1 Ermaasi biro naagiyaawanttu dabaaban de’ishiina, Med’inaa Godaa k’aalay laa"entsuwaakka yeedda. 2 Sa’aa med’d’eedda Med’inaa Goday, giigissiide Aa sa’aan wotseedda Med’inaa Goday, Aa suntsaykka Med’inaa Godaa geetettiyaawe taana hawaadan yaagee; 3 «Neeni taana S’eesa; taani new koyana; neeni erenna woggabaanne wolk’k’aamabaa taani new odana. 4 Baabloonatuwaa biittaa dooriita, dooddetsaanne mashshaa diggana mala, dirssaa gimbbiyaa minisanaw koleedda ha katamaa golletuwaabaanne Yihudaa kaatetuwaa golletuwaabaa taani Med’inaa Goday, Israa’eeliyaa S’oossay oday. 5 Hinttenana olettanawunne taani ta hank’k’uwaaninne yiluwaan shoc’ana asatuwaa anhaa he sa’atuwaan kuntsanaw Baabloonetuu geliino. Ayaw gooppe, unttunttu iitatetsaa ubbaa diraw, taani ha katamaappe ta som"uwaa gentsaad.

6 «Gidooppenne, taani ha katamaanne an de’iyaa asaa zaaraadde patsana; unttunttu pas’atetsaakka zaarana; loytsi daro saruwaanne woppa de’uwaa taani unttunttoo immana. 7 Yihudaa asaanne Israa’eeliyaa asaa omooduwaappe zaaraadde ishalissana; unttunttu kase de’eeddawaadan ootsaade taani unttuntta gimbbana. 8 Unttunttu taana naak’k’eedda nagaraa ubbaappe taani unttuntta geeshshana; geeshshaade unttunttu taana naak’k’eedda naak’uwaanne makkaleedda makkala ubbaa atto yaagana. 9 Hewaappe guyyiyaan, Yerusaalame katamay taw nashshechchaa, bonchchuwaanne galataa sa’aan de’iyaa kawutetsatuwaa ubbaa sintsan ahana. Taani Yerusaalame asaw ootsiyaa lo"obaanne he katamaw ahiyaa duretetsaanne sarotetsaa sisiide, kawutetsatuu ubbay yashshan kokkorana» yaagee.

10 Med’inaa Goday hawaadan yaagee; «Hintte, ‹Asayinne mehii bayinna mela biittaa› geedda ha sa’atuwaan, asaynne mehii bayinna Yihudaa katamatuwaaninne Yerusaalame ogetuwaan, nashshechchaanne ililssaa kooshshay, 11 bullachchiyaawaanne bullachchettiyaan kooshshaynne Med’inaa Godaa Geeshsha Golliyaa galataa yarshshuwaa ahiidde, hawaadan yaagiide yes’s’iyaa asaa kooshshay sisettana.✝

«Ubbaappe Wolk’k’aama Med’inaa Godaa galatite;

ayaw gooppe, I keeka.

Aggena Aa siik’uu med’inaawaa» yaagiino.

Ayaw gooppe, «Taani unttuntta omooduwaappe zaaraadde unttunttu biittaa ahana; unttuntta kase de’eeddawaadan ootsaade, taani ishalissaade wotsana» yaagee Med’inaa Goday.

12 Ubbaappe Wolk’k’aama Med’inaa Goday hawaadan yaagee; «Ha asaynne mehii bayinna ayinne baynna biittaaninne an de’iyaa katamatuwaan hentsanchchatuu barenttu dorssaa wudiyaa allas’s’issiyaa gadii de’ana. 13 Gezziyaan de’iyaa katamatuwaan, zooziyaappe garssaana de’iyaa katamatuwaan, Neegeeba mela biittaan de’iyaa katamatuwaan, Biiniyaama biittan, Yerusaalame yuushshuwaan de’iyaa heeratuwaaninne Yihudaa katamatuwaan hentsanchchatuu barenttu dorssaa zaaretsiide payduwaan. Taani Med’inaa Goday hawaa oday» yaagee.

14 Med’inaa Goday hawaadan yaagee; «Taani Israa’eeliyaa asawunne Yihudaa asaw ootsana geedda lo"o k’aalaa poliyaa gallassatuu yaana;✝ 15 he gallassatwaaninne he wodetuwaan taani Daawita zariyaappe itti s’illo Aac’aa dentsana; I he biittan suure pirddaanne s’illotetsaa ootsana. 16 He wode Yihudaa Asay attana; Yerusaalame asaykka woppu giide de’ana; ha katamaykka Med’inaa Godaa, Nu S’illotetsaa yaagetti s’eesettana. 17 Daawita zeretsaappe Israa’eeliyaa kawutetsaa araatan uttiyaa Asay ubbakka d’ayenna. 18 Hewaadankka, s’uuggiyaa yarshshuwaa, katsaa yarshshoonne hara yarshshuwaa ubbaa gede yarshshanaw Leewiyaa zariyaappe k’eesiyaa gidiyaa Asay med’inawukka ta sintsan d’ayenna. Taani Med’inaa Goday hawaa oday» yaagee.✝

19 Med’inaa Godaa k’aalay Ermaasakko yeedda. 20 Med’inaa Goday hawaadan yaagee; «Taani gallassaananne k’ammaana k’aalaa c’aak’uwaa c’aak’k’etaad; he c’aak’uwaan unttunttu barenttoo keeretteedda wodiyaan simeretteeddino. He gallassaanne k’ammaa c’aak’uwaa hintte laammanaw danddayooppe, 21 taani Aa zariyaappe kawutetsaa araatan uttana Asay ubbakka d’ayennaadan, ta k’oomaa Daawitenna c’aak’k’eteedda c’aak’uwaa laammana; k’ay ubbatoo taw ootsiyaa, Leewiyaa zare gidiyaa k’eesetuwaana c’aak’k’eteedda c’aak’uwaakka laammana. 22 Taani ta k’oomaa Daawita zeretsatuwaanne ta sintsan ootsiyaa Leewiyaa zare k’eesetuwaa paydanaw danddayettenna saluwaa s’oolinttetuwaadaaninne makkina wurenna abbaa shafiyaadan c’orayana» yaagee.

23 Med’inaa Godaa k’aalay k’aykka Ermaasakko hawaadan yaagiidde yeedda; 24 «Ha asay, ‹Med’inaa Goday bare dooreedda laa"u kawutetsatuwaa, Israa’eeliyaanne Yihudaa aggi basheedda› yaagiide haasayiyaawaa neeni akeekabeyikkii? Unttunttu ta asaa kad’iide, barena danddayeedda kawutetsaa kesikkino giide k’oppiino. 25 Taani Med’inaa Goday gallassaananne k’ammaana c’aak’k’eteedda c’aak’uwaanne saluwaanne sa’aa higgiyaa mintsabeennabaa gidintto, 26 taani Yaak’ooba zeretsatuwaanne ta k’oomaa Daawita zeretsatuwaa agga bashana; yaatabeennawaa gidintto, Abrahaama, Yisaak’anne Yaak’ooba zaratuwaa bolla kaateyanaw Daawita zeretsaa doorennan aggana. Taani ta asaa maarana; taani unttuntta zaaraadde ishalissana» yaageedda.