ህዝቄላ 33

ጾሳይ ህዝቄላ ዎችያ አሳ ኦደ ሱንዳ

1 መና ጎዳ ቃላይ ታኮ ሀዋዳን ያጊደ ዬዳ፤ 2 "ላ አሳ ናአዉ፥ ነ ቢታ አሳዉ ሀዋዳን ያጋደ ኦዳ፤ ‘ታን እት ቢታ ቦላን ኦላ አህያ ዎደ፥ ሄ ቢታ አሳይ ባረንቱ ቦላ ይያዋ ዎችያ አሳ ዶሮ። 3 ሄ ዎችያዌ ሞርኪ ይያዋ በእነ አሳይ ናገታናዳን፥ ማላካታ ፑኖፐ፤ 4 አይ አሳይነ ሄ ማላካታ ኮሻ ስሲደ፥ ናገተናን እጽና፥ ኦላይ ዪደ አ ዎፐ፥ ሱ አጩ አዋ። 5 እ ማላካታ ኮሻ ስሲደ፥ ናገተናን እጼዳ ድራዉ፥ አ ሱ አጩ አ ቦላና። እ ስሲደ ናገቴደንቶ፥ ሀይቁዋፐ አትያዋ ሽን! 6 ሽን ሄ ዎችያዌ ሞርኪ ይያዋ በኢደ፥ ማላካታ ፑነናን አጎፐነ አሳ ኤርሳና ዮፐ፥ ኦላይካ ዪደ፥ ሄ አሳፐ እት ኡራ ዎፐ፥ ሄ ኡራይ ባረ ናጋራን ሀይቄ፤ ሽን ታን አ ሱ ዎችያዋ አቻና’ ያጋ።

7 "ላ አሳ ናአዉ፥ ታን ኔና እስራኤልያ አሳዉ ዎችያዋ ኦድ፤ ታን ነዉ ኦድያዋ ስሳደ አሳካ ኤርሳ። 8 እት ኢታ አሳ ታን፥ ‘ላ ኔን ቱሙ ሀይቃና’ ያግያ ዎደ፥ እ ባረ ናጋራፐ ስማና ማላ፥ ኔን አዉ ኦዳና ዮፐ፥ ሄ ናጋራንቻይ ባረ ናጋራን ሀይቄ፤ ሽን ታን አ ሱ ኔፐ ጭገታና። 9 ሽን ናጋራንቻይ ባረ ናጋራፐ ስማናዳን ኔን ኦድና፥ እ እጾፐ፥ ባረ ናጋራን ሀይቄ፤ ሽን ኔን ነ ሸምፑዋ አሻዳ።

ጾሳይ ልክያ ፕርዴ

10 "ላ አሳ ናአዉ፥ እስራኤልያ አሳዉ ሀዋዳን ያጋ፤ ‘ህንተ፥ "ኑን ኦዳ ናጋራይነ ናቁ ኑ ቦላ ደኤ፤ ሄዋፐ ደንዴዳዋን ኑን ግልቂ ዉሬዶ። ያትና፥ ኑን ዋኒደ ፓጻ ደአናዉ ዳንዳዬቶ?" ያጊታ። 11 ታን መና ጎዳይ ደኡዋን ሀዋዳን ያጋደ ጫቃይ፤ "ናጋራንቻይ ባረ ናጋራ አጊደ፥ ፓጻ ደአና ማላ ኮያይፐ አትና፥ ናጋራንቻ ሀይቁዋን ናሸትከ። ታን ኡባ ሞድያ መና ጎዳይ ሀዋ ኦዳይ። ህንተኖ፥ እስራኤልያ አሳዉ፥ ስምተ፤ ህንተ ኢታ ኦሱዋፐ ጉየ ስምተ! አያዉ ሀይቃናዉ ኮዪቴ?" ያጋይ’ ያጋ።

