Ermaasa 4

Simmite Giyaa S’eessaa

1 Med’inaa Goday hawaadan yaagee; «Israa’eeliyaa asaw, simmooppe, haa taakko simmite. Hintte taani shenetiyaa hintte eek’atuwaa ta sintsappe diggooppe, taappe wora baana d’ayooppenne 2 hintte tumuwaan, suuretetsaaninne s’illotetsan, ‹Med’inaa Goday ero!› giide c’aak’k’ooppe, he wode kawutetsatuu an anjjettananne an c’eek’k’ana» yaagee.

3 Med’inaa Goday Yihudaa asawunne Yerusaalamen de’iyaawanttoo hawaadan yaagee; «Hintte otsa biittaa goshite; aguntsaa bolla zeroppite.✝4:3 Hos. 10:12 4 Hinttenoo, Yihudaa asatoo, Yerusaalamen de’iyaawanttoo, hintte hintte huup’iyaa Med’inaa Godaw k’as’s’arite; hintte wozanaa shookuwaa diggite. Hewe d’ayooppe, hintte ootseedda iitatetsaa diraw, ta hank’k’uu tamaadan ees’s’i kesana. Aa ooninne toyissanaw danddayenna» yaagee.

S’oossay Huup’issa Bagga Biittaappe Iitabaa Ayee

5 S’oossay hawaadan yaagee; «Yihudaan odite. Yerusaalamen, ‹Biitta ubbaan malakataa punnite!› yaagiide awaayite. Hintte k’aalaa d’ok’k’issiide, hawaadan giide waassite! ‹Ittippe shiik’ite! Ane gimbbii yuuyyi aad’d’eeda katamaa denddite!› yaagite. 6 Asay S’iyoone baana mala malaatite! Hinttew saro attanaw bak’atite! Gam"oppite! Ayaw gooppe, taani huup’issa bagga biittaappe iitabaanne wolk’k’aama bashaa ahana hanay. 7 Gaammuu bare de’iyaa buuraappe kesiyaawaadan, kawutetsatuwaa d’ayissiyaawe bare sa’aappe denddee. Hintte biittaa d’ayissanaw yeedda. Hintte katamatuu bayiide ona gidanawaa. 8 Hewaa diraw, maak’aa mayyiide, ‹Aayyee! Aayye!› yaagiide zilaalitenne yeekkite. Ayaw gooppe, Med’inaa Godaa hank’k’uu suulliyaawe nu bollappe kichchibeenna» yaagee.

9 K’aykka Med’inaa Goday, «He gallassi, kaatiyaa wozanaynne kaappotuwaa wozanay yayyana. K’eesetuukka dagamana. Timbbitiyaa odiyaawanttukka, ‹Poora!› giide doonaa oyk’k’ana» yaagee.

10 Taani, «Ha"i Ubbaa Mooddiyaa Med’inaa Godaw, mashshay unttunttu k’ood’iyaan wod’d’iyaa wode, ‹Hinttew sa’ay saro gidana› yaagaade, ha asaanne Yerusaalame loytsi c’imuwaa c’immaada» yaagaad.

11 He wodiyaan ha asaassinne Yerusaalamew, Med’inaa Goday hawaadan yaagee geetettana; «Bazzuwaan ayaynne bayinna d’ok’k’a deretuwaappe michchiyaa c’arkkuu ta asaa bolla c’arkkana; shin hewe katsaa ses’s’anawunne geeshshanaassa gidenna. 12 Hewaappe loytsi wolk’k’aamiyaa c’arkkuu ta azazuwaan c’arkkana; ha"i taani unttunttu bolla pirddana» gee geetettana.

Yihudaa Biittay Morkkiyaan Dooddetteedda

13 Be’ite, morkkii shaariyaadan kesee. Aa paraa gaaretuukka gotiyaa mala; Aa paratuu arggantsaappekka aad’d’i elleelliino. Aayye ana nuunoo! Baawa d’ayeeddo!

