योहेजकेल 27

सोर सोहोरक शोक गीत

1 योहोवान यो बुल मारे यां पुग्यो: 2 हे मानसोन ओवलियाद, सोर देसोन वाराम एक विलापोन गीत बोनावीन हेनुसी ओसु कोव, 3 ऐ दोरीयान झोपला झोपला पोर रोवनेवावा, ऐ बेसका मुलुको जुगु देस देसेन मानसे पुठी वेपार कोरनेवावी, परमेश्वर योहोवा ओसु कोवे: हे सोर तु कोवे की हांव बेस जादा घाटाळु छे। 4 तारी काकोड़ दोरीयान इचमा छे; तारो बोनावने वाळो तुसेक आखो घाटाळो बोनायो। 5 तारा आखा पाटड़ीया सोनीर बोयड़ान सोनोवरोन लाकड़ान बोनला छे; तारा मोस्तुल जुगु लोबानोनोन वेला वाळा लीन बोनावला छे। 6 तारा डांडे बासानोन ओंजीरोन झाड़कान बोन्या; तारा ढोन्डियान पोटाव कित्तियान जागाम सी लावला सुदा सोनोवोरोन हातीन दात लागड़ला लाकड़ान बोनलो। 7 तारा ढोन्डियान पाटल्या मिसर देस सी लावला बुटेदार सोनोन छिंदरान बोनला की तारे जुगु झोन्डान काम आवे; तारी चांदनी एलीसान जागाम गोथा लावला निळ्ळा आरु रिंगन्या रोंगोन छिंदरान बोनलो। 8 तारा ढोन्डियाक चालाड़्या सीदोन आरु अर्वद जागे रोवनेवाळा होता; हे सोर, तारात जागाम ओकोल वाळा मानसे तारा ढोंन्डियाक चालाड़्या होता। 9 तारा कारीगोर जुड़ाय कोरनेवाळा गोबोल सोहोरोन डाहला आरु ओकोलवाळा मानसे होता; तारेम वेपार कोरने जुगु मल्‌लाहों भेव दोरिया पोरुन आखा ढोंन्डिया तारेम आय गोयला। 10 तारी सेनाम फारसी, लुदी, आरु पुती मानसे भोरती होयला होता; होये तारेम ढाळ, आरु टुपी टांग्या; आरु हेंदरे कोरता तारी इजुत वोद गोय। 11 तारा भीतड़ा पोर तारी सेना पुठी अर्वद सोहोरोन मानसे च्यारु मेर हुता; आरु तारा गोम्मत सोहोर मा शुरवीर उबला होता; होया आपसी ढाळ तारे च्यारु मेरोन भीतड़ा पोर टांगला; तारो घाटाळो हेंदरे लारे पुरो होयलो।

12 आपसी आखे भातीन धोन बेसको होयने सी तोरसीसी मानसे तारा वेपारी होता; होये चांदी, लुहड़ा, रांगा, आरु सीसा आपीन तारो माल मुले लेदा। 13 यावान, तुबल, आरु मेशेकोन मानसे तारा मालोन बोदले पावोर-पावेरनी आरु पीतळोन टाहरा सी वेपार कोरता होता। 14 तोगर्मा घोरानान मानसे तारा धोनोक लीन घुल्‌ला, सोवारीन घुल्‌ला आरु चोचोरगोदड़ा आप्या। 15 दोदानी मानसे तारा वेपारी होता; बेसके जागे तारा हाट बोन्या; होये तारे यां हातीन दातोन सींगड़ा आरु आबनुसोन लाकड़ा वेपार मा लावतेला। 16 तारी बेसकी कारीगारीन कोरता अराम नावोन तारु वेपारी होतु; मोरकोत जामन्या रोंगोन आरु हातो कोरीन गुथला छिंदरा, सोन, मुंगा आरु लालड़ी चे तारा माल होता। 17 योहुदा आरु इसराएल वी तारा वेपारी होता; होये तुमरी चिजोक लेनेन जुगु बोदलाम मिन्नीत गोंहोव, जेतुन, अगाती, अंजीर, शहद, तेल ओळी वी सुळावो आप्या। 18 तारेम बेसका कारीगारी होया आरु आखा भातीन धोन एकठो होयो, एरेसी दोमिस्क देस तारो वेपारी हुयो; तारे जु हेलबोनोन ओंगुरोन रोस आरु उजवी रुवीन पुगाड़्या। 19 वोदान आरु यावान ताता मालोन बोदले सुत आप्या; आरु हेन्दरे कोरता फोलाद, तेजपान आरु ओगोर मा वी तारा वेपारी होया। 20 दोदान सोहोरोन वेपारी काठीन छिंदरा आरु घुल्‌लान वेपार कोरता होता। 21 ओरोब आरु केदारोन आखा डाहला तारा वेपार्या कोवाये; होये मेम्ना आरु गाडरा आरु बुकड़ाक लावीन तारे पुठी लेनो देनो कोर्या। 22 सोबा आरु रामान वेपारी तारा वेपारी कोवाया; होये वारु सी वारु मुलकोन आखो भातीन मोसालो, बेस भातिन मणि, आरु सोनो आपीन तारो माल लेदा। 23 हारान, कोन्ने, एदेन, सोबान वेपारी, आरु ओस्सुर आरु कोलमोग, ये आखा तारा वेपारी कोवाये। 24 होये वारु वारु चीज पांगेरनेन निळ्वा आरु किड़्या विंदला छिंदरा आरु हिरो सी बांदला आरु देवदारोन बोनला फुलक्या छिंदरान पेटारा लावीन तारे पुठी लेनो देनो कोरतेला। 25 तोरसीसोन ढोंडीयो तारा वेपारोन माल लावने लीजाने होयो।

