योहेजकेल 13

झुटा कागळ्यान विरुद् भोगवानो वोगे गोथी वात

1 योहोवान यो बुल मारेन्चा पुग्यो, योहोवा न मार सी कयो, 2 "हे मानुसन ओवलियाद," "इसराएल क जो कागळीयो आपसाज मोन सी भोगवानो वोगे गोथी कोरे, हेनका विरुद भोगवानो वोगे गोथी वात कोरीन तु कोय, योहोवा को बुल समळ!"

3 पोरबु योहोवा असो कये: हाय, उना विन ओकलीया कागळीया पोर जो आपसाज जीव पछळ भोटकी जाय, आरु काहनो दोरसोन नी आपलो हय! 4 हे इसराएल, तारा कागळीया खाढान कुल्या सारका बोनला छे। 5 तुमु खाढा बुजीन इसराएल क घराना जुगु भीतड़ा नी सुदारीया, जेरेसी त्या योहोवा क दाहड़े लोड़ाय मा उबा नी रये। 6 त्या लोगहन जे कोवे, योहोवा क यो बुल छे, जव हांव थार को मुकल्यो नी हुतो। तुमु मार सी होर कोरता होय की हांव तुमरी झुटी भोगवानो वोगे गोथी वात को पुरो कोरो? ते वी योहोवा हेनुक नी मुकल्यो 7 काय तुमरो दोरसोन झुटो नी होय, आरु काय तुमरो झुट मुटन वेवहार नी कोहतला? तुमु कोहता होय, योहोवा भगवाण यो बुल छे; पुन हांव न काय नी कयो।

8 एना कारण सी मारो मालिक योहोवा हांय छाचीत् काहय कयसे, त्यो कये, तमु झुठ कया। तमु हसला दर्शन देखिया जो छाचा नी हुता। हतरान करीन हांव परमेश्वर हांय तुमरे विरुध्द मा छे। मारो मालिक योहवा यीत् वात कयो। 9 योहोवा कयो हांव हेनु कागळीयान क डण्ड आपीस जे झुटला दर्शन देखीया आरु जे झुट कया। हांव हेनको मार लोगहन मा सी अलग करीस। हेनका नाव इसराएल न परिवार न सुची मा नी रये। चे इसराएलोन मुलुकोम नी भोराय सोके, एनासी तुमु जान लेसु की हांव योहोवा भोगवान छे।

10 "त्या झुटा कागळीया ताळ-ताळ मारा मानसो की झुट कोया। कागळीया ते कोयो की शांती रोहसे आरु त्या शांती नी होय। लोगहन को भीतड़ो वातड़ो कोरनो छे आरु लोड़ायीन तियारी कोरनो छे। पुन त्या टुटला भितड़ा पोर नीपीन एक पातळो चोप नीप रोया। 11 हे मोनखीया, नीपनो चुपेड़नो कोरनेवाळा झुटा कागळीया सी कोव की भितड़ो हिट पोड़से; काहकी घोनु छाटू मोटलु पानी पोड़से, आरु मोटला मोटला गारा वी पोड़से, आरु घोनी आँजी वी पोड़से। 12 जोत्यार भितड़ो हिट पोड़से तोत्यार काय मानसे तुमरे सी यो नी कोवसे, तुमु भितड़ा पोर नीपीया ने चुपड़ीया, त्यो कां गोयो?" 13 ओतरान कोरीन पोरबु योहोवा ओसो कोवे : हांव रीसोन मोटली आंजी उहवाड़ीस। मारा रीसोन कारण मोटलु पानी पोड़से। हांव रीसोम मोटा मोटा गारा पाड़ीस, आरु हेको नास कोस दिस। 14 इने रिते जेना भितड़ाक तुमु नीपनो चुपेड़नो कोरला छे, हेको हांव धुवाम भेसकी दिस। हांव हेकी कुड़ची लोगुन उखाय दिस। जोत्यार त्या पोड़से तोत्यार तुमु वी उना मा डाबायीन मोर जासु। तोत्यार तुमुक मालुम होयसे की हांव ही पोरबु छे। 15 "ऐने रीते हांव भितड़ा पोर, आरु हेको नीपनेवाळा कागळीया पोर आपसी रीस उतारीस। तोत्यार हांव तुमुक पुछीस, कां गोयो तुमरो भितड़ो, आरु कां गोया हेनाक चुपेड़नीया?" 16 ये इसराएलोन कागळीया योरुसालेमन वारु रीते विनता कोरता हुता। ये योरुसालेमोन शांतिन सोपना देखता हुता, पुन होंया शांति हुतीत नी। मालीक पोरबुन यो बुल छे।

