ህዝቄላ 3

1 ቃይ እ ታዉ ሀዋዳን ያጌዳ፤ "ላ አሳ ናአዉ፥ ሄ ነ ስንን ደእያዋ ማ፤ ሀ ጻ ማጻፋ ማ። ባደ፥ እስራኤልያ አሳዉ ኦዳ" ያጌዳ።✝3:1-3 ሳፃ 10:9-10 2 ታን ሀንጋድ፤ ታን ማናዳን፥ ጻ ማጻፋ እ ታና ባርሴዳ። 3 ታና፥ "ላ አሳ ናአዉ፥ ሀ ታን ኔና ባርስያ ጻ ማጻፋ ማ፤ ነ ኡሉዋ አን ኩን" ያጌዳ። ታን ምያ ዎደ፥ ታ ዶናን ኤሳዳን ማልኤዳ።

4 ሄዋፐ ስሚደ፥ እ ታና ሀዋዳን ያጌዳ፤ "ኔኖ አሳ ናአዉ፥ ሀእ እስራኤልያ አሳኮ ባ፤ ታ ቃላ ኡንቱንቶ ኦዳ። 5 ኔን ኪተቴዳዌ እስራኤልያ አሳሳፐ አትና፥ ዶናይ ኤረተናነ ቃላይ ገለና ሃሳያይ አኬከተና አሳኮ ግደና። 6 ቃይ ታንካ ኔና ኡንቱንቱ ቃላይ ገለና፥ ኡንቱንቱ ሃሳያይካ ኤረተና ኡንቱንቱ ቃላ ኔን ኤራናዉ ዳንዳየና ዳሮ አሳኮ ኪታበይከ አላጋ ቢታ ቃላ ዴጹዋ ሃሳይያ ዳሮ አሳኮ ኪታበይከ። ቱሙ ታን ኔና ሄዋንቱኮ ኪታድታንቶ፥ ኡንቱንቱ ኔን ግያዋ ስሳና ሽን! 7 እስራኤልያ አሳይ ታን ኦድያዋ ስሳናዉ ኮየና ድራዉ፥ ኡንቱንቱ ኔን ኦድያዋካ ስስክኖ። አያዉ ጎፐ፥ ኩመን እስራኤልያ አሳይ ሞርጊ ዞዛነ ዬላይ ባይናዋንታ ግድያ ድራዉ፥ ነ ኦድያዋ ስስክኖ። 8 ሽን ታን ኔናካ ኡንቱንቱዋዳን ዎዛና ምኖነ ዬላይ ባይናዋ ኦና። 9 ታን ኔና ያሻይ ባይና አሳ ኦና፤ ዛላፐካ አ ምኖ ከሳና። ኡንቱንቱ ማካላንቻ አሳ ግዶፐካ፥ ኡንቱንቶ ያዮፓ፤ ዎይ ኡንቱንቶ ዳጋሞፓ" ያጌዳ።

10 ቃይ እ ታና ሀዋዳን ያጌዳ፤ "ላ አሳ ናአዉ፥ ታን ነዉ ኦድያ ቃላ ኡባ ምንሳደ ሀይዛነ ነ ዎዛናን ዎ። 11 ሀእ ደንዳ ባደ፥ ኦሞዱዋን ደእያ ነ አሳዉ ኦዳ። ኡንቱንቱ ስስና እጽናካ ኡንቱንቶ፥ ‘ኡባ ሞድያ መና ጎዳይ ሀዋዳን ያጌ’ ያጋደ ኦዳ" ያጌዳ።

12 ሄዋፐ ጉይያን፥ ታና አያናይ ፑደ ደንዳ፤ "መና ጎዳ ቦንቹ ደኢያሳፐ ደንድያ ዎደ" ታፐ ጉየና፥ ወልቃማ ኮሻ ስሳድ። 13 ቃይ ፓጻ መታቱ ቀፊ እቱ እቱዋና ሾጨትያ ኮሻይ፥ ኡንቱንቱ ምይያን ደእያ ይንግርያዋ ኮሻና ጋከቲደ፥ ጉጉን ኮሻዳን ሀንያ ኮሻ ስሳድ። 14 ሄዋፐ ጉይያን፥ አያናይ ታና ፑደ ደንደ፥ ሀራ ሳኣ አፌዳ። ያትና፥ ታን መና ጎዳ ዎልቃይ ታና ሞድ ደእሽን፥ ታ አያናን ጫመታደነ ይሎታደ ባድ። 15 ከባራ ሻፋ ማታን፥ ተል-አቢባን ኦሞደቴዳዋንቱኮ ጋካድ። ታን ሄዋን ዳጋማደ፥ ኡንቱንቱና ላፑን ጋላሳ ጋምኣድ።