हेंदरे लारे तु दोरीयान इचमा रोवीन बेसकु मातभोर

आरु इजुतदार होय गोयली।

26 तारा ढोंडीयो चालाड़न्या तुसेक उंडा पानीम पुगाड़ देदला छे,

आरु पुरवाई तुसेक दोरियान इचमा तुड़ देदला छे।

27 जेने दाहड़े तु डुबीस,

तेनेत दाहडे तारो धोन, वेपारोन माल, मल्‌लाह, ढोंडीयो चालाड़न्या,

जुड़ायीन काम कोरन्या, वेपारी मानसे,

आरु तारेंचा जोतरा सिपायड़ा छे,

आरु तारि आखी गोड़दी दोरियान इचमा पोड़ जासे।

28 तारा ढोन्डिया चालाड़न्यान आयोड़नेन बुलो सी

तारा आड़ी छेड़ीन जागा वाळा काप पोड़से।

29 आखा ढोन्डिया चालाड़न्या आरु माछान धुंदा वावा ढोन्डिया चालाड़न्या,

आरु दोरीयाम जोतरा वी ढोन्डियाक चालाड़न्या रोवे, चे आपना आपना ढोन्डिया पोर सी उतरी जासे।

30 आरु होये भीमा उबा होयीन तारा वाराम उचा बुल सी आयड़ी आयड़ीन रोड़से।

होये आपसा मुनका पोर धुळु उड़ावीन रुखड़ाम लुटसे;

31 आरु तारा दुखोम आपसा मुनकाक बुड़ाय लेसे,

आरु कोड़ीया मा गोंटो बांदीन आपसा मोनोम वातड़ा दुखो पुठी

तारा वाराम रोड़से आरु छाती ठुकसे।

32 होये विलाप कोरता जायीन तारा वाराम विलापोन यो गीत बोनावीन गावसे:

सोर जु हेमी दोरीयान इचमा हुगु पोड़लो छे,

हेरे जोसो काहनलो सोहोर छे?

33 जोत्यार तारो माल दोरीया पोर सी निकाळतो होतो,

तोत्यार बेसकी जातीन मानसो जुगु रेट होय जातलो;

तारो धोन आरु वेपारोन माल बेसका धोरतीन राजा मातभोर होयता होता।

34 जेने टेमे तु ओथाह उंडा पानीन लोहरोम सी टुट्यो,

तेने टेमे तारो वेपारोन माल,

आरु तारा आखा रोहन्या वी

तारे धोड़े रोहीन नास होय गोया।

35 दोरीयान कातरेन आखा रोहन्या तारे कारण नास होया; आरु हेंदरा आखा राजान रोड़नो चालु होय गोयो, आरु हेंदरा मुखो पोर होसटाय गोया। 36 देस देसोन वेपारी तारे विरुद् वायकेड़ा उड़ावतेला; तु बिह गोयु ने आरु ओळी उबो नी रोय सोकीस।