ህዝቄላ 24

ድስትያ ሌምሱዋ

1 ኑን ኦሞደቴዳ ኡዱፑን ላይን፥ ታማን አግናን፥ ታማን ጋላሳን፥ መና ጎዳ ቃላይ ታኮ ሀዋዳን ያጊደ ዬዳ፤ 2 "ላ አሳ ናአዉ፥ ሀዋ ሀች ጋላሳ ማዝጎብያን ጻፋ። አያዉ ጎፐ፥ ባብሎነ ካቲ የሩሳላመ ዶዴዳዌ ሀቻ።✝24:2 2 ካታ. 25:1፤ ኤር. 52:4 3 ሀ ማካላንቻ አሳዉ ሀ ሌምሱዋ ኦዳ፤ ‘ኡባ ሞድያ መና ጎዳይ ሀዋዳን ያጌ፤ "ማዳብያ ድስትያ ታማን ዎደ፥ ሃ አን ትጋ። 4 ያታደ ገድያነ አንጎሱዋ ማላትያ ሎኦ አሹዋ ኡባ ሙጻደ፥ አን የጋ፤ ሎኦ መቀካ ቃንጸሬደ፥ አን ኩን። 5 ሄዎ ኔን አካና ዶርሳይነ ዴሻይ ዉድያፐ ዶረቴዳዋ ግዶ። ም ድስትያፐ ጋርሳና ማራደ፥ አሹዋካ መቀካ ካአና ጋካናዉ ዶይሳ" ያጌ’ ያጋደ ኦዳ።

6 "ኡባ ሞድያ መና ጎዳይ ሀዋዳን ያጌ፤ ‘ሱ ጉስያዋንቱ ካታማትዉ አየ አና! ሽኢደ ኡባካ ጌየናን እጼዳ ማዳብያ ድስትያ ማላ እዛ ግዳዱ። እ ግዶን ደእያ ሙጸቴዳ አሹዋ ኡባ ሳማ የገናን ኩሽያን ጋከቴዳዋ፥ እቱዋ እቱዋ ከሳደ አካ።

7 " ‘አያዉ ጎፐ፥ ሄ ካታማታ ዎዳ አሳ ሱይ ሀኖ ጋካናስካ ኢናን ደኤ፤ ሱ ጉሳደ፥ ባናን ካማናዉ ቢታን ጉሰናን፥ አያይነ ካመና ዛላ ቦላን ጉሳዱ። 8 ሀሉዋ ከሳናዉ፥ ታ ሀንቁዋ ደንናዳን፥ እ ካመተና ማላ፥ እዛ ጉሴዳ ሱ ታን ዛላ ቦላን ዎድ’ ያጌ።

9 "ሄዋ ድራዉ፥ ኡባ ሞድያ መና ጎዳይ ሀዋዳን ያጌ፤ ‘ሱ ጉስያ ካታማትዉ አየ አና! ታንካ ም ሎይ ጉፓና። 10 ሄዋ ድራዉ፥ ዳሮ ም ዎ፤ ታማካ ኤ። አሹዋ ሎይደ ዶይሳ፤ ጫባካ ማልኤ፤ መቀይ ጹገቶ። 11 እ ሱሊደ ፐንትና፥ አ ቦላን ደእያ ማዳቢካ ቦንቂና፥ አ ቦላን ደእያ ቅታይ ሴራናዳንነ አ ቦላን ደእያ ሽአይ ጹገት ያናዳን፥ መላ ድስትያ ታማ ቦንቁዋ ቦላ ዎ። 12 ሄ ዳቡራይ ኡባይ ጮ መላ ግዴዳ፤ አ ቦላን ደእያ ዳሮ ሽአይ ሀራይ አቶ፥ ታማንካ ክችቤና። 13 ሀነ የሩሳላመ፥ ኔን ቱኔዳዌ ነ ኢታ ኦሱዋና። ታን ኔና ጌሻናዉ ዳቡርናካ፥ ኔን ነ ቱናተፐነ ነ ኢታ ኦሱዋፐ ጌየናን እጼዳ ድራዉ፥ ነ ቦላን ታ ሀንቁ ዉራና ጋካናዉ፥ ኔን ላኤን ጌያካ። 14 ታን መና ጎዳይ ሀዋ ኦዳድ፤ ሀዌ ሀናና። ታን ጉየ ስምከ፤ ቃረትከ፤ ታ ቆፋ ላምከ። ነ ኦግያዳንነ ነ ኦሱዋዳን፥ ታን ኔና ፕርዳና። ታን ኡባ ሞድያ መና ጎዳይ ሀዋ ኦዳይ’ ያጌ" ያጊደ ዬዳ።