झुटी भोगवानो वोगे गोथी वात कोवने वावा बायरान विरुद् मा भोगवानो वोगे गोथी वात

17 हे मानसो, हेमी तु आपनी जातीन भाय बोन्यान पोरायटान सांबु आपसो मुय उघाड़। ये आपसात मोनोम भोगवानो वोगे गोथी वात कोरे। तु झुटी भोगवानो वोगे गोथी वात कोरनेवाळा एनु कागळ्यायोन सांबु विनता कोर। 18 उनासी कोव, मालीक पोरबु ओसो कोवे की: "बाय तुमरे पोर पिड़ा आवसे। तुमु मानसोन कुहनीया पोर पेहेरने जुगु छिंदरान तावीज सीवु, तुमु मानसोन मुनका पोर बांदने जुगु खास तावी बोनावु। तुमु कोवे की यी चिजे मानसोन जिवोनक वाचाड़ने कोरीन जादुन ताकोत राखे। तुमु ओतरोत आपसी जिवाय राखने कोरीन हेनु मानसोन जाव मा फाँदे पोड़ जाय? 19 तुमु मुठ भोरीन जोव गोंहोंव आरु थुड़ाक रुटान भुकरा लीन मारा आपना मानसोन ओगोळ मेसे विटोळ कोरला छे। तुमु ओसा मानसोन मार नाखु, जेनुक मोरनो नी जुवे; आरु ओसा मानसोक जिवतेला राखु, जेनुक जिवतेला नी रोहनो जुवे। तुमु मारा मानसो सी झुट कोहु, जेनुक झुट सोमोळनो गोंहवे।

20 "ओतरान कोरीन मालिक पोरबु ओसु कोवे: तुमु जेनु तावीजोन लारे जिवोक शिकार कोरे, हांव, हेनका विरुद छे। हांव हेनको, तुमरा बाजीबोनोक, बाहोम सी उतराय लीस, आरु जीवोक तुमरा जावोम सी छुड़ावीन चिल्‌लान तोसु उड़ाय दिस। 21 हांव तुमरा डाहडान बुरकाक नुचड़ी नाखीस, आरु आपसा मानसोक तुमरा हातोम सी छुड़ाय लीस। त्या ओळी कोदी तुमरा हातोन शिकार नी बोने। तोत्यार तुमुक पोतु चालसे कि हांव पोरबु छे।

22 "हांव धोरमी मानसोक डोगायने नी देदो, पुन तुमु आपसी झुटी भोगवानो वोगे गोथी वातो सी हेनको डोगाड़ीया। तुमु भुंडा मानसोक खुश कोरु की त्या आपसा भुण्डला कामोक नी छुड़े। कदाम भुंडला आपसो भुंडो काम छुड़ देय ती त्या जिवतेला रोहे। 23 ओतरान कोरीन हे नोबियो! तुमु ओळी कोदी झुटा दोरसोन नी देखसु, आरु नी विचार कोरसु। हांव तुमरा जावोम सी आपसा लोगहोन को छुड़ाय लीस। तोत्यार तुमुक पोतु चालसे की हांवुत पोरबु छे।"