1 ሄዋፐ ስሚደ፥ ሄ ብታኒ ታና ጌሻ ጎልያን ደእያ ጌሻ ሳኣ ገልሴዳ። ሄ ጌሻ ሳኣ ጎዳ ኦርዶተ ልክና 6 ዋ ግዴዳ። 2 ፐንግያ ጎምፓይ ቃይ 10 ዋ ግዴዳ። ሀድርሳናነ ኡሸቻና ደእያ ጎዳቱዋ ጎምፓይ እቼሹ እቼሹ ዋ። ቃይ እ ጌሻ ሳኣ ልክና 40 ዋ፥ ጎምፓይካ 20 ዋ ግዴዳ።
3 ሄዋፐ ጉይያን፥ ቆልኦ ገሌዳ። ሄ ገልያ ፐንግያ ጎዳ ኦርዶተ ልክና 2 ዋ ግዴዳ። ፐንግያ ጎምፓይ 6 ዋ ግዴዳ፤ ሀድርሳናነ ኡሸቻና ደእያ ጎዳቱዋ አኮተይ ላፑን ላፑን ዋ። 4 ቃይ እ ቆልኡዋ ልክና አዱሳተይ 20 ዋ፥ ጎምፓይካ 20 ዋ ግዴዳ። ሄዋፐ ጉይያን እ ታና፥ "ሀዌ ኡባፐ አያ ጌሻ ሳኣ" ያጌዳ።
ጌሻ ጎልያ ዩሹዋን ኬጸቴዳ ክፍለቱዋ
5 ሄ ብታኒ ጌሻ ጎልያ ጎዳ ልክና ኦርዶተይ 6 ዋ ግዴዳ። ሄ ጎዳና ኦይቀቲደ፥ ጌሻ ጎልያ ዩሹዋን ኬጸቴዳ ኦይዱ ኦይዱ ዋ አክያ ዳሮ ክፍለቱ ደኢኖ። 6 ሄ ክፍለቱ እቱ እቱዋ ቦላ ኬጸቴዳ ሄዙ ፖቀ ግድሽና፥ እት እት ፖቅያዉ ሀታሙ ክፍለቱ ደኢኖ። ዞንጎልስ የግያ ምይ ጌሻ ሳኣ ግዶ ገለና ማላ፥ ኮይሮ ጎዳና ኦይሰደ፥ ሀራ ሹቻ ዎድኖ። 7 ሄ ሹቻይ ጋርሳ ዉርሰ ፖቅያን ኦርዴዳ ድራዉነ ፑደ ሺቂደ ሌእያ ድራዉ፥ ክፍለቱካ ፑደ ሺቅያ ዎደ፥ አክ አኪደ ቢኖ። ኮይሮ ዉይግያፐ ግዶ ፖቅያና አደ፥ ክል ዉርሰ ፖቅያ ጋካናዉ አፍያ ደቱ ደኢኖ።
8 ታን ጌሻ ጎልያ ዩሹዋን ቁ ጌዳ ባሱ ደእያዋ በኣድ። አ ዩሹዋን ደእያ ክፍለቱ ሄ ባሱዋ ቦላን ኬጸቴድኖ፤ ሄ ባሱ ግዶ ዳባባፐ 6 ዋ ቄ። 9-11 ሄ ክፍለቱዋ ካረ ባጋ ጎዳ ኦርዶተይ 5 ዋ። ክፍለቱዋ ገልያ ላኡ ፐንገቱ፥ እቱ ሁጲሳ ባጋና፥ እቱ ቃይ ገድሳ ባጋና ደኢኖ፤ ቃይ ሄ ክፍለቱዋ ዩሹዋን ደእያ ባሱዋ አኮተይ 5 ዋ። ጌሻ ጎልያ ባሱዋፐነ ግዶ ዳባባን ደእያ ክፍለቱዋፐ ግዱዋን ደእያ መላ ሳአይ 20 ዋ።
አዋይ ዉልያ ባጋና ኬጸቴዳ ጎልያ
12 ጌሻ ጎልያፐ አዋይ ዉልያ ባጋና ደእያ መላ ሳኣፐ ሄፍን ባጋና እት ጎሊ ደኤ። ሄ ጎልያ 90 ዋ፤ ጎምፓይካ 70 ዋ። ሄ ጎልያ ጎዳይ 5 ዋ ኦርዳ።
ጌሻ ጎሊ ልከቴዳ