ህዝቄላ ማቻታ ሀይቃዱ

15 መና ጎዳ ቃላይ ቃይካ ታኮ ሀዋዳን ያጊደ ዬዳ፤ 16 "ላ አሳ ናአዉ፥ ኔን ሲቅያነ ነ አይፍያዉ ሎእያ ነ ማቻቶ ታን እት ኩን ዎ አጋና። ሄዋን ካዮቶፓ፥ ዬኮፓነ አፎጾፓ። 17 ኦላ፥ ሽን ነ ኦልያ አሳይ ስሶፖ፤ ሀይቄዳዎ ካዮቶፓ። ኔን ነ ሁጲያን ጻጽያዋ ጻጻ፤ ነ ገድያንካ ጫማ ዎ። ነ ዶና ካሞፓ፤ ሾቻካ ሞፓ" ያጊደ ዬዳ።

18 ዎንታ ታን አሳዉ ኦዳድ፤ ሄ ጋላስ ኦማርስ ታ ማቻታ ሀይቃዱ። ዎንተ ጋላስ ዎንታ ጾሳይ ታና አዛዜዳዋዳን ኦድ። 19 ያትና፥ አሳይ ታና፥ "ሀ ኔን ኦያዎ ብለይ አየንቶ ኑዉ አያዉ ኦድኪ?" ያጊደ ኦቼዳ።

20 ታን ኡንቱንቶ ሀዋዳን ያጋደ ዛራድ፤ "መና ጎዳ ቃላይ ታኮ ሀዋዳን ያጊደ ዬዳ፤ 21 ‘እስራኤልያ አሳ ሀዋዳን ያጋ፤ ኡባ ሞድያ መና ጎዳይ ሀዋዳን ያጌ፤ ህንተ ጬቀትያ፥ ህንተ አይፍያዉ ሎእያነ ህንተ ሸምፑ አሞትያ ታ ጌሻ ጎልያ ታን ቱንሳና ሀናይ። ህንተ ጉየ አሼዳ ህንተ አቱማ ናናቱነ ህንተ ማጫ ናናቱ ማሻን ዉራና። 22 ሄ ዎደ ታን ኦዳዋዳን፥ ህንተካ ኦና። ህንተ ዶና ካምክታ፤ ሾቻካ ሚክታ። 23 ህንተ ሁጲያ ጻጺታ፤ ህንተ ገድያን ጫማ ዎታ። ካዮትክታ ዎይ ዬክክታ። ሽን ህንተ ህንተ ናጋራ ጋሱዋን ግልቃናነ እቱ እቶ ኦላና። 24 ሄ ዎድያን ህዝቄል ህንተዉ ማላታ ግዳናዋ፤ ኡባባካ እ ኦዳዋዳን፥ ህንተ ኦና። ሀዌ ሀንያ ዎደ፥ ታን ኡባ ሞድያ መና ጎዳ ግድያዋ ህንተ ኤራና’ ያጌ" ያጋ።

25 ጾሳይ ታና ሀዋዳን ያጌዳ፤ "ላ አሳ ናአዉ፥ ታን ኡንቱንቱ ናሸቻነ ቦንቹዋ፥ ኡንቱንቱ አይፍያዉ ሎእያባነ ኡንቱንቱ ዎዛናይ አሞትያባ፥ ቃይ ምኖ ግዴዳ ጌሻ ጎልያ፥ ኡንቱንቱ አቱማ ናናቱዋነ ኡንቱንቱ ማጫ ናናቱዋ ኡንቱንቱፐ ዎ አካና። 26 ሄ ጋላስ ነዉ ዎርያ ኦዳናዉ እት ከስ አኪደ አቴዳ አሳይ ያና። 27 ሄ ጋላስ ነ ዶናይ ዶየታና፤ ኔንካ አናና ሃሳያና፤ ላኤን ዱደ ከሳካ። ሄዋዳን ሀናደ፥ ኔን አሳዉ ማላታ ግዳናሳ። ታን መና ጎዳ ግድያዋ ኡንቱንቱ ሄዋን ኤራና ያጌዳ ያጊደ ዬዳ" ያጋድ።