1 "ህንተ እሻቱዋ፥ ጾሳይ ህንተና፥ ‘አም (ታ አሳ ግያዋ) ያጌ’ ያግተ። ቃይ ህንተ ምቼቱዋ፥ ጾሳይ ህንተና፥ ‘ሩሃማታ (ህንተንቶ ቃረታይ ግያዋ) ያጌ’ ያግተ።

2 "ህንተ ዳዮ ሴርተ፤ እዞ ሴርተ። አያዉ ጎፐ፥ አ ታ ማቼ ግዱኩ፤ ታንካ እ አስና ግድከ። እዛ ባረ ሶምኡዋ ሻርሙጻዳን በስያዋ አጉ፤ ባረ ሻርሙጻ ኦሱዋካ ባረ ንቱዋ ግዱዋፐ ድጉ። 3 ሄዌ ዮፐ፥ እዛ የለቴዳ ጋላሳዳን፥ ታን እዞ ጺራ ካሎ አሻና። ቃይ መሌዳ ቢታዳን እዞ ኦና፤ ታን እዞ ሳሙዋን ዎና። 4 ኡንቱንቱ ሻርሙጻትፐ የለቴዳ ናናቱዋ ግዴዳ ድራዉ፥ ታን እ ናናቶ ቃረትከ። 5 ኡንቱንቱ ዳያ ሻርሙጻዱ፤ ኡንቱንታ ባረ ኡሉዋን ቶኬዳና ካዉሻባ ሀናዱ። ዋናደ ጎፐ፥ እዛ፥ ‘ታን ታ ቁማነ ታ ሃ፥ ታ ሱፍያነ ታ ሊኑዋ፥ ታ ዛይትያነ ታ ኡሻ ታዉ እምያ ታ ላገቱዋ ካላደ ባና’ ያጋዱ።

6 "ሄዋ ድራዉ፥ ታን እ ኦግያ አጉንን ጎርዳና፤ እዛ ባረ ሎሱዋ ደመና ማላ፥ ታን ግምቢያ ግምባና። 7 እዛ ባረ ላገቱዋ ጌዱዋ ዎጻና፥ ሽን ጋኩኩ፤ ኡንቱንታ ኮያና፥ ሽን ደሙኩ። ሄዋፐ ጉይያን እዛ፥ ‘ታዉ ሀእ ደኡሳፐ በንዌ ኬክያ ድራዉ፥ ስማደ ታ ኮይሮ አስናኮ ባና’ ያጋና።

8 "ካ፥ ዎይንያ ኤሳነ ዛይትያ እዝዉ እሜዳዌነ ኡንቱንቱ ባኣላ ግያ ኤቃዉ ሺሽያ ብራነ ዎርቃ እዝዉ ዳርሴዳዌ ታና ግድያዋ እዛ ኤረናን እጻዱ። 9 ሄዋ ድራዉ፥ ካእያ ዎደ ታ ካ፥ ቃይ ቴርያ ዎደ ታ ዎይንያ ታን ኢፐ ዛራደ አካና። ሄዋዳንካ፥ እዝ ካሉዋ ማይዛናዉ፥ ሱፍያፐነ ሊኑዋፐ ዳደቴዳ ማዩዋካ ኢፐ ቃራ አካና። 10 ቃይ እዝ ሲቃቱዋ ስንን ታን እዝ ካሉዋ በሳና፤ ታ ኩሽያፐ ኦንነ እዞ አሸና። 11 ታን እዝ ናሸቻይ ኡባይ፥ እዝ ባላይ፥ እዝ አግናይ ጼርያ ጋላሳቱ፥ እዝ ሳምባታ ጋላሳቱ፥ ላይን ላይን ቦንቼትያ እዝ ባላቱ ኡባይ አታናዳን፥ ኦና። 12 እዛካ፥ ‘ታ ሲቃቱ ታዉ እሜዳ የዉ ሀዋ’ ያጌዳ እዝ ዎይንያ ቱራቱዋነ ባላስያ ጌተትያ ምቱዋ ታን ይሳና፤ ታን ኡንቱንታ ዎራ ኦና፤ ባዙዋ ዶአቱ ኡንቱንታ ማና። 13 እዛ ታና ዶጋደ፥ ባረ ሲቃቱዋ ካላደ፥ ጉቱቻቱዋንነ አሌቆቱዋን ባረዉ አሌቀታደ፥ ባኣላ ግያ ኤቃዉ እጻና ጩዋዬዳ ባላ ጋላሳቱዋ ድራዉ፥ ታን እዞ ሙራና። ታን መና ጎዳይ ሀዋ ኦዳድ።

