Ermaasa 34

Kaatiyaa Sedek’iyaasaw Odetteedda Timbbitiyaa

1 Baabloone Kaatii Naabukadanas’oori, Aa olanchchatuu ubbaynne I mooddiyaa kawutetsatuwaan Asay ubbay, Yerusaalamenne Yerusaalame yuushshuwaan de’iyaa katamatuwaa ubbaa oliyaa wode, ha k’aalay Med’inaa Godaappe Ermaasaw yeedda;✝34:1 2 Kat. 25:1-11; 2 Od. 36:17-21 2 Med’inaa Goday Israa’eeliyaa S’oossay hawaadan yaageedda; «Ba; baade Yihudaa Kaatiyaa Sedek’iyaasa hawaadan yaaga; Med’inaa Goday hawaadan yaagee; ‹Be’a, taani ha katamaa Baabloone kaatiyaa kushiyan aatsaade immana; I ha katamaa taman s’uuggana. 3 Neeni Aa kushiyaappe kessa akkakka; neeni omoodettananne aw aad’d’a imettana. Neeni ne ayifiyaan Baabloone kaatiyaa be’ana; ikka neenana haasayana. Hewaappe guyyiyaan, neeni Baabloone biittaa baana yaagee.

4 « ‹Gidooppenne, Yihudaa Kaatiyaw Sedek’iyaasaa, Med’inaa Goday giyaawaa sisa! Newaa Med’inaa Goday hawaadan yaagee; «Neeni olan hayk’k’akka; 5 neeni saro hayk’k’uwaa hayk’k’ana. Neeppe kase de’eedda kaatetuwaa bonchchoo, ne mayzza aawaatoo is’aanaa c’uwayeeddawaadan, Asay ne bonchchookka is’aanaa c’uwissana. Yaatiide, Aayyee nu kaatiyaw yaagiide new yeekkana. Taani Med’inaa Goday hawaa oday» yaagee› yaagaade oda» yaageedda.

6 Hewaappe guyyiyaan, timbbitiyaa odiyaa Ermaasi ha timbbitiyaa ubbaa Yihudaa Kaatiyaa Sedek’iyaasaw Yerusaalamen odeedda. 7 He wode Baabloone kaatiyaa olanchchatuu Yerusaalame katamaanne Yihudaan atteeda katamatuwaa oleeddino. Laakishanne Azeek’a geetettiyaa katamatuwaa s’alalay Yihudaan atteeda gimbbetteedda katamatuwaa.

Ayiletuwaa Ayiletetsaappe Kessiyaa Awaayuwaa

8 Kaatii Sedek’iyaasi ayiletuwaa ayiletetsaappe kessiyaa awaayuwaa awaayanaw Yerusaalamen asaa ubbaanna k’aalaa c’aak’uwaa c’aak’k’eteeddawaappe guyyiyaan, Ermaasaw Med’inaa Godaappe k’aalay yeedda. He awaayuu, 9 «Asay ubbay bare Ibraawe attuma asatuwaanne mac’c’a asatuwaa ayiletetsaappe kesso; ooninne Ayihuda asaa gideedda bare ishaa ayile ootsoppo» yaagee. 10 Hewaa diraw, Asay ubbaynne kaappatuu ubbay c’aak’k’eteedda c’aak’uwaadan, barenttu attumanne mac’c’a ayiletuwaa ayiletetsaappe kessanawunne laa"entso zaariide ayileyenan agganaw mayyeeddino; unttuntta ayiletetsaappe kesseeddino. 11 Shin barenttu k’ofaa laammiide, ayiletetsaappe kesseedda barenttu attumanne mac’c’a ayiletuwaa zaariide ayileyeedino.

12 Hewaappe guyyiyaan, Med’inaa Godaa k’aalay Ermaasakko yeedda. 13 Med’inaa Goday Israa’eeliyaa S’oossay hawaadan yaagee; «Taani hintte mayzza aawotuwaa Gibs’eppe, ayiletetsaa biittaappe kesseedda wode, unttunttunna k’aalaa c’aak’uwaa c’aak’k’a uttaad. 14 He k’aalaa c’aak’uwaa maaran, ‹Ibraawe ayilii de’iyaa Asay ubbay, ayiletuwaa usuppun laytsaa oosissi simmiide, laappuntsa laytsi ayiletetsaappe kessi yeddite› yaagaade azazaad. Shin hintte mayzza aawotuu taani odiyaawaa sisennan is’s’eeddino taw azazettibeykkino.✝34:14 Dom. 21:2; Zar. 15:12 15 Hinttekka mata wodiyaappe kase hintte nagaraa aggiide, ayiletuwaa ayiletetsaappe kessanaw awaayeeddita; ta sintsan likkebaa ootseeddita. K’ay hewaa ootsanaw ta sintsan, ta suntsay s’eesettiyaa ta Geeshsha Golliyaan c’aak’uwaa c’aak’k’eteeddita. 16 Shin ha"ikka hintte hintte k’ofaa laammiide, ta suntsaa tunisseeddita. Wootiide gooppe, unttunttu koyeeddawaadan, ayiletetsaappe kesseedda hintte attumanne mac’c’a ayiletuwaa zaariide ayileyeedita.

17 «Hewaa diraw, taani Med’inaa Goday odiyaawe hawaa: hintte taw azazettenan is’s’iide, hintte ishaa woy hintte shooruwaa ayiletetsaappe kessiyaa awaayuwaa awaayibeykkita. Be’ite, hintte bolla olay iita harggiinne koshay kesana mala, taani awaayay. Taani hinttena sa’aa bolla de’iyaa kawutetsatoo dagama ootsana. 18 Ta k’aalaa c’aak’uwaa mentseedda asaa, ta sintsan k’aalaa c’aak’k’eteedda c’aak’uwaa k’aalatuwaa naagennan is’s’eedda asaa, unttunttu c’aak’k’oo shukkiide, bagga bagga kessi maaran wotsiide, laa"u baggaappe gidduwaana aad’d’iide, he maraadan taani unttuntta ootsana. 19 He asatuukka Yihudaa kaappatuwaa, Yerusaalame kaappatuwaa, biittaa mooddiyaawantta, k’eesetuwaanne maaran wotseedda maraa ashuwaa gidduwaana mentseedda asaa ubbaa. 20 Taani unttuntta unttunttu morkkatuwaa kushiyaaninne unttuntta wod’anaw koyiyaa asatuwaa kushiyan aatsaade immana; unttunttu anhay saluwaa kafotoonne sa’aa do’atoo k’uma gidanawaa.

21 «Taani Yihudaa Kaatiyaa Sedek’iyyaasanne Aa kaappatuwaakka unttunttu morkkatuwaa kushiyan, unttuntta wod’anaw koyiyaawanttu kushiyaaninne hinttena oliyaawaa aggeeda Baabloone kaatiyaa olanchchatuwaa kushiyan aatsaade immana. 22 Taani Med’inaa Goday Baabloone olanchchatuwaa azazana; unttunttu ha katamaa simmana. Unttunttu ha katamaa olana, omooddananne taman s’uuggana. Yihudaan de’iyaa katamatuwaakka Asay de’enna ayinne baynna sa’aa ootsana» yaagee.