12 "ላ አሳ ናአዉ፥ ነ ቢታ አሳዉ ሀዋዳን ያጋደ ኦዳ፤ ‘ጽሎ አሳይ ናጋራ ኦፐ፥ አ ጽሎተይ አ አሸና፤ ቃይ ናጋራንቻይ ባረ ናጋራፐ ስም ክቾፐ፥ ካሰ ናጋራን እ ሙሬተና። ጽሎ አሳይካ ናጋራ ኦፐ፥ ካሰ ጽሎተ ድራዉ ደኡዋን ደአናዉ ዳንዳየና። 13 ታን ጽሎ አሳ፥ "ኔን ቱሙ ፓጻ ደአና" ያጌዳ ዎደ፥ እ ባረ ጽሎተን አማነቲደ ናጋራ ኦፐ፥ ባረ ኦዳ ናጋራን እ ሀይቃናፐ አትና፥ ካሰ ጽሎተይ አዉ ቆፈተና። 14 ቃይ ታን ናጋራንቻ አሳ፥ "ኔን ቱማ ሀይቃና" ያጌዳ ዎደ፥ እ ባረ ናጋራፐ ስሚደ፥ ፕርዳነ ሱረ ኦሱዋ ኦፐ፥ 15 ሚሻ ታልአናዉ ኦይዳዋ ዛሮፐ፥ ዉኤዳባካ ጉየ ዛሮፐ፥ ናጋራ ኦያዋ አጊደ፥ ደኡዋ እምያ ህግያ ካሎፐ፥ ያቶፐ፥ እ ቱማ ፓጻ ደአናፐ አትና ሀይቀና። 16 እ ካሰ ኦዳ ናጋራይ እቱነ ቆፈተና፤ ሀእ ፕርዳነ ሱረ ኦሱዋ ኦዳ ድራዉ፥ እ ቱማ ፓጻ ደአና።

17 " ‘ሽን ነ ቢታ አሳይ፥ "ጎዳ ኦጊ ልከ ግደና" ያጊኖ፤ ሽን ልከ ግደናዌ ኡንቱንቱ ኦግያ። 18 ጽሎ አሳይ ባረ ጽሎተ አጊደ፥ ናጋራ ኦፐ፥ እ ባረ ናጋራን ሀይቃና። 19 ቃይ ናጋራንቻ አሳይ ባረ ናጋራፐ ስሚደ፥ ፕርዳነ ሱረ ኦሱዋ ኦፐ፥ ሄ ኦሱዋን እ ፓጻ ደአና። 20 ሽን ህንተ፥ "ጎዳ ኦጊ ልከ ግደና" ያጊታ። እስራኤልያ አሳዉ፥ ታን እቱዋ እቱዋ ቦላ ህንተ ኦሱዋዳን ኦሱዋዳን ፕርዳና’ ያጋ" ያጊደ ዬዳ።

የሩሳላመ ኩንደይ ኦደቴዳ

21 ኑን ኦሞደቲደ ታማነ ላኤን ላይን፥ ታማን አግናን፥ እቼሸን ጋላሳን፥ የሩሳላመፐ ከስ አክ ዬዳ እት አሳይ ካታማይ ኩንዴዳዋ ታዉ ኦዴዳ።✝33:21 2 ካታ. 25:3-10፤ ኤር. 39:2-8፤ 52:4-14 22 ሄ ብታኒ ያናፐ እት ጋላሳ ካሰቲደ ደእያ ኦማርስ መና ጎዳ ኩሺ ታ ቦላን ሸምፔዳ፤ ታ ዶናይካ ዶየቴዳ፤ ዎንተ ጋላስ ሄ ብታኒ ታኮ ጋካናፐ ካሰታደ፥ ታንካ ሃሳያናዉ ዳንዳያድ።

23 ያትና፥ መና ጎዳ ቃላይ ታኮ ሀዋዳን ያጊደ ዬዳ፤ 24 "ላ አሳ ናአዉ፥ እስራኤልያ ቢታን ኮለቴዳ ካታማቱዋን ደእያ አሳቱ ሀዋዳን ያጊኖ፤ ‘አብራሃመ ባረካ ደእያ እት አሳ፤ ሀ ቢታ ላቴዳ፤ ሽን ኑን ጮራ፤ ቢታይካ ቱማ ኑዉ ላታ ጋድያ ግዲደ እመቴዳ’ ያጊኖ።

