1 Med’inaa Godaappe Ermaasaw yeedda k’aalay hawaa; 2 «Dendda; urk’k’aa med’d’iyaa bitaniyaa golle ba. Yaan taani neena ta k’aalaa sissana» yaageedda. 3 Taani duge urk’k’aa med’d’iyaa bitaniyaa golle baade, I bare med’d’iyaa yinggiriyaawaan urk’k’aa med’d’iyaawaa be’aad. 4 I med’d’ishina, miishshay Aa kushiyan bayeedda. I he urk’k’aa zaariide munak’k’iide, barena lo"iyaa hara miishshaa kessiide med’d’eedda.

5 He wodiyaan Med’inaa Godaa k’aalay, hawaadan yaagiidde, taakko yeedda; 6 «Israa’eeliyaa asatoo, ha urk’k’aa med’d’iyaa bitanii ootsiyaawaadan, taani hinttena ootsanaw danddaykkitaa? Yaagee Med’inaa Goday. Israa’eeliyaa asatoo, be’ite; urk’k’ay barena med’d’iyaawaa kushiyan de’iyaawaadan, hinttekka ta kushiyan de’iita. 7 Ay wode gidooppenne, taani itti biittaabaa woy itti kawutetsaabaa, ‹Taani hinttena d’ok’ollana, yooddananne d’ayissana› gaade odina, 8 he taani odeedda kawutetsay bare iitatetsaappe aggiide simmooppe, taani unttunttu bolla ahana geedda iitabaa ahenan agga bashana. 9 K’ay ay wode gidooppenne, taani itti biittaabaa woy itti kawutetsaabaa, Taani hinttena kees’s’ananne tokkana gaade odina, 10 he kawutetsay taani odiyaawaa sisennan is’s’ooppe ta sintsan iitabaa ootsooppe, taani ootsana geedda lo"obaa ootsennan aggaashana.

11 «Hewaa diraw, ha"i Yihudaa asatoonne Yerusaalamen de’iyaawanttu hawaadan yaaga; Med’inaa Goday yaagee; Be’ite, taani hintte bolla iitabaa med’d’aynne halchchaad. Hintte ubbaykka hintte iita ogiyaappe simmite; hintte ogiyaanne hintte oosuwaa laammite yaagee yaaga. 12 Shin unttunttu, ‹Hewe ayinne maaddenna! Nuuni nu halchcheeddawaadan hanana; nuuni huup’iyaan huup’iyaan nu iita wozanaa muumetetsaadan ootsana› yaagana» yaageedda.

13 Hewaa diraw, Med’inaa Goday hawaadan yaagee;

«Hawaa malabaa sisi eriitee?

yaagiide ane kawutetsatuwaa giddon lal"ite.

Wodoratta Israa’eeliyaa loytsi sheneyiyaawaa ootsaaddu.

14 I barew, Liibaanoosa deriyaa bollan de’iyaa shachchay,

zaallaa s’eeraappe d’ayi erii?

He deriyaappe goggiyaa irs’s’a haatsay meli erii?

15 Shin ta asatuu taana dogeeddino;

unttunttu patsenna s’oossatoo is’aanaa c’uwayiino.

Barenttu ogiyaappe, barenttu beni loossuwaappe d’ubetteeddino;

unttunttu ogiyaa aggiide, gas’aana beeddino.

16 Unttunttu barenttu biittaa dagantsiyaabaanne,

med’inaw kad’etteeddawaa kesseeddino.

Yaana aad’d’iyaa ooninne sheneteenne bare huup’iyaa k’aatsee.

17 Away wulliyaa bagga c’arkkuwaadan,

taani unttuntta unttunttu morkkatuwaa sintsan laalana.

Unttunttu metuwaa gallassi taani unttunttoo zokkiyaa zaaranaappe attina,

ta som"uwaa haasayikke» yaagee.

18 Asatuu hawaadan yaageeddino; «Haa yiite; ane Ermaasa bolla mak’etteetto. Ayaw gooppe, k’eesatuu tamaarissiyaa higgii, aad’d’eeda eranchchatuu immiyaa zorii, timbbitiyaa odiyaawanttu odiyaa k’aalay d’ayenna. Haa yiite; ane Aa nu ins’s’arssan p’iroytte. I odiyaa k’aalaa sisennan aggeeto» yaageeddino.

19 Abeet Med’inaa Godaw, ta odiyaawaa sisa; ta morkketuu ta bolla haasayiyaawaa hayzza. 20 Lo"o ootseedda asaw iitaa zaariii? Shin unttunttu taw ollaa bookkiino. Taani ne hank’k’uu unttunttuppe simmana mala, unttunttu diraw lo"obaa haasayanaw ne sintsan ek’k’eeddawaa k’oppa. 21 Hewaa diraw, unttunttu naanatuwaa koshaw aatsaade imma; unttunttakka mashshaw aatsaade imma. Unttunttu mac’c’a asatuukka na’ay bayinnawanttanne am"e gidino. Unttunttu attuma asatuukka wod’iyaa harggiyaan gakketino; unttunttu wodallatuukka olan siifettino. 22 Unttunttu k’oppennaan neeni unttunttu bolla bonk’k’iyaawantta yeddina, unttunttu golliyaan waasuu keso. Ayaw gooppe, unttunttu taana kunddisanaw ollaa bookkeeddino; ta gediyawukka p’iriyaa wotseeddino. 23 Shin abeet Med’inaa Godaw, unttunttu taana wod’anaw mak’etteeddawaa ubbaa neeni eraasa. Neeni unttunttu iitatetsaa atto gooppa, woy unttunttu nagaraa ne sintsappe k’uc’c’oppa. Unttunttu ne sintsan s’oonettiide kunddino. Ne hank’k’uwaa wode neeni unttuntta hawaadan ootsa.