ህዝቄላ 25

አሞናቱዋ ቦላ ኦደቴዳ ትምቢትያ

1 መና ጎዳ ቃላይ ታኮ ሀዋዳን ያጊደ ዬዳ፤✝25:1-7 ኤር. 49:1-6፤ ህዝ. 21:28-32፤ አሞጻ 1:13-15፤ ሶፎ. 2:8-11 2 "ላ አሳ ናአዉ፥ ነ ሶምኡዋ አሞና ቢታኮ ዛራደ፥ አሞናቱዋ ቦላ ትምቢትያ ኦዳ። 3 ሀዋዳን ያጋ፤ ‘ኡባ ሞድያ መና ጎዳ ቃላ ስስተ። ኡባ ሞድያ መና ጎዳይ ሀዋዳን ያጌ፤ "ህንተ ታ ጌሻ ጎሊ ቱንያ ዎደ፥ እስራኤልያ ቢታይ መላ አትያ ዎደነ ይሁዳ አሳይ ኦሞዶ ብያ ዎደ፥ ሀሹ! ጌዳ ድራዉ፥ 4 ታን ህንተና አዋይ ዶልያ ባጋ ቢታ አሳዉ ላታ ኦደ እማና። ያቶፐ ኡንቱንቱ ህንተ ግዶን ካምቢያ ኬጻና፤ ደአና። ህንተ ማና ቴራ ኡንቱንቱ ማና፤ ህንተ ማካ ኡንቱንቱ ኡሻና። 5 ታን ራባ ካታማ ጋሎቱ ሄመትያ ሳኣ ከሳና፤ አሞናቱዋ ጋድያካ ዶርሳ ዉዲ አላጽያ ሳኣ ኦና። ታን መና ጎዳ ግድያዋ ህንተ ሄዋን ኤራና" ያጌ።

6 " ‘አያዉ ጎፐ፥ ኡባ ሞድያ መና ጎዳይ ሀዋዳን ያጌ፤ "ህንተ እስራኤልያ ባሻን ኩሽያ ባቄዳ ድራዉ፥ ጉፔዳ ድራዉነ ናሸቲደ ቅሊጬዳ ድራዉ፥ 7 ታን ህንተ ቦላ ታ ኩሽያ የዳድ። ህንተና ካዉተቶ ኦሞዱዋ ኦደ እማና። ታን ህንተና አሳ ግዶፐ ሾዳና፤ ካዉተቱዋ ግዶፐካ ይሳና። ታን መና ጎዳ ግድያዋ ህንተ ሄዋን ኤራና" ያጌ።

ሞኣባ ቢታ ቦላ ኦደቴዳ ትምቢትያ

8 " ‘ኡባ ሞድያ መና ጎዳይ ሀዋዳን ያጌ፤ "ሞኣብነ ሰኢር፥ በእተ፥ ይሁዳይ ሀራ ካዉተቱዋ ማላ ያጌዳ ድራዉ፥✝25:8-11 ኢሳ. 15:1—16:14፤ 25:10-12፤ ኤር. 48:1-47፤ አሞጻ 2:1-3፤ ሶፎ. 2:8-11 9 ታን ሞኣባ ቢታ ቦላን ገላደ፤ ዎራጃደ አ ዛዋ ናግያ፥ ቤት-ያሽሞታ፥ ባኣል-ማኦናነ ቅርያታይማ ጌተትያ፥ ኤረቴዳ ካታማቱዋ ይሳና። 10 ሀዋፐ ስንናዉ አሞናቱዋናካ ጉጃደ፥ ኡንቱንቱ ካዉተቱዋ ግዶን ሀሳየተናዳን፥ ታን ኡንቱንታ አዋይ ዶልያ ባጋ ቢታፐ ዬዳ አሳቶ ዱረታዳን አደ እማና። 11 ታን ሞኣባ ፕርዳና። ሄ ዎደ ታን መና ጎዳ ግድያዋ ኡንቱንቱ ሄዋን ኤራና" ያጌ።

ኤዶማ ቢታ ቦላ ኦደቴዳ ትምቢትያ

12 " ‘ኡባ ሞድያ መና ጎዳይ ሀዋዳን ያጌ፤ "ኤዶማቱ ይሁዳ ቦላ ሀሉዋ ከሴዳ ድራዉነ ዳሮ ባይዛንቻ ግዴዳ ድራዉ፥✝25:12-14 ኢሳ. 34:5-17፤ 63:1-6፤ ኤር. 49:7-22፤ ህዝ. 35:1-15፤ አሞጻ 1:11-12፤ አብድ. 1-14፤ ሚልክ. 1:2-5 13 ታን ኡባ ሞድያ መና ጎዳይ ታ ኩሽያ ኤዶማ ቦላ የዳና። አን ደእያ አሳነ መህያ ሙለ ይሳና፤ ይሳደ መላ ከሳና። ተማና ካታማፐ ቢደ፥ ዳዳና ካታማ ጋካናዉ፥ ኡንቱንቱ ማሻን ቡሳከታና። 14 ታን ኤዶማዉ ታ አሳ እስራኤልያ ባጋና ሀሉዋ ከሳና። እስራኤላቱ ኡንቱንቱ ቦላ ታ ሀንቁዋነ ታ ሀንቁዋ ኬሻ ኦና። ታን ሀሉዋ ከሴዳዋ ኡንቱንቱ ኤራና። ታን ኡባ ሞድያ መና ጎዳይ ሀዋ ኦዳይ" ያጌ።

ፕልስጼማቱዋ ቦላ ኦደቴዳ ትምቢትያ

15 " ‘ኡባ ሞድያ መና ጎዳይ ሀዋዳን ያጌ፤ "ፕልስጼማቱ ባረንቱ ዎዛና ኢታተን ሀሉዋ ከሴዳ ድራዉነ ጋምኤዳ ሞርከተን ይሁዳ ካደ ይሳናዉ ኮዬዳ፥✝25:15-17 ኢሳ. 14:29-31፤ ኤር. 47:1-7፤ ኢዩ. 3:4-8፤ አሞጻ 1:6-8፤ ሶፎ. 2:4-7፤ ዛካ. 9:5-7 16 ሄዋ ድራዉ ኡባ ሞድያ መና ጎዳይ ሀዋዳን ያጌ፤ ታን ታ ኩሽያ ፕልስጼማቱዋ ቦላ የዳደ ከሊታዌቱዋ ቃንጻና። ታን ኡንቱንታነ አባ ዶናን አቴዳዋንታ ኡባ ይሳና። 17 ታን ኡንቱንቶ ዎልቃማ ሀሉዋ ከሳና፤ ታ ሀንቁዋን ኡንቱንታ ሙራና። ታን ኡንቱንቶ ሀሉዋ ከስያ ዎደ፥ ታን መና ጎዳ ግድያዋ ኡንቱንቱ ኤራና" ያጌ’ ያጋ" ያጊደ ዬዳ።