25 "ሄዋ ድራዉ፥ ኡንቱንቶ ሀዋዳን ያጋ፤ ‘ኡባ ሞድያ መና ጎዳይ ሀዋዳን ያጌ፤ "ህንተ ሀእካ ሹኪደ፥ ሱይ ከስቤና አሹዋ ሚታ፤ ቃይ ኤቃዉ ጎይኒታ፤ ሸምፑዋ ዎታ። ሀዋ ኡባ ኦደ፥ ቱሙ ህንተ ቢታ ላቲቴ? 26 ህንተ ህንተ ማሻን አማነቲታ፤ ህንተ ቱና ኦሱዋ ኦታ፤ ህንተ ኡባይካ ህንተ ሾሩዋ ሾሩዋ ማጫ አሳ ቱንሲታ። ሄዋ ኡባ ኦደ፥ ቱሙ ህንተ ቢታ ላቲቴ?" ያጌ’ ያጋ።

27 "ኡንቱንቶ ሀዋዳን ያጋ፤ ‘ኡባ ሞድያ መና ጎዳይ ሀዋዳን ያጌ፤ "ታን ታ ደኡዋን ጫቃይ: ኮለቴዳ ካታማቱዋን ደእያ አሳቱ ማሻን ሀይቃና፤ ካታማፐ ጋጻን ደእያ አሳቱዋ ታን ባዙዋ ዶአዉ ቁማ ኦደ እማና፤ ደረቱዋ ቦላ ጎንጎሎቱዋን ደእያ አሳቱ ኢታ ሀርግያን ሀይቃና። 28 ታን ሄ ቢታ ባዬዳነ መላ ቢታ ከሳና፤ ኡንቱንቱ ኦቶረትያ ዎልቃይ ዉራና፤ እስራኤልያ ደረቱ አይ አሳይነ አና መላ ሳኣ ግዳና። 29 ኡንቱንቱ ኦዳ ቱናባ ጋሱዋን ታን ቢታ ባዬዳነ መላ ቢታ ከስያ ዎደ፥ ታን መና ጎዳ ግድያዋ ኡንቱንቱ ኤራና" ያጌ’ ያጋ።

30 "ላ አሳ ናአዉ፥ አሳይ ካታማ ድርሳ ምይያንነ ባረንቱ ጎለቱዋ ፐንግያን ኤቂደ፥ እቱ እቱዋና ሀዋዳን ያጊደ፥ ነባ ሃሳዬ፤ ‘ሃይተ፤ መና ጎዳ ማታፐ ዬዳ ቃላይ አየንቶ አነ ስሴቶ’ ያጊኖ። 31 ኡንቱንቱ ካሰ አሳይ ይያዋዳን ኔኮ ዪኖ፤ ታ አሳዳን ነ ስንን ኡቲኖ፤ ኔን ኦድያዋካ ስሲኖ፤ ሽን ኦክኖ። ኡንቱንቱ ሲቁዋባ ሃሳዪኖ፤ ሽን ኡንቱንቱ ዎዛናይ ጎኣ ጻላላዉ ያረቴ። 32 በአ፥ ኔን ኡንቱንቶ እት ሲቁዋ ማዛሙርያ ሎኦ ኮሻን የጽያነ ዲ ሎይደ ዲጽያ አሳ ማላ። አያዉ ጎፐ፥ ኡንቱንቱ ኔን ኦድያዋ ስሲኖ፤ ሽን እቱዋካ ኦክኖ።

33 "ሽን ኔን ኦዴዳዌ ቱሙ ፖለታና፤ ፖለትያ ዎደ፥ ትምቢትያ ኦድያዌ ኡንቱንቱ ግዶን ደእያዋ ኡንቱንቱ ኤራና" ያጊደ ዬዳ።