ህዝቄላ 1

ህዝቄል ናበተዉ ጼሰቱሳ

1 ሀታማን ላይን፥

ኦይደንያ አግናን፥ እቼሸንያ ጋላሳን፥ ታን ካባራ ሻፋን ኦሞደት ቤዳዋንቱ ግዶን ደእሽን፥ ሳሎቱ ዶየትና፥ ጾሳ ሳፃ በኣድ።✝1:1 ሳፃ 19:11 2 ካቲ ዮኣኪን ኦሞደቶደፐ እቼሻንያ ላይን፥ ሄ አግናፐ እቼሸንያ ጋላሳን፥✝1:2 2 ካታ. 24:10-16፤ 2 ኦዱዋ 36:9-10 3 ባብሎነ ቢታን ካባራ ሻፋ ማታን ደእያ ታኮ፥ ቡዛ ናኣ፥ ቄስያ ህዝቄላኮ መና ጎዳ ቃላይ ዬዳ፤ ሄዋን መና ጎዳ ኩሺ ታና ሞዴዳ።

4 ታን ጼልያ ዎደ፥ ጎቲ ሁጲሳና ይያዋ በኣድ፤ ዎልቃማ ፖኡ ዎልቃማ ሻርያ ዶድ ዎዳ፤ ሄ ሻርያ ግዱዋን ዋልቃንይ ፖዡ ጌ። ዋልቃንዉ ግዶ ዎዛናይ ጶልያ ናስያ ማላቴ። 5 ሄዋ ግዶን ኦይዱ ፓጻ መታቱ ደኢኖ። ኡንቱንቱ አሳ ማላቲኖ፤✝1:5 ሳፃ 4:6 6 ሽን ኡንቱንቶ እቶ እቶ ኦይዱ ኦይዱ ሶምኡነ ኦይዱ ኦይዱ ቀፊ ደኤ። 7 ኡንቱንቱ ገዲ ስት ጌዳዋ፤ ኡንቱንቱ ገድያ ያቻይ ማራ ገድያ ማላነ ቁጪደ ጌሼዳ ናስያ ብራታዳን ጶሌ። 8 ኡንቱንቱ ቀፍያፐ ጋርሳና ኦይዱ ባጋናካ አሳ ኩሽያ ማላትያ ኩሺ ደኤ። ሄ ኦይዳቶካ ዴሙነ ቀፊ ደኤ። 9 ኡንቱንቱ ቀፊ እቱ እቱዋ ቦቼ፤ ኡንቱንቱ ኡባይካ ያነ ሃነ ስመናን ስት ጊደ ስንዉ ቢኖ። 10 ኡንቱንቶ እቶ እቶ ስን ባጋና አሳ ሶምኢ ደኤ፤ ኡሸቻ ባጋና ጋሙዋ ሶምኢ ደኤ፤ ቃይ ሀድርሳ ባጋና ቦራ ሶምኢ ደኤ፤ ቃይ ጉየ ባጋና አርጋን ሶምኢ ደኤ፤✝1:10 ህዝ. 10:14፤ ሳፃ 4:7 11 ኡንቱንቱ ሶምኢ ሄዋ ማላቴ። ኡንቱንቱ ቀፊ ቦላዉ ምጨት ኡቴዳ፤ ኡንቱንቱ እቶ እቶ ላኡ ቀፊ ላኡ ባጋናካ ህንኮ መታ ቀፍያ ቦቼ፤ ቃይ ላኡ ቀፊ ኡንቱንቱ ቦላ ቦላ ካሜ። 12 ኡንቱንቱ ኡባይካ ስት ጊደ ስንዉ ቤድኖ፤ ያነ ሃነ ስመናን፥ ጾሳ አያናይ ብያሳ ሀቃነ ቢኖ። 13 ሀ ፓጻ ደእያ መታቱ ግዶን እት ኤጽያ ታማ ቦንቁዋ ማላትያዌነ ስንዉነ ጉየ ቃጽያ፥ ኤጽያ ጾምፕያ ማላትያዌ ደኤ፤ ሄ ታማይ ጶሌነ አ ግዶፐካ ዋልቃንይ ከሴ። 14 ሀ ፓጻ መታቱ ዋልቃንዳን፥ ስንዉነ ጉየ ኤሌል ስመረቲኖ።