14 "ሄዋ ድራዉ፥ ታን እዞ ላባደ መላ ቢታ አሀና፤ ታን እዝዉ ሲቁዋ ቃላን ኦዳና። 15 ያን ታን እዝ ዎይንያ ቱራ ሳኣ እዝዉ ዛራደ እማና፤ መቱዋ ዛንጋራ እዛ ህዶታን ናግያባይ ገልያ ፐንግያ ኦና። ግብጼ ጋድያፐ ከሴዳ ዎድያዳን፥ የጼዳዋዳ ባረ ዎዶሮተ ላይዳን፥ እዛ ያን የጻና" ያጌ።✝2:15 ኢያሳ 7:24-26

16 ቃይካ መና ጎዳይ ሀዋዳን ያጌ፤ "ሄ ጋላስ እዛ ታና፥ ‘ታ አስና’ ያጋ ጼሳናፐ አትና፥ ሀዋፐ ስንናዉ፥ ‘ታ ባኣላ’ ያጋ ጼሱኩ። 17 አያዉ ጎፐ፥ ታን እዝ ዶናፐ ባኣላ ሱን ድጋና፤ ሀዋፐ ስንናዉ ታን እዞ ባኣላ ሱን ጼስስከ። 18 ሄ ጋላስ ታን ታ አሳ ድራዉ ሳኣ ዶአቱዋና፥ ሳሉዋ ካፎቱዋናነ ቢታና ጎሸትያ መታቱዋና ጫቁዋ ጫቀታና። ታን ጋድያፐ ዎንዳፍያ፥ ማሻነ ኦላ ይሳና፤ ያቶፐ ኡንቱንቱ ዎፑ ጊደ፥ ሳሮ ደአና።

19 "ታን ኔና መናዉ ታዉ ጊግሳና፤ ጽሎተንነ ሱረ ፕርዳን፥ አገና ሲቁዋንነ ማሮታን ታዉ ጊግሳና፤ 20 ታን አማነታደ ኔና ታዉ ጊግሳና። ኔንካ መና ጎዳ ኤራና" ያጌ።

21 ቃይካ መና ጎዳይ፥ "ሄ ጋላስ ታን ዛሩዋ እማና፤ ታን ሳሎቶ ዛሩዋ እምና፥ ኡንቱንቱ ሳአዉ ዛሩዋ እማና። 22 ሳአይካ ካዉ፥ ዎይንያ ኤሳዉነ ዛይትያዉ ዛሩዋ እማና፤ ኡንቱንቱ እዝራኤልያዉ ዛሩዋ እማና። 23 ታን እዞ ጋድያን ታዉ ቶካና።✝2:23 ሮመ 9:25፤ 1 ጰጽ. 2:10 ካሰ ታን ‘ሎሩሃማ ጎንዉ’ (ቃረታቤናንዉ) ሀእ ቃረታና። ቃይ ‘ሎኣም’ ጎዋዉ (ታ አሳ ግደናዋንታ)፥ ‘አም’ (ታ አሳ) ጋና፤ ኡንቱንቱካ ታና፥ ‘ኔን ኑ ጾሳ’ ያጋና" ያጌ።