ህዝቄላ 9

ኤቃዉ ጎይንያዋንታ ዎድኖ

1 ሄዋፐ ጉይያን፥ ቃ ኮሻን፥ ታን ስስሽን፥ "ሀዋንቱ፥ ካታማቶ ሙራናዉ ኪተቴዳዋንቱ፥ ኡባይካ ባረንቱ ዎያ ኦላ ሚሻ ባረንቱ ኩሽያን ኩሽያን ኦይቂደ፥ ሃ ዪኖ" ያጌዳ። 2 ሄዋፐ፥ ሁጲሳ ጼልያ ቆሞ ባጋ ፐንግያና ዎያ ኦላ ሚሻ ኦይቂደ፥ ይያ ኡሱፑን አሳቱዋ በኣድ። ኡንቱንቱና እትፐ ሊኑዋፐ ዳደቴዳ ማዩዋ ማዪደ፥ ባረ ምይያን ጻፍያዋ ኮሮጁዋን ኦይቄዳ እት ብታኒ ደኤ። ኡንቱንቱ ግዶ ገሊደ፥ ናሃስያፐ ኦሰቴዳ ያርሽያ ሳ ማታን ኤቄድኖ።

3 እስራኤልያ ጾሳ ቦንቹ ካሰ ባረ ደእያ ክሩበቱዋፐ ደንዲደ፥ ጌሻ ጎልያ ፐንግያ ጉባንያኮ ቢደ ኤቄዳ። ሄዋን መና ጎዳይ ላይኑዋ ማዪደ፥ ባረ ምይያን ጻፍያዋ ኮሩጁዋን ኦይቄዳ ብታንያ ጼሴዳ። 4 አ ሀዋዳን ያጌዳ፤ "የሩሳላመ ካታማ ግዱዋ ባደ፥ ያን ኦሰትያ እጸቴዳ ኤቃ ጎይኑዋ ድራዉ፥ ኦሊድነ ካዮቲደ ደእያ አሳ ሶምኡዋን ማላ ዎ" ያጌዳ።✝9:4 ሳፃ 7:3፤ 9:4፤ 14:1

5 ታን ስስሽን፥ እ ሀራቱዋካ ሀዋዳን ያጌዳ፤ "አ ጌዶ ካሊደ፥ ካታማ ግዱዋ አደ ዎተ! እቱዋነ አሾፕተ፤ ኦስነ ቃረቶፕተ። 6 ጭማቱዋ፥ ዎዳላቱዋነ ዎዶሮቱዋ፥ ማጫ አሳቱዋነ ናናቱዋ ኡባካ ሹክተ፤ ሽን ሶምኡዋን ማላይ ደእያ አሳ ኦናነ ቦቾፕተ። ዎዋ ታ ጌሻ ጎልያን ዶምተ" ያጌዳ። ኡንቱንታ ዎዋ ጌሻ ጎልያ ስንን ኤቄዳ ጭማቱዋን ዶሜድኖ። 7 ሄዋፐ ጉይያን፥ እ ኡንቱንታ ሀዋዳን ያጌዳ፤ "ጌሻ ጎልያ ቱንስተ፤ ዳባባቱዋካ አሃን ኩንተ፤ ከስተ" ያጌዳ። ኡንቱንቱ ከሲደ፥ ካታማ ግዶን ኡባን ዎዋ ዶሜድኖ።

8 ኡንቱንቱ ዎ ደእሽን፥ ታን ታረካ አታደ፥ ታ ሶምኡዋ ቢታ ጋ ጉፋናደ፥ ታ ቃላ ቁ ኦደ፥ "አቤት ኡባ ሞድያ መና ጎዳዉ፥ ሀ ኔን የሩሳላመ ቦላን ጉስያ ነ ሀንቁዋን፥ እስራኤልያፐ አቴዳ ሙልያካ ዉርሳየ?" ያጋድ።

9 እ ዛሪደ፥ ታዉ ሀዋዳን ያጌዳ፤ "እስራኤልያነ ይሁዳ ናጋራይ ሎይ ዳሬዳ፤ ቢታ ኡባይ ሱን ኩሜዳ፤ ቃይ ካታማ ኡባን ሱረ ፕርዳይ ባዋ። አያዉ ጎፐ፥ ‘አሳይ፥ መና ጎዳይ ሀ ቢታ አጌዳ፤ መና ጎዳይ በኤና’ ያጊኖ። 10 ሄዋ ድራዉ፥ ታን ኡንቱንቶ ቃረትከነ ኡንቱንቱፐ እቱዋነ አሽከ። ታን ኡንቱንቶ ኡንቱንቱ ኦግያዳ ኦና" ያጌዳ።

11 ሄዋፐ ጉይያን፥ ላይኑዋ ማዪደ፥ ባረ ምይያን ጻፍያዋ ኮሮጁዋን ኦይቄዳ ብታኒ ጉየ ስሚደ፥ "ኔን ታና አዛዜዳዋዳን ኦድ" ያጌዳ።