዳዋንታ ዛርበይክታ፤ ባዬዳዋንታ ኮይበይክታ። ህንተ ኡንቱንታ ዎልቃን መቀ ኢቲደ ሞዴድታ። 5 ዉዲ ኡባይ ሄምያዌ ይና ላለቴድኖ፤ ባዙዋ ዶአቶ ኡባዉ ቁማ ግዴድኖ።✝34:5 ፓይ. 27:17፤ 1 ካታ. 22:17፤ ማቶሳ 9:36፤ ማር. 6:34 6 ታ ዉደቱ ላለቴድኖ፤ ኡንቱንቱ ዞዘቱዋ ኡባ ቦላነ ቃ ደረቱዋ ኡባ ቦላ ብቻሬድኖ። ቢታ ኡባ ጋጻ ጋካናዉ ላለቴድኖ፤ ሽን ኡንቱንታ ጾሞስያዌ ዎይ ኮይያዌ ባዋ" ያጌ።

7 " ‘ሄዋ ድራዉ፥ ህንተኖ፥ ሄንንቻቶ፥ መና ጎዳ ቃላ ስስተ! 8 ኡባ ሞድያ መና ጎዳይ ሀዋዳን ያጌ፤ "ታን ታ ደኡዋን ጫቃይ: ታ ዉድያ ሄምያዌ ይና፥ ታ ዶርሳቱ ኦይቀቲደ፥ ባዙዋ ዶአቶ ኡባዉ ቁማ ግዴድኖ። ታ ሄንንቻቱ ታ ዉደቱዋ ኮይቤና ድራዉነ ኡንቱንቱ ታ ዉደቱዋ ሄመናን አጊደ፥ ባረንታ ሄሜዳ ድራዉ፥ 9 ህንተኖ፥ ሄንንቻቶ፥ መና ጎዳ ቃላ ስስተ! 10 ታን ህንተ ሄንንቻቶ ሞርከ፤ ታ ዉደቱዋ ታን ህንተፐ አካና፤ ታን ህንተና ላኤን ኡንቱንቶ ሄንንቻ ከስከ። ሀዋፐ ስንዉ ህንተ ህንተ ጻላላ ሄሚደ ደእክታ። ታ ዉደቱዋ ታን ህንተፐ ዎ አካና፤ ሀዋፐ ስንን ኡንቱንቱ ህንተዉ ቁማ ከስክኖ። ታን ኡባ ሞድያ መና ጎዳይ ሀዋ ኦዳይ" ያጌ።

ሎኦ ሄንንቻ

11 " ‘አያዉ ጎፐ፥ ኡባ ሞድያ መና ጎዳይ ሀዋዳን ያጌ፤ "ታን ታ ሁጲያን ታ ዉደቱዋ ጾሞሳናነ ኮያና። 12 ሄንንቻይ ባረ ዉደቱዋፐ ባይና ኮይያዋዳን፥ ታንካ ታ ዉደቱዋ ኮያና፤ ሻሪ ጎዜዳነ ማይ ስኬዳ ጋላስ ኡንቱንቱ ላለቴዳ ሳኣ ኡባፐ ታን ኡንቱንታ ሺሻና። 13 ቃይ ታን ካዉተቱዋ ግዶፐነ ሀራ ቢታ ኡባፐ ከሳደ ሺሻና፤ ኡንቱንቱ ቢታ አሀና። እስራኤልያ ደረቱዋን፥ ፑልቶቱዋንነ አሳይ ደእያ ሳአቱዋ ኡባን ታን ኡንቱንታ ሄማና። 14 ታን ኡንቱንታ ሎኦ ቆሩዋን ሄማና፤ ቃይ እስራኤልያ ቃ ደረቱ ኡንቱንቱ ሄመትያ ሳኣ ግዳናዋ። ሄዋን ኡንቱንቱ ሎኦ ቆሩ ደእያ እስራኤልያ ዞዘቱዋ ቦላ ሄመታናነ አላጻና። 15 ታን ታ ሁጲያን ታ ዉደቱዋ ሄማናነ አላጽሳና። ታን ኡባ ሞድያ መና ጎዳይ ሀዋ ኦዳይ። 16 ባዬዳዋ ኮያና፤ ዎራ ቤዳዋ ዛራና፤ መኤዳዋ ኮላና፤ ሀርጌዳዋካ ፓና። ሽን ሞዳዋነ ምኔዳዋ ይሳና፤ አያዉ ጎፐ፥ ታን ሱረ ፕርድያ ሄንንቻ" ያጌ።

