ህዝቄላ 29

ግብጼ ቦላ ያና ፕርዳ

1 ኑን ኦሞደቴዳ ታማን ላይን፥ ታማን አግናን፥ ታማነ ላኤን ጋላሳን፥ መና ጎዳ ቃላይ ታኮ ሀዋዳን ያጊደ ዬዳ፤✝29:1—32:32 ኢሳ. 19:1-25፤ ኤር. 46:2-26 2 "ላ አሳ ናአዉ፥ ነ ሶምኡዋ ግብጼ ካትያኮ ዛራደ፥ አ ቦላነ ግብጼ ቢታ ኡባ ቦላ ትምቢትያ ኦዳ። 3 ሀዋዳን ያጋ፤ ‘ኡባ ሞድያ መና ጎዳይ ሀዋዳን ያጌ፤ "ኔኖ፥ ፓርኦና፤ ናይለ ሻፋ ግዶን ግሴዳ፥ ሎይ ዎልቃማነ ያሽያ ዶአዉ፥ ናይለ ሻፋይ ታዋ፤ አ መዳዌ ታና ያግያ ግብጼ ካትያዉ፥ ታን ነዉ ሞርከ! 4 ታን ነ ጎጎጩዋን ህንግ ገልሳና፤ ነ ሻፋን ደእያ ሞለቱ ነ ጋልባ ፖቁዋና ኦይቀታናዳን ኦና፤ ሞለቱ ነ ጋልባና ኦይቀት ኡት ደእሽን፥ ታን ኔና ሃቱዋፐ ጎቻደ ጋጻ ከሳና። 5 ታን ኔናነ ነ ሻፋን ደእያ ሞለቱዋ ኡባ መላ ቢታን ኦላና፤ ነ አሃይ ደምባን ኦለት አታናዋ፤ ነ አሃ ሺሺደ ሞግያዌ ያና። ታን ኔና ሳሉዋ ካፎቶነ ሳኣ ዶአቶ ቁማ ኦና። 6 ግብጼን ደእያ አሳይ ኡባይ ታን መና ጎዳ ግድያዋ ሄዋን ኤራና።✝29:6 ኢሳ. 36:6

" ‘ "ኔን እስራኤልያ አሳዉ ማቃ ጉፍያ ግዳዳ፤ 7 ኡንቱንቱ ኔና ኦይቄዳ ዎደ መአደ፥ ኡንቱንቱ ሀሽያ ጫዳዳ፤ ኡንቱንቱ ኔናን ዘምፔዳ ዎደ መአደ፥ ኡንቱንቱ ዞክያ ዱዳ። 8 ሄዋ ድራዉ፥ ታን ኡባ ሞድያ መና ጎዳይ ነ ቦላን ማሻ ደንያዋንታ አሀና፤ ኡንቱንቱ ነ አሳነ ነ መህያ ኡባ ዉርሳና። 9 ግብጼ ቢታይ አሳይ ባይና መላነ ኦና ቢታ ግዳና። ታን መና ጎዳ ግድያዋ ኡንቱንቱ ሄዋን ኤራና።

" ‘ "ሄዌካ ኔን፥ ናይለ ሻፋይ ታዋ፤ አ መዳዌ ታና ያጌዳ ድራዉ፥ 10 ታን ነ ቦላነ ነ ሻፋ ቦላ ደንዳድ። ታን ሁጲሳ ባጋና ምግዶላፐ ዶማደ፥ ገድሳ ባጋና አስዋነ ካታማ፥ ሄዋፐካ ቶጵያ ዛዋ ጋካናዉ ግብጼ ኡባ አሳይ ባይና መላነ ኦና ሳኣ ከሳና። 11 አሳ ግድና መህያ ግድና፥ ሄዋና አና፤ ኦይታሙ ላይይ ዉራና ጋካናዉ፥ አያይነ ሄዋን ደኤና። 12 ታን ግብጼ ቢታይ ቢታ ኡባፐ አዳ መላነ ኦና ቢታ ኦና፤ አ ካታማቱካ ኦይታሙ ላይይ ዉራናዉ፥ ሀራ ኮለቴዳ ካታማ ኡባፐ አዋ ኮለቲደ ደአና። ግብጼ አሳ ታን ካዉተቱዋ ግዶንነ ሀራ አሳ ግዶን ላላና" ያጌ።

