Ermaasa 11

Ermaasanne S’oossaa C’aak’k’uwaa

1 Med’inaa Godaappe Ermaasaw yeedda k’aalay hawaa; 2 «Ha c’aak’uwaa k’aalatuwaa sisa; Yihudaa asawunne Yerusaalame kataman de’iyaawanttoo oda. 3 Med’inaa Goday Israa’eeliyaa S’oossay hawaadan yaagee gaade oda. Ha c’aak’uwaa k’aalaw azazettenawe shek’k’etteeddawaa gido. 4 Taani kase hintte aawotuwaa Gibs’e biittaappe, birataa seerissiyaa c’ooc’iyaappe kessiyaa wode, Taw eeno giite; ta hinttena azaziyaawaa ubbaa ootsite. Yaatooppe, hintte ta asaa gidana; taanikka hintte S’oossaa gidana yaagaad. 5 Hewaadankka, maatsaanne eessaa goggiyaa biittaa kase hintte aawaatoo immanaw, taani c’aak’k’eedda c’aak’uwaa polana yaagaad. Hewenne, hachchi hintte laatteedda biittaa yaaga» yaagee.

Taani, «Eeno, Med’inaa Godaw, amen"i» yaagaad.

6 Med’inaa Goday taw hawaadan yaageedda; «Hawaa ta k’aalaa ubbaa Yihudaa katamatuwaaninne Yerusaalame ogetuwaan hawaadan yaagaade awaaya; ‹Ha c’aak’uwaa k’aalaa sisite; Aa kaallite. 7 Kase hintte aawotuwaa taani Gibs’e biittaappe kessoodeppe hachchi gakkanaw, zaara zaaraadde, «Taw azazettite!» gaade seeraad. 8 Shin unttunttu ta k’aalaa sisibeykkino woy hayzzibeykkino. Hewaa aggiide, unttunttu barenttu iita wozanaa muumetetsaa kaalleeddino. Taani ta c’aak’uwaa k’aalaa unttunttu naagana mala azazaad; shin unttunttu is’s’eeddino. Hewaa diraw, he c’aak’uwaa giddon s’aafetteedda shek’aa ubbaa unttunttu bolla ahaad› yaaga» yaageedda.

9 Zaariidekka Med’inaa Goday taw hawaadan yaageedda; «Yihudaa asaa giddoninne Yerusaalamen de’iyaawanttu giddon mak’k’uu de’ee. 10 Unttunttu kase ta k’aalaa sisennan is’s’eedda barenttu mayzza aawotuwaa nagaraw guyye simmeeddino. Unttunttu hara s’oossatoo goynneeddinonne unttunttoo ootseeddino. Israa’eeliyaa asatuukka Yihudaa asatuukka taani kase unttunttu mayzza aawotuwaana c’aak’k’eteedda c’aak’uwaa kantseeddino. 11 Hewaa diraw, Med’inaa Goday unttuntta hawaadan yaagee; ‹Unttunttu bak’atiide attanaw danddayenna metuwaa taani unttunttu bolla ahana. Unttunttu taw waassinakka, taani unttunttoo sisikke. 12 He wode Yihudaa katamatuwaa asatuunne Yerusaalame asatuu biide, barenttu is’aanaa c’uwayiyaa s’oossatoo waassana. Shin metuwaa wode he s’oossatuu mulekka unttunttu maaddikkino. 13 Hinttenoo, Yihudaa asatoo, hintte s’oossatuu hintte katamatuwaa keeshshaa c’ora. K’ay Ba’aala giyaa he yeella s’oossaw is’aanaa c’uwayanaw hintte esseedda yarshshiyaa sa’atuu Yerusaalame ogetuwaa keeshshaa c’ora› yaagee.

14 «Ermaasaa, ha asatoo taana ayinne woossoppa; unttunttu diraw gaannatoppa woy oochchoppa. Ayaw gooppe, unttunttu barenttu metuwaa gallassi taana s’eesiyaa wode taani unttunttoo sisikke.

15 «Darotuwaana bare iita mak’k’uwaa mak’k’ettiide ta siik’iyaa Asay ta Geeshsha Golliyaan beettanaw bessii? Hintte hintte iita oosuwaa ootsishin, yarshshetteedda mehiyaa ashuu hinttena muruwaappe ashshanee? Ashshintto hintte nashettana shin» yaageedda.

16 Med’inaa Goday neena, Dic’c’iyaa, Lo"o Ayifiyaa Ayifiyaa Wogaraa yaagiide suntseedda. Shin I ha wogaraa wolk’k’aama dadaa guntsan, taman s’uuggana; Aa k’ankkatuukka me"erettana.

17 Taani, hinttena tokkeedda Ubbaappe Wolk’k’aama Med’inaa Goday hintte bolla iitabaa ahanaw awaayaad. Ayaw gooppe, Israa’eeliyaa asatuunne Yihudaa asatuu Ba’aalaw is’aanaa c’uwayiide, taana yiloyeeddino.

Ermaasa Wod’anaw Mak’etteedda Mak’k’uwaa

18 Med’inaa Goday unttunttu mak’k’uwaa taw k’onc’c’isseedda diraw, taani eraad. He wode unttunttu iitaa ootsiyaawaa I taana besseedda. 19 Taani shukaw kaaletsiide afiyaa aada dorssaa maraa mala gidaaddi. Unttunttu ta bolla, «Ane nuuni mitsaakka Aa ayifiyaakka d’ayisseetto. Aa suntsay mulekka hassayettenna mala, ane nuuni Aa pas’a de’iyaawanttu giddoppe d’ok’olliide d’ayisseetto» yaagiide mak’etteeddawaa taani erabeykke. 20 Shin abeet Ubbaappe Wolk’k’aama Med’inaa Godaw, s’illuwaa pirddiyaawoo, asaa wozanaa kahaa k’oriyaawoo, neeni unttunttu bolla ne haluwaa kesiyaawaa taana bessa. Ayaw gooppe, taani ta k’ohuwaa new maganaad.

21 Hewaa diraw, «Med’inaa Godaa suntsan timbbitiyaa odoppa; neeni nu kushiyan hayk’k’ana» yaagiide, neena wod’anaw koyiyaa Anatoota asaw Med’inaa Goday giyaawe hawaa. 22 Ubbaappe Wolk’k’aama Med’inaa Goday hawaadan yaagee; «Taani unttuntta murana. Unttunttu wodallatuu mashshaan hayk’k’ana; unttunttu mac’c’a naanatuunne attuma naanatuu koshan hayk’k’ana; 23 unttunttuppe ittuunne de’enna. Ayaw gooppe, taani muriyaa laytsi Anatoota asaa bolla iitabaa ahana» yaagee.