Ermaasa 21

Yerusaalame S’oonettanawaa Timbbitii Odetteedda

1 Kaatii Sedek’iyaasi Malkkiyaa na’aa Paashihuuranne Ma’iseeya na’aa k’eesiyaa Soofonaasa ha ooshaa oochchana mala, Med’inaa Goday Ermaasakko kiitteedda. 2 Unttunttu, «Baabloone Kaatii Naabukadanas’oori bare olanchchatuwaanna ha katamaa yuuyyi aad’d’iide dooddeedda diraw, ane nuw Med’inaa Godaa oochcha. Ooni erii, Med’inaa Goday beniwaadan, malalissiyaa oosuwaa nu diraw ootsiide, Aa guyye zaaranenttonne» yaageeddino.✝21:2 2 Kat. 25:1-11; 2 Od. 36:17-21

3 Ermaasi unttunttoo zaariide, hawaadan yaageedda; «Biide Sedek’iyaasaw yaagite; 4 Med’inaa Goday Israa’eeliyaa S’oossay hawaadan yaagee; ‹Neeni Baabloone kaatiyaananne gimbbiyaappe karenna ne katamaa dooddiyaa Aa olanchchatuwaanna olettiyaa, ne kushiyan de’iyaa olaa miishshaa taani guyye ne bolla zaarana. K’ay unttuntta ubbaakka ha katamatiw giddo gelissana. 5 Taani ta huup’iyaan yeddeedda kushiyan, wolk’k’aama k’esiyaan, yiluwaan, hank’k’uwaaninne wolk’k’aama seeran neena olana. 6 Taani ha kataman de’iyaawantta, asaakka mehiyaakka shoc’ana. Unttunttu iita harggiyaan wurana. 7 Hewaappe guyyiyaan, Yihudaa Kaatiyaa Sedek’iyyaasa, Aa oosanchchatuwaanne iita harggiyaappe, mashshaappenne koshaappe palaheedda, ha katamaa asaa ubbaa, Baabloone Kaatiyaa Naabukadanas’oorawunne unttuntta wod’anaw koyiyaa morkketoo taani Med’inaa Goday aatsaade immana. I unttunttu k’ara mashshaan siifana. I unttunttoo k’arettenna, woy saaliide aggena, woy maarenna› yaagee yaagite» yaageedda.

8 Med’inaa Goday Ermaasa, «Gujjaadekka asaw hawaadan yaagaade oda; S’oossay hawaadan yaagee; ‹Be’ite, taani hintte sintsan de’uwaa ogiyaanne hayk’k’uwaa ogiyaa wotsaad. 9 Ha katamaa giddon takkiyaa Asay ooninne mashshaan, koshan woy iita harggiyaan hayk’k’ana. Shin katamaappe kesiide biide, katamaa dooddiide oyk’k’eedda Baabloonetoo bare kushiyaa immiyaa Asay ooninne pas’a attanawaa; he uray bare shemppuwaa s’alala ashshana. 10 Ayaw gooppe, taani ha katamaw keekanaw gidennaan iitanaw ta k’ofaa k’achchaad. Baabloone kaatiyaw Aa aatsaade immana; ikka ha katamaa taman s’uuggana. Taani Med’inaa Goday hawaa odaad› yaagee» yaaga.

11 K’aykka Yihudaa kaatiyaa golliyaa asaw hawaadan yaaga; Med’inaa Godaa k’aalaa sisite! 12 Hinttenoo, Daawita zaretoo, Med’inaa Goday hinttena hawaadan yaagee; «Wonttina wonttina suure pirddite; bonk’k’etteeddawantta uk’k’unniyaawanttu kushiyaappe ashshite. Hewe d’ayooppe, hintte iita oosuwaa gaasuwaan ta hank’k’uu tamaadan ees’s’i kesana; ooninne Aa toyissenna yaagee yaaga» yaageedda.

13 Med’inaa Goday hawaadan yaagee; «Neenoo, Yerusaalame, neeni dembban de’iyaa zaallaadan, zanggaaraappe pude d’ok’k’u gaade beettaasa; shin taani neenanna olettana. Neeni, ‹Ooninne ta bolla s’alenna woy ta de’iyaasaa gelenna› yaagaasa; 14 shin taani Med’inaa Goday neena ne oosuwaadan murana. Taani ne kaate golliyaan tamaa oytsana; ne yuushshuwaan de’iyaawaa ubbaa mi d’ayissana» yaagee.