17 " ‘ህንተኖ፥ ታ ዉድያ ዶርሳቶ፥ ህንተባ ግዶፐ፥ ኡባ ሞድያ መና ጎዳይ ሀዋዳን ያጌ፤ "ህንተና ኡባካ ታን ፕርዳና፤ ኬካ ኢታፐ፥ ዶርሳ ዴሻፐ ታን ሻካና። 18 ህንተ ሎኦ ቆሩዋን ሄመትያዌ ግዳና ይኔ፥ አቴዳ ማታ ህንተ ገድያን የሬያዌ? ቃይ ህንተ ጽሎ ሃ ኡሽያዌ ግዳና ይኔ፥ አቴዳ ሃ ገድያን ቡሉቂያዌ? 19 ታ ዉደቱ ህንተ ህንተ ገድያን የሬዳ ማታ ማናዉነ ህንተ ህንተ ገድያን ቡሉቆየዳ ሃ ኡሻናዉ በሲ?" ያጌ።

20 " ‘ሄዋ ድራዉ፥ ኡንቱንቶ፥ ኡባ ሞድያ መና ጎዳይ ሀዋዳን ያጌ፤ "በእተ፥ ሞ መህያ ግዶነ ግልቃ መህያ ግዱዋን ታን ታ ሁጲያዉ ፕርዳና። 21 ላፋቱዋ ህንተ ህንተ ምይያንነ ህንተ ሞርግያን ሱግያ ድራዉነ ጋጻ ከሳና ጋካናዉ፥ ህንተ ኡንቱንታ ህንተ ካጭያን ቃይጭያ ድራዉ፥ 22 ታን ታ ዉደቱዋ አሻና። ሀዋፐ ስንዉ ኦንነ ኡንቱንታ ኦይቀና፤ ታ ኬካ መህያፐነ ታ ኢታ መሄቱዋፐ ግዱዋን ታን ፕርዳና። 23 ታን ኡንቱንቱ ቦላን እት ሄንንቻ፥ ታ ቆማ ዳዊታ ሱንና፤ እ ኡንቱንታ ሄማናነ ኡንቱንቶ ሄንንቻ ግዳናዋ።✝34:23 ሳፃ 7:17 24 ሄዋፐ ስንን ታን መና ጎዳይ ኡንቱንቱ ጾሳ ግዳና፤ ታ ቆማይ ዳውት ኡንቱንቱ ግዶን ካፑዋ ግዳና። ታን መና ጎዳይ ሀዋ ኦዳድ።✝34:24 ህዝ. 37:24

25 " ‘ "ታን ኡንቱንቱና ሳሮተ ጫቁዋ ጫቀታና፤ ኢታ ዶአቱዋካ ታን ቢታፐ ድጋና፤ ያቶፐ ታ ዉዲ ባዙዋን ሳሮ ደአና፤ ዎራ ጋርሳንካ ህርግ ባይናን አላጻና። 26 ኡንቱንታነ ታ ደርያ ዩሹዋን ደእያ ሳአቱዋ አንጃና። ኡንቱንቶ ኮሽያ እራካ ዎድያን እማና፤ ሄ እራይ ኡንቱንቶ አንጆ ግዳና። 27 ጋደን ደእያ ምቱ አይፋና፤ ቢታይካ ካ ሞካና። አሳይ ኡባይ ባረንቱ ቢታን ሳሮ ደአና። ታን ኡንቱንቱ ሞርገ ም መንደ፥ ኡንቱንታ አይለዬዳዋንቱ ኩሽያፐ ከስያ ዎደ፥ ታን መና ጎዳ ግድያዋ ኡንቱንቱ ኤራና። 28 ሄዋፐ ጉይያን፥ ኡንቱንቱ ሀራ ካዉተቶ ቦንቂያባ ግድክኖ፤ ቢታን ደእያ ዶአቱካ ኡንቱንታ ሚክኖ። አያይነ ዳጋንናን፥ ኡንቱንቱ ሳሮ ደአና። 29 ታን ኡንቱንቶ አራዳ ጋድያ እማና፤ ኡንቱንቱ ላኤን ኮሻን ዉርክኖ፤ ዎይ ቃይ ሀራ ካዉተቶ ሸቂያባ ከስክኖ። 30 ሄ ዎደ ኡንቱንቱ ታን መና ጎዳይ፥ ኡንቱንቱ ጾሳይ ኡንቱንቱና ደእያዋነ እስራኤልያ አሳይ ታ አሳ ግድያዋ ኤራና። ኡባ ሞድያ ጾሳይ ሀዋ ኦዳይ። 31 ህንተኖ፥ እስራኤልያ አሳቶ፥ ህንተ ታ ዉደቱዋ፤ ታ ቆሩዋን ምያ ዉደቱዋ፤ ህንተ ታ አሳ፤ ታንካ ህንተ ጾሳ። ታን ኡባ ሞድያ መና ጎዳይ ሀዋ ኦዳይ" ያጌ’ ያጋ" ያጊደ ዬዳ።