15 ሀ ኦይዱ መታቱዋ ታን ጼልሽን፥ ኡንቱንቱ ምየ ባጋ ሳኣን ደእያ ይንግረትያዋንታ በኣድ፤ እት እት መታ ምየ ባጋን እት እት ይንግረትያዌ ደኤ።✝1:15-21 ህዝ. 10:9-13 16 ሀ ይንግረትያዋንቱ አልኦ ሹቻዳን ጶሊኖ፤ ኡንቱንቱ ኦይዱካ መንነ ማላን እቱ እቱዋ ማላቲኖ። እት ይንግረይ ላኡ ይንግረ ግዲደ መቴዳ፤ እቱ እቱዋ ግዱዋና ካን አዋ ማላቴ። 17 ኡንቱንቱ ብያ ዎደ ባረንቱ ስን ዛር ዎዳ ኦይዱ ባጋፐ እቱዋኮ ሀቃዋ ግዶፐነ ቢኖ፤ ሀ መታቱ ብያ ዎደ ይንግረትያዌ ዎራ ስመና። 18 ዎጋነ ያሽያ ኦይዱ ይንግረቱ ደኢኖ፤ ሄ ይንግረቱዋ ጋጻ ዩሹዋ ኡባን ጼልያ አይፊ ኩሜዳ።✝1:18 ሳፃ 4:8

19 ሀ መታቱ ብያ ዎደ፥ ኡንቱንቱ ምይያን ሀ ይንግረቱ ጎንዶረቲኖ፤ ሄ መታቱ ቢታፐ ፑደ ደንድያ ዎደ፥ ሀ ይንግረቱካ ደንዲኖ። 20 ደኡዋ አያናይ ብያ ሀቃነ ሀ ይንግረቱካ ደንዲደ ቢኖ፤ አያዉ ጎፐ፥ ሀ ደኡዋ አያናይ ይንግረቱዋ ግዶን ደእያ ድራሳ። 21 ሀ መታቱ ብያ ዎደ፥ ይንግረቱካ ቢኖ፤ መታቱ ኤቂያ ዎደ፥ ይንግረቱካ ኤቂኖ፤ ቃይ መታቱ ቢታፐ ፑደ ደንድያ ዎደ፥ ይንግረቱ ኡንቱንቱና እትፐ ደንዲኖ። አያዉ ጎፐ፥ ደኡዋ አያናይ ይንግረቱዋ ግዶን ደኤ።

22 ሀ ፓጻ መታቱዋ ሁጲያፐ ቦላ ባጋና ማስቶትያዳን ጶሊደ አይፍያ ጫድያ ምጨቴዳ ሳሉዋ ጉፋንዋ ማላትያባይ ደኤ።✝1:22 ሳፃ 4:6 23 ሄ ጉፋንዋፐ ጋርሳ ባጋና ኡንቱንቱ ቀፊ ስት ጊደ፥ እቱዋዌ እቱዋኮ ምጨት ኡቴዳ፤ ቃይ ኡንቱንቱ ኡባዉካ ኡንቱንቱ ቦላ ካምያ ላኡ ላኡ ቀፊ ደኤ። 24 ሀ መታቱ ፓልያ ዎደ፥ ኡንቱንቱ ቀፍያ ጊረይ ሃ ኩንዋ ጉንዳን፥ ቃይ ኡባ ዳንዳይያ ጾሳ ኮሻዳንነ ጮራ ኦላንቻቱዋ ጫቡዋዳን ሀንያዋ ስሳድ። ኡንቱንቱ ፓሉዋ አግያ ዎደ፥ ባረንቱ ቀፍያ ሺሽ አኪኖ።✝1:24 ሳፃ 1:15፤ 19:6

25 ኡንቱንቱ ባረንቱ ቀፍያ ሺሽ አኪደ፥ ሄ ሳኣን ኤቂደእሽን፥ ኡንቱንቱ ሁጲያፐ ቦላ ባጋና ደእያ ሄ ጉፋንዋ ማላትያዋ ቦላ ባጋፐ ኮሻይ ዬዳ። 26 ሄ ጉፋንዋ ማላትያዋፐ ቦላ ባጋና ሳምፔርያ ግያ እንቁዋፐ መቴዳ ካዉተ አራታ ማላትያዌ ደኤ፤ ሄ ካዉተ አራታ ማላትያዋ ቦላ አሳ ማላትያዌ ኡቴዳ።✝1:26 ህዝ. 10:1፤ ሳፃ 4:2-3 27 ታን አ በእያ ዎደ፥ አ ጼሳ ማላትያሳፐ ቦላ ባጋይ ታማን ቦንቄዳ ናስያ ብራታዳን ጶሌ፤ ቃይ ጼሳፐ ጋርሳ ባጋይ ታማ ማላቴ፤ አ ዩሹዋን ጶልያ ፖኡ ደኤ።✝1:27 ህዝ. 8:2 28 አ ዩሹዋን ጶልያ ፖኡ እራ ጋላስ ሻርያን ኤቄዳ ዙሉዋ ማላቴ።

ሀዌ መና ጎዳ ቦንቹዋ ቆንጨ ማላቴ። ሄዋ በኤዳ ዎደ፥ ቢታን ዱገ ጉፋናደ፥ እቱ ሃሳይያ ኮሻ ስሳድ።