14 Neenoo Yerusaalame, attana mala, ne wozanaa meec’c’aade iitatetsaappe geeshsha digga! Iita k’ofay ne wozanaan awude gakkanaw gam"anee? 15 Daana katamaappenne Efireema Deriyaappe yeeddawanttu iitabaa awaayiino. 16 Med’inaa Goday hawaadan yaagee; «Kawutetsatoo odite; Yerusaalamiwukka hawaadan yaagiide awaayite; Yihudaa katamatuwaa bollan, ‹Haako biittaappe olaa awaayiyaa olanchchatuu yi de’iino; 17 I ta bolla makkaleedda diraw, gaden de’iyaa katsaa naagiyaawanttudan, he olanchchatuu Yihudaa yuushshuwaan yuuyyi aad’d’iino› yaagite» yaagee.

18 Yihudaa asatoo, Hintte hanuunne hintte oosuu hawaa ubbaa hintte bolla aheedda. Hawe hinttew muro. I ay keeshshaa c’ammiyaabee! Hintte wozanaa ay keeshshaa c’addiyaabee!

Ermaasi Bare Asaa Gishshaw Zilaaleedda

19 Aayye taanoo! Taani hawaa woota danddayanee! Aayye ta wozanaw! Ta wozanay diddik’ee; taani c’o"u gaanaw danddaykke. Ayaw gooppe, taani malakataa punuwaanne olaa waasuwaa sisaad. 20 Iitabay iitabaa kaallee; mule biittay bayeedda. Ta dunkkaanetuunne gaaridatuu ellekka d’ayeeddino. 21 Awude gakkanaw olaa malaataa s’eellaneenne malakataa punusaa sisanee?

22 S’oossay hawaadan yaagee; «Ta Asay booza; unttunttu taana erikkino. Unttunttu k’ofi bayinna naanatuwaa; unttunttoo akeeki baawa. Unttunttu iitabaa ootsanaw eranchcha; shin lo"obaa ootsanaw erikkino» yaagee.

Ermaasi Be’eedda Sas’aa

23 Taani sa’aa s’eellaad; sa’ay giigibeennawaanne ayaynne bayinna mela gidiyaawaa be’aad. K’ay salotuwaa s’eellaad; unttunttun poo’uu bayinnawaa be’aad. 24 Deretuwaa s’eellaaddi; unttunttu k’aas’s’iyaawaanne zoozetuu ubbay guyyenne sintsaw gaji gajiyaawaa be’aaddi. 25 Taani s’eellaad; shin ay asanne be’abeykke; saluwaa kafotuukka ubbay paalliide bak’ateeddino. 26 S’eellaad; aradda biittay mela gideeddawaa be’aad; Med’inaa Godaa sintsan, Aa suulo hank’k’uwaa sintsan he biittaa katamatuukka yoodetteeddino.

27 Med’inaa Goday hawaadan yaagee; «Mule biittay bayana; shin taani Aa wurssa d’ayissikke. 28 Hewaa diraw, sa’ay yeekkana; salotuukka bollan d’umana. Ayaw gooppe, taani ga diggaad; marssettikke. Taani k’ofaa k’achcha kichchaad; aggikke» yaagee.

29 Paraa asatuunne wonddaafiyaa asatuu garmmaamuwan, Asay katamaa ubbaappe bak’atana. Baggatuu wos’s’iide wora garssa gelina, baggatuu k’ay zaallaa shibbiino. Katamay ubbay oniide, de’iyaa asaa d’ayeedda.

30 Neenoo, baya kichcheedaanee, neeni ay ootsay? Ne zo’o mayuwaa ayaw mayyay? Work’k’aa alleek’k’uwaa ayaw wotsay? Ne ayifiyaa sip’intsaa ayaw okkayi? Neeni c’oo mela neena loytsaadda. Ne laggetsatuu neena kad’eeddino; unttunttu neena wod’anaw koyiino. 31 Taani yeluwaa oyk’k’eteedda mishirata waassiyaawaa mala waasuwaa sisaad. I waasuu koyiro na’aa yeliyaa mac’c’a mishirati ooliyaa mala. He waasuu, Yerusaalama shemppuwaa te"ettaade, bare kushiyaa mic’aade, «Aayye taanoo! Hekko taana wod’anaw haniino!» yaagaade waassiyaa waasuwaa.