13 " ‘ኡባ ሞድያ መና ጎዳይ ሀዋዳን ያጌ፤ "ኦይታሙ ላይፐ ጉይያን፥ ታን ግብጼቱዋ ላሌዳ ካዉተቱዋ ግዶፐ ሺሻና። 14 ታን ኡንቱንታ ዛራደ እሻልሳና፤ ኡንቱንቱ የለቴዳ ገድሳ ግብጼን ደእያ ፓትሮሳ ቢታ ዛራና፤ ሄዋን ኡንቱንቱ ላፋ ካዉተ ግዲደ ደአና። 15 ግብጼ ሀራ ካዉተቱዋ ኡባፐ አዳ ላፋ ካዉተ ግዳና። ላኤን ሀራ ካዉተቱዋ ቦላ ባረና ቁ ቁ ኦና። ላኤን እ ሀራ ካዉተ ሞደናዳን፥ ታን እዞ ጉና። 16 እስራኤልያ አሳይ ላኤን ማዱዋ ደማናዉ ኡንቱንቱን አማነተና፤ ግብጼን አማነቴዳዌ አይ ኬሻ ባይዘንቶ እስራኤልያ አሳይ አኬካና። ኡባ ሞድያ መና ጎዳ ግድያዋ ኡንቱንቱ ሄዋን ኤራና" ያጌ’ ያጋ" ያጊደ ዬዳ።

ካቲ ናቡካዳናጾር ግብጼ ጾናና

17 ኑን ኦሞደተዳ ላታማነ ላፑን ላይን፥ ኮይሮ አግናን፥ ኮይሮ ጋላሳን፥ መና ጎዳ ቃላይ ታኮ ሀዋዳን ያጊደ ዬዳ፤ 18 "ላ አሳ ናአዉ፥ ባብሎነ ካቲ ናቡካዳናጾር ጺሮሳ ቦላ ኦላ ደንናዉ ጊጌዳ፤ ኡንቱንቶ ሁጲ ቦአታና ጋካናስነ ሀሺካ ማዱጻና ጋካናዉ፥ ኦላንቻቱ ዴጾ ቶኩዋ ቶካናዳን ኦድኖ፤ ግዶ ሽን፥ ካዉካ ኦላንቻቱካ ሀ ዳቡራ ኡባን ኡንቱንቱ ጺሮሳፐ ደሜዳዌ ባዋ። 19 ሄዋ ድራዉ፥ ኡባ ሞድያ መና ጎዳይ ሀዋዳን ያጌ፤ ‘ታን ግብጼ ቢታ ባብሎነ ካትያ ናቡካዳናጾራዉ አደ እማና፤ እካ ባረ ኦላንቻቱዋ ድርጉዋ ግዳና ማላ፥ ኦሞዱዋንነ ቦንቂያን አኬዳዋ ኡባ አኪደ ባና። 20 እነ አ ኦላንቻቱ ታዉ ኦዳ ድራዉ፥ ታን አዉ ግብጼ ቢታ ኡንቱንቱ ዳቡራዉ ድርጉዋ ኦደ እማና። ታን ኡባ ሞድያ መና ጎዳይ ሀዋ ኦዳይ’ ያጌ።

21 "ሄ ጋላስ ታን እስራኤልያ አሳ ምንና። ህዝቄላ፥ ኔንካ አሳዉ ኦዳናዳን፥ ታን ኔና ምንና። ታን መና ጎዳ ግድያዋ ኡንቱንቱ ሄዋን ኤራና" ያጊደ ዬዳ።