ህዝቄል ዎችያ አሳ ግዴዳ

16 ላፑን ጋላሳ ዉርሰን መና ጎዳ ቃላይ ታኮ ሀዋዳን ያጊደ ዬዳ፤ 17 "ኔኖ አሳ ናአዉ፥ ታን ኔና እስራኤልያ አሳዉ ዎችያዋ ኦድ። ታ ዶናፐ ከስያ ቃላ ስሴዳ ፓይዱዋ ኡባን፥ ኡንቱንቱካ ናገታናዳን ሴራ። 18 ታን ናጋራንቻ፥ ‘ቱሙዋ ኔን ሀይቃና’ ያግያ ዎደ፥ ኔን ባደ አ ሴራና ዮፐ፥ አ ሸምፑካ አታና ማላ፥ እ ባረ ናጋራ ኦግያፐ ስማናዳን ኔን አ፥ ‘ኔና የኤ!’ ጋና ዮፐ፥ ሄ ናጋራንቻይ ባረ ናጋራን ሀይቃና፤ ሽን አ ሱ ታን ኔፐ ጭገታና። 19 ሽን ኔን ናጋራንቻ ሴርና፥ እ ባረ ናጋራፐ ዎይ ባረ ኢታ ኦግያፐ ስመናን እጾፐ፥ እ ባረ ናጋራን ሀይቃና፤ ሽን ኔን ነ ሁጲያ አሻና።

20 "ቃይ ጽሎ አሳይ ባረ ጽሎተፐ ጉየ ስሚደ፥ ኢታ ኦያ ዎደ፥ ታን አ ስንን ብያ ዎና፥ እ ሀይቃና። እ ስማናዳን ኔን አ፥ ‘ኔና የኤ!’ ጋቤና ድራዉ፥ እ ባረ ናጋራን ሀይቃና፤ እ ካሰ ኦዳ ጽሎ ኦሱ ዛሪደ ቆፈተና፤ ሽን ታን አ ሱካ ኔፐ ጭገታና። 21 ቃይ ኔን ጽሎ አሳይ ናጋራ ኦናዳን ሴርና፥ እካ ናጋራፐ ባረና ናጎፐ፥ ቱማ እ ፓጻ ደአና። አያዉ ጎፐ፥ እ ኔን ሴሬዳዋ ስሴዳ፤ ኔንካ ነ ሁጲያ አሻና" ያጊደ ዬዳ።

ህዝቄላ ጾሳይ ዱድሴዳ

22 ሄ ሳኣን መና ጎዳ ዎልቃይ ታና ሞዴዳ፤ ቃይ እ ታና፥ "ደንዳ፤ ዛንጋራ ባ። ነዉ ያን ኦዳና" ያጌዳ። 23 ታን ደንዳደ፥ ዛንጋራ ባድ። ሄ ሳኣን ካሰ ካባራ ሻፋ ማታን ታን በኤዳዋዳን፥ ሄዋን መና ጎዳ ቦንቹ ኤቄዳዋ በኣድ፤ ታን ታ ሶምኡዋ ቢታ ጋደ ጉፋናድ።

24 ሄዋፐ ጉይያን፥ አያናይ ታ ግዶ ገሊደ፥ ታና ታ ገድያን ኤሲደ፥ ታና ሀዋዳን ያጌዳ፤ "ባ፤ ነ ጎለ ባደ፥ ነ ቦላ ካርያ ጎርዳደ ኡታሻ። 25 ኔኖ አሳ ናአዉ፥ ኔን ዎዶሩዋን ቃሸታና፤ ኔን አሳኮ ከሳናዉ ዳንዳያካ። 26 ቃይ ኔን ዱደ ግዳናዳንነ ኡንቱንታ ሴረናዳን፥ ታን ነ እንጻርሳ ነ ኮክያና ጋ ኦይና። አያዉ ጎፐ፥ ኡንቱንቱ ማካላንቻ አሳ። 27 ሽን ታን ነዉ ኦድያ ዎደ፥ ታን ነ ዶና ዶይና፥ ኔንካ ኡንቱንቶ፥ ‘ኡባ ሞድያ መና ጎዳይ ሀዋዳን ያጌ’ ያጋና። ስስያ ኦንነ ስሶ፤ ስሰናን እጽያ ኦንነ እጾ። አያዉ ጎፐ፥ ኡንቱንቱ ማካላንቻ አሳ።