13 ሄ ብታኒ ጌሻ ጎልያ ካረ ባጋ ልክና አዱሳተይ 100 ዋ። ጌሻ ጎልያ ዞክሳፐ ቢደ፥ ህን አዋይ ዉልያ ባጋ ጎልያ ዞክሳ ጋካናዉ ሳኣ ልክና፥ 100 ዋ ግዴዳ። 14 አዋይ ዶልያ ባጋና ደእያ ጌሻ ጎልያ ጎምፓይ ላኡ መላ ሳአቱዋ ጉጂደ ልክና፥ 100 ዋ አኬ። 15 ላኡ ባጋናካ ደእያ አያ ሳአቱዋ ጉጂደ፥ አዋይ ዉልያ ባጋና ደእያ ጎልያ ልክና 100 ዋ ግዴዳ።
ጌሻ ጎልያዉ ግዶ ኦሶቱዋ
ጌሻ ጎልያ ጌሻ ሳአይ፥ አ ቆልኡነ አ ባራንዳይ 16 ዉይግያፐ ቢደ፥ ማስኮተቱዋ ጋካናዉ፥ ምን ሌጸት ኡቴዳ፤ ማስኮተቱካ ምን ሌጸት ኡቴድኖ። 17,18 ጌሻ ጎልያዉ ሶ ባጋ ክፍለቱዋ ጎዳይ ፐንገቱዋፐ ቦላዉ አና ጋካናዉ፥ ዛምባቱዋነ ክሩበቱዋ ምስለቱዋን አሌቀት ኡቴዳ፤ ክፍልያን ዩይ አናዉካ ዛምባ ምስሊነ ክሩብያ ምስሊ ዋላካን መት ኡቴዳ። ክሩበቶ ኡባዉ ላኡ ላኡ ሶምኢ ደኤ። 19 እት ባጋና አሳ ሶምኡዋ ማላትያዌ ዛምባ ምስልያኮ ጼሌ፤ ቃይ ሀራ ባጋና ጋሙዋ ሶምኡዋ ማላትያዌ ዛምባ ምስልያኮ ጼሌ። 20 ዉይግያፐ ደንድ ቢደ፥ ፐንገቱዋፐ ቦላ ባጋን ደእያ ሳኣ ጋካናዉ፥ ጎዳ ዩሹዋ ኡባይ ሄዋዳን አሌቀቴዳ። 21 ጌሻ ጎልያ ፐንገ ቆስለቱ ኡባይ ኦይዱ ማረ ግዲደ ማሰቴዳዋንታ፤ ኡንቱንቱ ኡባይካ እት ልከ።
ምፐ መዳ ያርሽያ ሳ
ኡባፐ አዳ ጌሻ ሳኣ ገልያሳ ስንን 22 ምፐ መቴዳ ያርሽያ ሳ ማላትያዌ ቤቴ። እካ ኦይዱ ማረ ግዲደ፥ አዱሳተይ ጎምፓይካ ቃራ፤ ኡንቱንቱ ላኡካ ላኡ ላኡ ዋ፤ አዉ ጌሳይ ቃይ ሄዙ ዋ። ማዛናቱዋ ቱሳቱ፥ ገደቱነ ምይያና ደእያ ሳንቃቱ ኡባይካ ምፐ ኦሰቴዳዋንታ። ሄ ብታኒ ታና፥ "ሀዌ መና ጎዳ ስንን ደእያ ጻርጴዛ" ያጌዳ።
ጌሻ ጎልያ ፐንገቱዋ
23 ጌሻ ሳአዉ እት ፐንጊ ደኤ፤ ቃይ ኡባፐ አዳ ጌሻ ሳአዉ እት ፐንጊ ደኤ። 24 እት እት ፐንግያዉ ግዱዋን ዳኮቲደ ዶየትያ ላኡ ሳንቃቱ ደኢኖ። 25 ጌሻ ሳኣ ጎዳቱዋ ቦላ መቴዳዋዳን፥ ፐንገቱዋ ሳንቃቱዋ ቦላካ ክሩበቱዋነ ዛምባቱዋ ምስሊ መት ኡቴዳ። ባራንዳፐ ቦላ ባጋና ስንና ደእያ ሳንቃ ካራይ ምፐ ኦሰቴዳዋ። 26 ሄ ባራንዳ ጎዳቱዋ ምይያን ማስኮተቱ ደኢኖ። ላኡ ባጋ ጎዳቱካ ዛምባ ምስልያን አሌቀቴድኖ። ሀድርሳ ባጋናነ ኡሸቻ ባጋና ደእያ ደ ክፍለቶ ካሜዳ ካራይ ደኤ።