Ermaasa 26

Ermaasi Hayk’k’uwaa Pirddaappe Attee

1 Iyoosiyaasa na’ay Yihudaa Kaatii Iyo’ak’eemi koyiro kaateteedda wode,✝26:1 2 Kat. 23:36—24:6; 2 Od. 36:5-7 ha k’aalay Med’inaa Godaappe yeedda. 2 Med’inaa Goday taana hawaadan yaageedda; «Med’inaa Godaa Golliyaa dabaaban ek’k’a. Med’inaa Godaa Golliyaan goyinnanaw Yihudaa katamatuwaappe yiyaa ubbaw oda. Taani, ‹Oda› gaade azazeedda k’aalaa ubbaappe ittuwaanne ashshoppa. 3 Ooni erii, unttunttu sisiide, barenttu iita ogiyaappe simmanenttonne. Yaatintto taanikka unttunttu oosuwaa iitatetsaa diraw, unttuntta d’ayissanaw k’oppeeddawaa agga bashana.

4 «Unttunttoo oda; Med’inaa Goday hawaadan yaagee; ‹Hintte taani odiyaawaa sisennan is’s’ooppe, taani hinttew immeedda higgiyan beennan is’s’ooppe, 5 (hintte sisennan is’s’inakka) taani zaara zaaraadde hinttekko kiitteedda, timbbitiyaa odiyaa ta k’oomatuwaa k’aalaa sisennan is’s’ooppe, 6 yaatooppe taani ha Geeshsha Golliyaa Seelodan ootsana. Ha katamaakka sa’aan de’iyaa kawutetsatoo ubbaw k’anggetsaa ootsana› yaagee» yaaga yaageedda.✝26:6 Iya. 18:1; Maz. 78:60; Erm. 7:12-14

7 Ermaasi Med’inaa Godaa Golliyaan ha k’aalaa odishin, k’eesatuu, timbbitiyaa odiyaawanttunne Asay ubbay siseeddino. 8 K’ay Ermaasi Med’inaa Goday, «Asaa ubbaw oda» giide Aa azazeedda k’aalaa ubbaa odiide poleedda wode, k’eesatuu, timbbitiyaa odiyaawanttunne Asay ubbay Aa oyk’k’eeddino. Oyk’k’iide, «Neeni hayk’k’anaw bessaasa! 9 Neeni, ‹Ha Gollii Seelodan hanana; k’ay ha katamaykka bazuwaanne ona gidana› yaagaade, Med’inaa Godaa suntsan ayaw timbbitiyaa odaaddii?» yaageeddino. Med’inaa Godaa Golliyaan shiik’eedda asatuu ubbay Ermaasa dooddeeddino.

10 Yihudaa kaappatuu hewaa siseedda wode, kaatiyaa golliyaappe kesiide, Med’inaa Godaa Golliyaa yeeddino. Yiide Med’inaa Godaa Golliyaa yuushshuwaa gimbbiyaw Ooratsa Penggiyaa giyaa penggiyaan utteeddino. 11 K’eesetuunne timbbitiyaa odiyaawanttu kaappatoonne asaa ubbaw hawaadan yaageeddino; «Hintte hintte haytsaan siseeddawaadan, ha bitanii ha katamaa bollan timbbitiyaa odeedda diraw, I hayk’k’anaw bessee!» yaageeddino.

12 Ermaasi kaappatoonne asaa ubbaw hawaadan yaagiide haasayeedda; «Ha hintte siseedda k’aalay ubbay ha Golliyaa bollanne ha katamaa bolla, ‹Hanana› gaade taani odana mala, Med’inaa Goday taana kiitteedda. 13 Hewaa diraw, ha"i hintte ogiyaakka hintte oosuwaakka laammite; Med’inaa Godaa hintte S’oossaa k’aalaw azazettite. Yaatooppe, Med’inaa Goday hintte bolla ahana geedda iitabaa aggi bashana. 14 Taana gidooppe, taani hintte kushiyan de’ay. Hinttew lo"anne suure maleteeddabaa ta bolla ootsite. 15 Hintte mata sid’ii bayinnan ittibaa erite. Hintte taana wod’ooppe, hintte hintte bolla, ha katamaa bollanne Aa giddon asaa bolla s’illo suutsaa ac’uwaa ahana. Ayaw gooppe, taani ha k’aalaa ubbaa hintte haytsaan yeggana mala, tumuwaappe Med’inaa Goday taana kiitteedda» yaageedda.

16 Kaappatuunne Asay ubbay k’eesatoo nne timbbitiyaa odiyaawanttoo hawaadan yaageeddino; «Ha bitanii hayk’k’anaw bessena! Ayaw gooppe, I Med’inaa Godaa nu S’oossaa suntsan nuw odeedda» yaageeddino.

17 Gadiyaa c’imatuwaappekka ittuu ittuu ek’k’iide, shiik’eedda asaw ubbaw hawaadan yaagiide odeeddino; 18 «Hizk’k’iyaasi Yihudaan kaateteedda laytsan Mooreshetappe yeedda Mikiyaasi Yihudaa asaw ubbaw hawaadan yaagiide, timbbitiyaa odeedda; ‹Ubbaappe Wolk’k’aama Med’inaa Goday hawaadan yaagee;✝26:18 Mik. 3:12 «S’iyoonee shoyk’aadan goshettana. Yerusaalame katamaykka koletiide, shuchchaa dooriyaa gidanawaa. Geeshsha Gollii kees’etteedda derii wora mayyana» yaagee› yaageedda. 19 Yaatina, Yihudaa Kaatii Hizk’k’iyaasinne Yihudaa Asay ubbay Aa wod’eeddee? Tuytti, Hizk’k’iyaasi Med’inaa Godaw yayyiide, S’oossaw watiwateedda. Med’inaa Goday bare ootsana geedda iitabaa aggi basheedda. Shin nuuni nuurekka nu bolla loytsi iitabaa ahana haneetto» yaageedda.

Iyoo’aak’eeme Ooriyoona Wod’d’iseedda

20 (K’iriyaati-Yi’aariima giyaa saan de’iyaa Shamaa’iyaa na’aa Ooriyoona giyaa itti hara bitanii de’ee; ikka Ermaasi odeeddawaadan, ha katamaa bollanne ha biittaa bolla Med’inaa Godaa suntsan timbbitiyaa odeedda. 21 Kaatii Iyo’ak’eemi, Aa olanchchatuu, Aa oosanchchatuu Ooriyoon odeeddawaa siseedda wode, kaatii Aa wod’anaw koyeedda. Ooriyoon hewaa sisiide yayyiide, Gibs’e biittaa bak’ateedda. 22 Gido shin, Kaatii Iyo’ak’eemi Akiboora na’aa Elnnaataananne hara asatuwaa Gibs’e kiitteedda. 23 Unttunttu Ooriyoona Gibs’eppe kessiide, Kaatiyaa Yo’ak’eemaw afeedino. Mashshaan I Aa wod’isiide, Aa anhaa gadiyaa makkaanan olisseedda.)

24 Shin Saafaana na’aa Ahik’aami Ermaasa maaddeedda diraw, Asay Aa wod’anaw aatsiide immibeenna.