Ermaasa 9

1 Ta huup’ii haatsaa ollaa gideerenneeshsha! Ta ayifetuukka afotsa pultto gideerikkinooshsha! Yaatintto taani ta asatuwaappe morkketuu kushiyan hayk’k’eeddawanttoo k’ammanne gallassi yeekkana shin! 2 ta asaappe shaakkettaade baana mala, taw bazzuwaan siiray ak’iyaa sa’ay de’eerenneeshsha! Ayaw gooppe, unttunttu ubbay sharmus’a; unttunttu makkaliyaa asaa zata.

3 Med’inaa Goday hawaadan yaagee; «Ta asatuu barenttu ins’s’arssan odanaw ubbaa wode giigi utteeddino; unttunttu biittan tumuwaa diraw wordduu minneedda. Unttunttu iitaappe iitaw aad’d’iino; taana erikkino» yaagee.

4 K’aykka S’oossay hawaadan yaagee; «Shooruu shooruwaappe naagettite; hintte ishatuwaakka ammanettoppite. Ayaw gooppe, ishay ubbay c’immiyaawaanne shooro ubbay zigiriyaawaa. 5 Shooruu shooruwaa c’immee; ittuunne tumuwaa haasayenna. Unttunttu barenttu ins’s’arssaa haasayanaw tamaarissi wotseeddino. Unttunttu nagaraa ootsiide daaburiino. 6 Neeni c’imuwaa giddon de’aassa. Unttunttu barenttu c’imuwaan taana erennan is’s’eeddino» yaagee Med’inaa Goday.

7 Hewaa diraw, Ubbaappe Wolk’k’aama Med’inaa Goday hawaadan yaagee; «Taani unttuntta seerissaade paac’c’ana. Ta asaa diraw, simmi taani harabaa ayaa ootsanaw danddayayitaa? 8 Unttunttu ins’s’arssay wod’iyaa wonddaafiyaa mala; unttunttu an c’imuwaa haasayiino. Barenttu doonaan ittuu ittoo saro k’aalan haasayiino; shin barenttu wozanaan p’iriyaa wotsiino. 9 Yaatina, taani ha yewoo unttuntta muranaw bessikkitaa? Taani ta huup’iyaw hawaa mala kawutetsaa bolla haluwaa kesikkitaa?» yaagee Med’inaa Goday. 10 Taani d’ok’k’a deretoo yeekkananne waassana; bazzo hentsaa gadetuwaa zilaalana. Ayaw gooppe, unttunttu basheeddino; yaana itti asaynne aad’d’ena. Mehiyaa s’aaguunne sisettenna; saluwaa kafotuunne do’atuu bak’atiide bi kichcheeddino.

11 S’oossay hawaadan yaagee; «Yerusaalame katamaa taani koleteedda keelaanne worakanatuu geessuu ona ootsana. Yihudaa katamatuwaakka ooninne de’enna mela sa’aa ootsana» yaagee.

12 Hawaa akeekanaw aad’d’eeda eranchchay oonee? I hara asaw odana mala, Med’inaa Goday bare ins’s’arssan oossi odeeddee? Itti asaynne Aa gidduwaana aad’d’ena mala, biittay bayiide, bazzuwaadan oneeddawe ayaasee?

13 Med’inaa Goday yaageedda; «Hawe haneeddawe, unttunttoo taani immeedda higgiyaa unttunttu aggeeda diraassa. Unttunttu taw azazettenaaninne ha higgiyaa kaallennaan is’s’eedda diraassa. 14 Hewaa aggiide, unttunttu barenttu wozanaa muumetetsaa kaalleeddino; unttunttu barenttu aawotuwaa tamaarisseeddawaadankka Ba’aala giyaa eek’atoo goyinneeddino» yaageedda.

15 Hewaa diraw, Ubbaappe Wolk’k’aama Med’inaa Goday, Israa’eeliyaa S’oossay hawaadan yaagee; «Be’ite, taani ha asaa c’ammiyaa k’umaa miizaananne wod’iyaa haatsaa ushshana. 16 Unttunttu woy unttunttu aawotuu erenna kawutetsatuwaa giddon taani unttuntta laalana. Taani unttuntta d’ayissana gakkanaw, mashshaan yederssana» yaagee.

Yerusaalame Asay Zilaaleedda

17 K’aykka Ubbaappe Wolk’k’aama Med’inaa Goday hawaadan yaagee; «Ane k’oppite. Yeekuwaa yeekkiyaa mac’c’a asatuwaa s’eesiide ayyissite; zilaassaa zilaaliyaa eranchcha mac’c’a asatoo kiittite. 18 Unttunttu ellekka yiide, nu ayifii afotsaa s’illuwaa s’okana gakkanaassinne nu ayifiyaa c’iruu haatsaa pulttana gakkanaw nu bolla zilaalino. 19 S’iyoonen hawaadan giyaa zilaassaa kooshshay sisettee; ‹Aayyeero! Nuuni bayeeddo! Nuuni mulekka kawushsheeddo! Nu Gollii koleti kichcheedda diraw, nuuni biittaa aggiide baanaw koshshee› yaagiino» yaagee.

20 Hinttenoo, mac’c’a asatoo, Med’inaa Godaa k’aalaa sisite! Hintte haytsay Aa doonaappe kesiyaa k’aalaa hayzzo. Hintte mac’c’a naanatuwaa zilaassaa tamaarissite; shoorata shoorato koyissuwaa tamaarissu. 21 Ayaw gooppe, hayk’k’uu naanatuwaa ogiyaan, wodallatuwaakka gutaran k’ees’iidde yiide, nu maskkootetuwaa gakkeedda; nu kaate golletuwaankka geleedda.

22 Med’inaa Goday taana hawaadan yaagiide azazeedda; «S’oossay hawaadan yaagee; ‹Asaa anhay pituwaadan dembban laalettana; unttunttu c’akkiyaawanttu c’akkiide oleedda katsaa mala; unttuntta ooninne shiishshenna› yaaga» yaagiide azazeedda.

23 Med’inaa Goday hawaadan yaagee; «Aad’d’eeda eranchchay bare eran c’eek’k’oppo; wolk’k’aamay bare wolk’k’an c’eek’k’oppo; woy durii bare duretetsan c’eek’k’oppo. 24 Shin c’eek’k’iyaa uray ooninne taana eriyaawaaninne akeekiyaawan c’eek’k’o.✝9:24 1 K’or. 1:31; 2 K’or. 10:17 Aggena siik’uwaa, suure pirddaanne s’illotetsaa sa’aa bollan ootsiyaa Med’inaa Godaa, taana eriyaawan c’eek’k’o. Ayaw gooppe, taani hawanttun nashetay. Taani Med’inaa Goday hawaa odaad» yaagee.

25 K’aykka Med’inaa Goday hawaadan yaagee; «Be’ite, barenttu ashuwaa s’alala k’as’s’aretteedda asatuwaa taani murana gallassatuu yiino. 26 Hewanttukka Gibs’e, Yihudaa, Eedooma, Amoonanne Moo’aaba biittaa asatuwaanne barenttu huup’iyaa shufeeriyaa meediide, bazzuwaan de’iyaa asatuwaa ubbatuwaa. Ayaw gooppe, ha kawutetsatuwaa ubbaa Asay tumuwaappe k’as’s’arettibeenna; Israa’eeliyaa Asay ubbaykka bare wozanaan k’as’s’arettibeenna» yaagee.